禮儀師之奏鳴曲

呢部確實係幾令人感動嘅，只不過，太理想化

就噉講，一開始美香會因為噉而逼小林大悟離職，甚至要返孃家；因呢個邏輯，死者家屬按理係唔會表達感謝，當然可以話佢哋幫死者整靚返，畀死者可以好好睇睇地離開呢個世界，令仍然活着嘅人們留念記掛，但可以講係絕少數

同埋電影入邊嘅死者，都冇點展現死亡帶嚟嘅殘病衰樣，除咗第一位嗰個有側面講佢嘅不堪，但我理解成係獨居冇人理嘅老人嘅處境

言歸正傳，禮儀師呢個職業，喺以死亡為避忌嘅地方嚟講真係唔老黎，所以好難請到人，如果唔係小林大悟冇工開，見收入咁高，入咗局，可能都唔會有下一個後生嚟繼承

儘管一開始係唔樂意，帶住厭惡同噁心去完成，但小林大悟都漸漸揾到呢份工嘅意義，尤其知道咗社長佐佐木生榮係為自己嘅亡妻入殮之後先做禮儀師。其實每一份工都有佢嘅意義，只係睇你是否願意接受並尋找，進而會愛上呢份職業

無論係乜嘢事，都係畀生人睇嘅；所以，死前做嘅嘢，係所有人都睇嘅；而死後嘅，就係活着嘅人先睇到。因此，禮儀師所做嘅，其實係為死者嘅親朋戚友而做嘅，為將家族嘅人集合喺一齊，嚟一同參與對此人嘅思念同留戀
無論古今，亦無論中西都共通嘅事物。人，生而終會一死，可以講，死亡就係一種歸宿，沒有死，何來生？喺死亡之中，我哋學會咗傳承同珍惜，有啲老土，但都係想引用返呢一句：

Dream as you will live forever, and live as you will die today.
by James Dean