續前文，當啲data失咗蹤時，先知道有幾重要…… 本來已經打定輸數可能要畀幾嚿水去恢復，因爲卡盤讀唔到……後尾可能係lucky，將啲極重要嘅拷返落嚟，大部份損壞咗同埋都讀得超慢，所以無辨法，救得返呢啲都ok，當做一次大清洗…… 以後都係要記得backup先得，同埋呢，喺呢個時代，平臺帳號同瀏覽紀錄都幾可以定義一個人嘅網絡身份，冇咗嘅時候都幾無助

間中出去食個豐盛啲嘅早餐! 有只做鄰里生意嘅，亦都有主打外賣嘅，同埋擺攤賣嘅 結合埋無耐前睇嘅一篇關於喺臺灣點解foodpanda冇打低舖頭嘅文章，都幾有感觸 擺攤賣嘅易理解，做下小本生意搵食，不過無牌無照噉解囉，風險同廉價正相關，味道嘅話都睇彩 只做鄰里街坊生意嘅，就係靠口碑，客源穩定，同埋一定夠抵食，穩扎穩打地做落去 今日就主要去咗主打外賣嘅舖頭，本身位置都唔算差但都未夠好，轉型都可以理解，同埋做外賣嘅話，夠好味都會做唔停……相對地，來往等待嘅騎手都好多，就餐環境實在唔得掂 平臺都真係權力太大，落單到出餐送餐環環相扣，但係唔會一步步等而係有個target time，超時就會扣罰……really crazy，而且一般都係會多個平臺都有運營，所以根本係會做唔切，積壓到一個點，店長騎手落單人都會一齊癲…… 騎手等待嘅時候都好難去享受碌手機嘅時間，因爲搵食賺緊錢，仲要擔心超時，等下坐下食下煙催下夥計，你要佢哋去「欣賞沿路嘅風景」就真係食懵咗…… 只能講而家情況真係好差，如果工作環境有得揀，如果商家企硬，如果大家仲會堅持到店消費，如果勞工法真正落實，如果勞工真正可以反抗，ok

well，勁誇張，又煙花又炮嘭一聲，要瞓呀😭 無咩倒數欲望，大概因為都算滿意近期？瞓先好過

間中搭下公交都可以調節下心情 慢就梗係慢㗎喇，班次少，早晚高峰塞到傻，所以都真係好難得會睇到有後生嘅坐公交 不過呢，比起搭地鐵係多咗啲連結嘅 大環境唔好，規矩多，工資少，人都多變𤷪𤺧，唯有自嘲去排解，日子都係要過落去，欸，過落去？ 都係唔講晦氣說話喇，人生就係噉，起起落落，快樂噉享受就一日，唔開心挨落去又一日，其實都唔係咁特別，如果唔自己去創造價值同意義嘅話 時間呢？真係少好多吖

未開始之前，以爲會係個好週末，因爲有各種精彩賽事可以睇，而家搞到冇乜心情 斷估唔到，多年之後，外國媒體記者聚喺一齊上外媒頭條時係直播呢單災難💔 最初嘅火苗係點嚟未知，易燃嘅防護網、發泡膠係火勢迅速蔓延嘅真正原因，天氣乾燥又大風加埋對流又再加一把火，而消防鐘冇正常運作令到居民無法第一時間逃生，至少128個人離開人世😭 法團強制通過天價維修方案，有業主錢畀咗，屋燒穿，親友亦冇埋…… 當前阻燃相關嘅守則或指引冇法律效力or唔屬直接罪行……竹棚成爲官方嘅鎖定目標？ 有衆多官方捐款渠道之下，市民踊躍想捐畀誠哥基金無果令到基金會要發公告，要係李嘉誠家族嘅人先可以捐 唔知點捐錢比較安心，就捐物資啦❤️。但有唔少車主俾抄牌 關愛隊事後嚟影相，協同警方清場接收物資，上述車主又過嚟搬返走物資 四大訴求「妥善安置災民、就工程疑涉益輸送展開獨立調查、重新審視工程監管制度及問責成立獨立調查委員會」發起者涉嫌意圖煽動被警方拘捕，聯署人數停留喺一萬而關閉結束 有好多想繼續問候出聲，打咗一大段都係算數，講再多都廢，國安新香港由治及興好嘢

終於都有返啲雙休，之前都知會收返公屋，而且都比預計中要晏（原本以為得3個月），同埋本身諗住睇埋鬼滅。加埋一齊就事隔六個月去探婆婆 前邊嘅post都有講過，婆婆而家可以講到嘢，不過唔知係咪因為太多個月冇傾偈，基本上都好少主動同我哋講嘢，同埋可能都好多嘢唔識發音，畢竟大腦始終都係有損傷 比較主動講嘢嘅時侯就係覺得痛，最激動時就係我哋臨走想戴返個護手，就直接扭計唔制：「唔好啊……痛……」，結果就係無奈要揾姑娘姐姐幫手 不過都老咗，可以天真啲想點就點，都有聽講話老人就係會越老越似細路，年輕時吃咗咁多苦，享受下幾應分，以後嘅話大概都好難再有更大嘅進展？當前就抱住最消極嘅諗法，有任何進展都當係賺到 BTW，院舍環境都好，姑娘亦都幾nice，只能講公立係正好多，期待下次再會，應該唔使太耐！

fri前排先送咗香薰助眠，幾好聞，而且聞慣咗之後都真係幾助眠 跟住又加碼送咗對應每個月嘅12袋咖啡？勁誇張，真心覺得自己得到咗好多嘢，而講真好似冇付出咁多？可能又要講唔應該同fri咁斤斤計較，只係我自己內心過唔太去哈哈 當然都好開心！同埋送禮都係相互進行，都要好好諗下下次要送咩先！

