すずめの戸締まり 鈴芽之旅
林聿_觀察人類筆記
個人都幾中意呢個影評
至於點解媽媽送畀鈴芽最好嘅禮物一張凳少咗一隻腳，除咗因爲嗰場海嘯之外，其實都暗合鈴芽失去咗自己嘅媽媽，喺心中留下缺陷（細細個唔知道媽媽已經離開呢個世界，只覺得係「媽媽搵唔到自己會好擔心」，呢段超容易飆淚
其實災難之後，先知道曾經擁有嘅，就已經係好幸運
鈴芽喺四歲時鄉下受海嘯，失去咗自己嘅母親同埋媽咪畀自己嘅禮物一張凳，而一邊抖大氣一邊喊住搵（老實講開頭嘅配音真係幾令人困惑），無意中入咗一棟「門」進入「常世」，正當自己難過到唔知點算嘅時候，畀疑似係媽媽嘅長髮女人叫住並得到返嗰張凳，只係少咗一隻腳
而當草太慢慢進入自己嘅世界時，但卻又好快地被蘇醒嘅要石「大臣」變到喺三腳凳入邊，仲要變成新嘅要石
喺尋找恢復草太辦法時，同默默犧牲，撫養自己嘅阿姨大嘈一交，內心再次受到傷害（當然，其實氣話實在唔可以當真，冷靜嘅時候諗下就會明，如果係真嘅，就唔會養到而家咁大都仲係單身，唔想養嘅話理得你咁多
喺重返故鄉時，搵到自己細個時嘅日記簿，再次感受自己當時嘅難過同孤單，而此時此刻嘅佢，有咗自己嘅寄託同希望，佢唔可以再畀自己珍惜中意嘅人再次離開自己，即使幾危險幾機會渺茫
當然，點都係要失去一啲嘢，先會學識成長；點都要失去過先識得珍惜，可能呢啲就係做人嘅難處，記憶太多，經驗積累，最後發覺，嗚呼哀哉，原來好多嘢都做錯咗，亦都無可奈何，只能感嘆一句，喺之後嘅日子裏，都有吸取過教訓做得好少少，前事不再追，唯望以後能更好
草太作爲家族繼承嘅關門師，兢兢業業，犧牲亦好多，無論係從金錢時間又或者學習考試前途之類
我諗，佢一定都幾中意呢份職業，雖然冇酬勞，亦都唔會其他人知道同感謝佢嘅付出，但佢感受到呢片土地曾經嘅繁華同和諧，連結到前人對此地嘅熱愛同不捨，因此先可以話畀佢哋知，後人（我哋）好感激佢哋以前嘅付出同建設，可能佢哋已經畀好多人遺忘咗，但只係因爲現世有各自嘅生活同拼搏，而同樣咁熱愛同珍惜呢片土地
如果冇遇到鈴芽，大概佢會甘心接受自己成爲要石，雖然可能冇遇見就唔會有大臣脫離嘅情況發生。因爲視之爲自己嘅責任，可以做到幾好就盡做。其實呢個設定都幾有趣，點解要有要石嘅存在？我係噉諗，因爲前人要確定，現世嘅人會好好地珍惜熱愛呢片土地，而唔係用完即棄，忘到冇雷公咁遠，所以需要喺現世之中搵人嚟作爲證據：因爲愛得深沉，所以願意承受永恆嘅寂寞同枷鎖。但係呢，被選中做要石嘅，未必真係達到呢個要求，所以大臣甦醒之後先想搵其他人代替自己
但佢哋的而且確遇上彼此，鈴芽太特別了，連死都唔怕，遇到乜嘢事都冇諗過放棄。唔知係咪有個性嘅人會特別惹人中意，畢竟有個性先更加容易入腦入心
而大臣就好似一個細路仔，將其他人嘅說話睇得好重，尤其喺自己中意嘅人面前；但聽到鈴芽講討厭自己，瞬間就好似失魂魚，成身光芒都消失晒，當其時應該係好難受同埋不解。但係呢，佢都係好關心同保護鈴芽，儘管方式唔太合適，差啲一個爆起要傷害鈴芽姨媽。最後都明白，有啲嘢勉強不了，因此帶着鈴芽嘅期望做返要石，至少，唔會係再畀討厭
評論留言区