軍火之王 Lord of War

因為講話會有續集，所以嚟重温一下呢部

想要與眾不同，就要同其他人諗嘅唔一樣：Yuri Orlov喺面對槍擊嘅時候，唔係好驚噉即刻走，而係諗緊既然咁多人需要槍，點解唔自己賣？換言之，佢睇到咗一個龐大嘅市場需求——槍支；當蘇聯解體時，就靠住喺烏克蘭做將軍嘅叔叔轉為賣更勁嘅軍火——飛機大炮都有埋

兄弟Vitaly Orlov本來想繼承家族事業做餐飲，但其實自己冇嗰個天分，而哥哥有噉樣嘅雄心壯志，因此兄弟齊心拍住上，做咗Yuri嘅副手。但兩個人嘅價值觀一直都未傾過，實際上係有衝突。尤其後尾Vitaly患咗毒癮，要Yuri三番四次送佢去戒毒，因此之後大部分時間都係Yuri一個人負責晒全部嘢
有一次軍火交易時Vitaly睇到啲軍火係用嚟屠殺平民，就即刻唔滯，要求取消交易，因此炸咗一車武器，之後就馬上畀對方嘅人擊斃。Yuri好痛苦地繼續完成交易，跟住冒險帶Vitaly嘅遺體返去，始終兄弟齊心，就算死咗都一定要帶返返去
其實Yuri都睇唔慣，但對佢嚟講，直接同間接係有好大嘅分別，所以佢就算知道對方係屠殺平民都照樣會繼續交易，而當André Baptiste Sr捉住佢隻手同佢一齊殺死另一個軍火商Simeon Weisz時，開完槍先遲來地講一聲「唔好，停」……

而同Ava Fontaine嘅愛情，就好似電影所講，如果一開始就係以謊言開始，噉必然最後都係因為謊言而結束……但係都要留意到，佢唔係一次就game over，如果佢真係金盆洗手從此唔再掂軍火交易嘅話，佢哋嘅家庭應該唔會散
會畀機會，都係因為愛；但如果再次辜負，即使再愛都深知已經冇可能再改變對方，而自己又唔可以接受呢一點，就不如離開

Jack Valentine作為執法者，相信都幾頭痕，因為到處都捉唔到Yuri痛腳，所以要喺佢屋企樓下嘅垃圾桶揾蛛絲馬跡，可以講非常盡忠職守。後尾仲利用其妻子Ava Fontaine嚟協助自己（所以密碼千奇唔好用自己或者屋企人嘅生日……XD
但作為小職員，喺捉到Yuri嘅時候以為對方會監躉坐滿，但即刻就要望住佢畀釋放，繼續自己嘅軍火之旅……原因好簡單：政府都係呢啲交易嘅參與方之一，好似Yuri呢啲人才係被需要嘅；即使冇Yuri，都會有其他人做，就好似死咗嘅Simeon Weisz噉樣，只要軍火交易嘅買方同賣方仲存在，作為warlord橋樑嘅lord of war就會一直存在

如果希望世界和平，首先就應該停止生產同交易軍火，但其實更緊要嘅係，將獨裁、對抗、仇恨等等嘅思想徹底驅逐於呢個世界，先至唔再有軍火嘅需求。不過好可能，永遠都做唔到？人類都係走向毀滅算，玩壞嘅世界應該幾希望實現到呢個時間線