如果跟開嘅話，就知道我婆婆年初嘅時候中風，雖然已經好快就轉醫院注射靜脈血栓溶解劑，不過都離第一時間好遠。後尾更加因爲發燒發炎有嚴重嘅生命危險，好在大步檻過咗，但都係偏癱同埋吞嚥困難食唔到同講唔到嘢 而冇耐之前，喺我姨嘅引導下可以斷斷續續講到幾個字，實在係太好喇！點解話係現代醫學嘅奇蹟，因爲喺當時通知注射靜脈血栓溶解劑時有講到注射時間同相應嘅康復概率，真係可喜可賀 不過呢，期望都係唔好set得太高比較好，畢竟退化之後可以恢復幾多都係未知之數，而家噉樣已經係比較好嘅進展，期待更多，不過如果達唔到都平常心對待，而我自己都真係幾想可以同婆婆再飲一次早茶，用自己賺到嘅錢請，希望可以有呢個機會

coffee☕+ sunshine🌞+ books📖+ movie📽️ +🛏️ = perfect day💯 快樂就係咁簡單

培訓咗兩個星期，身心疲憊，好在有半日休息充電，舒服晒 其實都唔係做咗太多嘢 去戲院睇電影，9年前上映嘅，遲啲應該會有影評，經典嘢反覆回味都係好正 食餐好啲嘅夜晚同宵夜 逛下書店，睇陣小說，不過睇啱一本樣本書但冇存貨，慳返…… anyway，好多書店都唔係太多書想睇……可能我out school咗。可以任意轉嘅地球儀都幾好玩，too big to buy

朋友講近排出版嘅書貴，我就話唔覺 最近又直接使咗差唔多一百蚊買電子書（台版譯本小說）……先突然覺得可能係自己慣咗…… 開埋名算，第8號證人，請多多支持正版，有錢嘅話🤡 話時話，諗諗吓都真係幾貴，sor，可能我買書嘅時候係黐線嘅

蚊！ 返嚟幾日俾咬到傻，要俾咬死喇

明明應該好熟悉，但一出地鐵站，好熱，成個人要熔化喇 呢個就係久違好多年嘅廣東六月酷熱 都怪唔到我適應唔到？畢竟喺學校時仲係梅雨季，連落雨同陰天 anyway，都未到「蒸發」嘅階段，陸續有嚟，不過大概都會慣噶喇

瞓唔着但我已經好似開始唔想特別紀念 當然常例嘅異常都一樣見到：遊戲入邊嘅聊天功能，天安門嘅預約，知有集會但已經冇去睇直播 點講呢，琴晚未瞓着時就喺度諗緊係special，但normal應該擺前定擺後？最後我都係揀咗擺前，係因為今日都一如往常地特殊 而我，都慢慢喺兩者之間揾到咗平衡點，悲觀嚟講係我已經無望到咩都唔想去諗，不過我知道自己一直都有喺度思考，有令到自己過得更好，當然，我嘅力量都仲喺好弱，基本改變唔到乜嘢 此時此刻，我開始覺得，噉樣都唔差，至少我係活喺而家而唔係未來……噉樣一諗就會覺得已經好好彩

ghost博客自帶得all private或者some posts設為members only，但我想有啲posts用密碼睇（唔想搞訂閲members），所以就自己摷資料整！ 1）首先新增一個要密碼嘅post嘅對應tag，呢度設為hash-private（感覺上用internal好過public tag） 2）修改setting中lab嘅rounts文件，新增/private/路徑處理tag咗hash-private嘅post： routes: collections: /private/: permalink: /private/{slug}/ filter: tag:hash-private template: index /: permalink: /{slug}/ template: index taxonomies: tag: /tag/{slug}/ author: /author/{slug}/ 3）修改nginx配置，新增驗證： 呢邊因為係用docker搭建ghost，所以需要反向代理。同時因為開放p

終於扚起心肝睇下邊度佔咗啲空間，原來係build嘅嘢太多導致 rust build嗰啲，docker build嗰啲…… 尤其後者，一條docker system prune命令清咗成10GB空間，開心 應該長期都唔使考慮upgrade個server嚕~

臨瞓前睇下BBC News，聽加拿大新總理Carney發表演講話永遠唔會成為美國嘅一個州，really crazy 新秩序未成型，而美國又上返Trump，兩個次序應該調轉咗 雖然話事到如今都已經開始接受呢個就係新世界嘅情況，只係喺度諗，美國而家選咗一個選前話會提振經濟，選後大亂經濟嘅Trump，選民究竟點樣睇呢件事？ 經濟呢一part，喺往期嘅月刊有提及過，包括，偏獨裁專制與經濟增長嘅關聯，Biden時期美國實際嘅經濟情況等等 雖然話民主黨都確實好不到邊度，但喺而家呢個時代，似乎正常少少已經係褒義詞……

前一日中午仲着住短袖曬太陽仲熱過屋企，第二日中午就直接降到得返三四度…… 好消息係，今年之後大概都唔會再有噉樣嘅經歷，應該？