鋼琴戰曲

有時我會諗，係因為出名而畀人救，定係因為出名所以流傳落嚟？又或者係兩者都有。當然都有平民百姓畀救，同埋都有啲唔出名都同樣流傳到只係冇咁廣？

Władysław Szpilman就係噉嘅一位鋼琴家，當時納粹德國閃擊攻陷波蘭。初初有做咗納粹下猶太警察嘅朋友想邀請佢一齊做（後邊同樣係呢位朋友使佢免於送去集中營），有錢有勢日子好過啲，但Władysław好有正義感，拒不加入。大家就算平時唔清楚，從電影都可以睇到SS嘅恐怖：玩弄侮辱、濫殺無辜嘅方法極殘忍同恐怖，連細路都唔放過
因為佢當時好出名同埋因此識好多人，所以好多朋友都幫佢手，免於送去集中營，喺勞工營工作苟活，後尾仲乘機偷走喺眾人嘅幫助下四處躲避

雖然話人死咗就乜都冇，但當時佢都有份幫手運武器入勞工營，感受過其他猶太同胞嘅反抗勇氣同決心，所以當佢睇到勞工營起義但最後失敗被槍殺時，應該都會諗過自己係咪應該留喺嗰度同所有人並肩作戰，向納粹宣示華沙人永不屈服嘅精神。佢會噉諗都好正常，尤其當佢自己親眼目睹成個起義過程嘅時候，不過佢自己都明白，亦都需要有其他人存活落嚟，去迎接最終嘅勝利——唔死本身就係一種勝利，一種起義

佢喺做勞工、四處躲避嘅時候，鋼琴始終都喺自己腦海入邊，手一郁，琴聲就自然放送出嚟，當然唔會有真嘅鋼琴畀佢，即使有都會為咗免遭其他人嘅懷疑而忍耐住唔去彈嗰架真實嘅鋼琴，直至畀一位有良知嘅德國軍官Wilm Hosenfeld撞到，畀佢一解鋼琴之癮，亦都畀Wilm自己從殘忍不滿嘅日子脱離出嚟。之後Wilm都畀食物同衣物幫Władysław挨到去聯軍解放華沙
正因為係噉嘅人，先可以全心全意彈好鋼琴，受難之後都未摧殘晒可以再繼續喺廣播彈奏四處演出同錄歌

再講返個軍官Wilm，雖然電影係話因為Władysław得唔到佢嘅名而救唔到，但事實唔係噉，畢竟軍官都唔係只係自己一個，都會有屋企人可以寄信求救。事實上，Władysław都有尋找各種方法去拯救Wilm，但當其時揾嘅"bastard"波蘭秘密警察頭Jakub Berman唔肯幫手，最後Wilm死喺蘇聯……無可奈何，世事唔可以永遠如意，全部都good ending

更加感動嘅反而係喺wiki睇到Władysław嘅回憶錄記錄嘅一位可以自己倖存但選擇跟住啲猶太孤兒一齊去集中營嘅院長嘅事。即使情況再差，只要大家喺一齊，就唔會咁驚，反而可以好樂觀噉面對，就似《美麗人生》一樣

我哋都要相信，呢個世界都係會有好人，可能會好黑仔，但肯定會有機會遇到，要深信呢點，勇敢向前行