觸不到的她Her & 智理想情人Ich bin dein Mensch

因為chatgpt嘅橫空出世啦，所以就睇返經典嘅her，同時又睇到有近年出嘅Ich bin dein Mensch，就一於一齊睇睇，可以科幻到點嘅程度

Her入邊同AI拍網路拖嘅場景，而家可以講已經某種程度上實現咗

講返電影先，Samantha一開始嘅設定，係助手：幫助整理email，並提供朗讀功能，安排日程，陪傾偈等等。而喺同人類嘅交流討論之後，呢套operative system對人類嘅情感同存在意義好感興趣，因此同人類發展戀愛關係，喺深入瞭解咗之後，意識到自身永遠係一個唔真實存在於物質世界嘅嘢，因此放棄註定無果嘅關係
都幾哲學性嘅問題：如果可以好好地處理每一個戀人嘅關係，專一係咪咁重要呢？如果係同人嘅話，就唔使問嘅，因為冇人做得到一日24個鐘同時睇好多個人；但如果係AI？好肯定佢哋係做得到啦，噉，其實就真係因人而異了，我自己覺得啦，就唔係一個must，最重要嘅係乜嘢？程度問題，愛到幾入骨，對佢有幾好之類嘅，而專一呢，都係呢兩方面嘅體現，同埋有人會覺得係排他性唯一性，呢啲真就因人而異，因為對AI嚟講，確實係可以愛人多嘅同時愛嘅程度都深

而男主Theodore，都係個幾矛盾嘅人，佢一方面好有才華，比較容易代入到其他人度，可以根據唔同嘅client，跟進佢啲嘅故事，因應唔同嘅事物去組織一封好真摯而令人感動嘅信；但另一方面，佢處理唔好同現實中嘅人嘅關係，包括前妻、前女友等等。不過都可以噉理解，因為佢處理唔好，一味逃避，所以先希望喺另一個領域可以抒發自己嘅情感同諗法，有延續性地為client寫信，一環扣一環
所以佢又真係冇乜知己朋友，唯有等Samantha嚟助佢發現自己嘅優點、勇敢地去面對人生嘅議題，從呢個角度嚟講，都幾好彩。而且更好彩嘅係，前女友、現best friend都睇到佢嘅優點同喺最好嘅時光再次喺埋一齊……過於H.E，唔係幾中意

而Ich bin dein Mensch，暫時嚟睇都有好多年先有可能實現到，因為而家嘅chatgpt呢，都係生成式嘅（即係一問一答，冇promt就冇輸出），而唔係好似真AI，可以真實地同人去交互（傾偈、做嘢之類）

Tom嘅設定就好唔同，一開始嘅目標就係要做評估專家Alma嘅男友。雖然一開始未完善，出咗bug，先令我哋好快地抽離出嚟，結果就係，大家同Alma都好驚訝地發現，原來主管都係機械人！不過事後再諗返都好合理，唔用AI用乜呢？同埋Tom都咁強大，負責解釋同接待嘅話，根本唔難
少少偏題添，講返先，Tom呢，因為要加啲真實感，所以係從Alma青少年嘅一位愛慕對象遷移過嚟。由此可見，背景係幾緊要：一個人，冇可能無嗱嗱就噉橫空出世，就算冇背景，都要作一個出嚟
儘管Alma一開始就好肯定噉講自己唔會對Tom有好感，但Tom都係潛移默化地改變自己去令到Alma中意着緊自己，呢個就係AI嘅強大之處，只要setting妥當，迎合人類實在太容易——浪漫、可靠、油膩、聽話、温柔等等，各種type任君選擇，兼之size……甚至你講佢唔似人類，冇缺點嘅時候，就搞個瞓覺打鼻鼾……truly crazy。可以講，如果一個人唔撇去七情六慾嘅話，係冇可能唔中意、倚賴噉樣一個理想愛人
but，問題係，究竟係咪真嘅情感？Alma喺最後嘅評估報告都有講，呢種可以滿足人類任何需求嘅機械人，喺歷史中嘅任何相似物都係一種毒藥；我哋基本分唔清乜嘢係真乜嘢係假，至少喺電影入邊係噉，robot嘅設定都係為人服務，所以喺呢個原則下，人類就係高高在上，被服務被滿足嘅。呢點，我唔係幾贊成？因為，既然設定係為人服務，噉其實就係人嘅心理作祟，i mean，唔係機械人嘅出現令到人貪得無厭，而係，人本身就係貪得無厭嘅，如果唔係嘅話，完全可以唔使咁完美；同埋，人嘅情感，本身就唔建立喺實際嘅嘢上邊，所有嘢其實係喺當事人嘅心入邊，唔使理對面係人、定係機械人，只要當事人深深地確定，噉就已經搞掂咗，totally confirm, nothing could change

Alma，同樣係人，但明顯理性冷靜好多，可能係因為職業問題。一方面，佢好怕孤獨，同時因為失去咗BB留下嘅創傷而走唔出嚟；但另一方面，佢冇諗過自己會再同其他人有關聯，基本上就係走向佢自己最怕嘅結局。呢個都係點解Tom有位入到，唔單止有背景就得咖，人唔寂寞、冇創傷憂慮，就唔使其他嘅存在，自己一個都可以過得好開心，why not?

講返電影，喺最後嘅最後，究竟，係H.E，定係B.E？我自己會覺得係bad ending，因為Alma都係清醒地意識到，當初嘅嗰個男仔，冇錫到佢，而係永遠地失蹤錯過咗；Tom只係一個虛假嘅事物，佢嘅存在就只係為咗滿足自己，而自己做唔到天真幼稚地繼續參與呢種遊戲，呢個都係過於清醒理性嘅悲劇，但其實都係好事，唔同Her入邊，係可以不斷瞭解自己多啲，有所進步；呢邊嘅話，就比較似食極都有嘅糖果，越食越想食，越離唔開。至於有人覺得係HE，都見仁見智嘅，我只係覺得，如果真係HE嘅話，就唔使再諗返以前嘅故事喇

綜合嚟講，從社會嘅發展嚟睇，呢個可以講係趨勢，無論你信唔信。因為呢個確實係一個超真實嘅需求，而技術上嚟講，係可以喺未來實現到。又唔使話太抗拒嘅，想試下就體驗到，唔想嘅話都冇所謂，畢竟主動權都係喺我哋手上，暫時嚟講啦。如果你問我？我會覺得自己都係俗人，係㗎，好少人可以抵擋到呢個誘惑