Day 3 Me 17➤23

今日（指15號，下同）想點就點，why？因為我最大囉，同埋今日係「偷」返黎嘅一日！

本身諗住今日就返去，但留多一日真係好值得，如果唔係要返學，真係想留夠七日

之前講過香港變差咗都係好，今日就詳細講下點樣好法——最好嘅其實都係最簡單嘅——喺以人為本嘅好多地方都做得好。

比如話交通方便，見得最多嘅就係101路（人腳）⟩⟩私家車⟩巴士、地鐵⟩的士⟩摩托車⟩單車⟩渡輪；講到交通，就可以講下今日搭巴士睇到路上有施工，都會整一排嘢圍住，跟住放滿晒啲警示燈，所以點都會注意到

第二個就係公共設施充足，除咗到處可見嘅巴士地鐵站，行幾步路就會有社區中心、公園、球場、遊樂健身設施，圖書館、人行走廊等等。都話香港寸土寸金，但呢啲真係唔慳得。同埋對坐輪椅人士都好方便，從人行道、巴士到地鐵再到商場等等

再來就係社會保障、福利好。有好龐大嘅社工機構去扶持到社會嘅每一個角落，亦有好多部門去維護公民權益——例如消委會會對市面上嘅產品檢測，維護消費者權益；傳媒跟蹤報道反映社區或環境嘅問題……‌‌對殘障人士、老人嘅保障都好周全，基本上係唔會到流落街頭身無分文嘅情況

不過其實呢啲都係本分先啱，公民受管治、交稅，無非都係想過得更好，否則就失去咗交換嘅條件，變成不對等嘅付出同代價

所以好多嘢都係自然而然噉做到。例如前邊提到嘅維修道路時做好警示，點解？因為法例、判例不斷完善進步之後，就成為咗一種責任——否則如果警示唔明顯導致車禍，路政署係要負大部分甚至全責

包括話人多地少都係一種好處。人多地少，解釋返先，唔係指土地面積細，而係已開發嘅土地面積細（得3成左右）。噉何解好呢？「地少」，因此房普遍都細，所以人就會好少留喺屋企，出去玩，噉娛樂業就會有足夠嘅受眾基礎去發展，所以呢座城市文化可以咁興盛。演唱會、電視電影、展覽博物館、書店、遊樂場……‌‌講開又講，住落又唔覺有乜問題。房確實唔使咁大，除咗個廚房確實細得唔適應，其他感覺都還好

只係講咗咁多好，都有嘢係差咗，所以先有新一波移民潮。包括但唔限於政治民主權利、法律、公帑花使等等。所以一對比，都好易知道發生咗乜嘢轉變

一條渡輪有佢嘅歷史，我人仔細細，都唔係話冇嘅。呢六年，真係從一個𡃁仔（not 靚仔）變成而家呢個一樣仲好天真幼稚但知道明白咗更多嘢嘅後生仔

都叫玩得盡興！如果再多幾日就玩得更開心，可惜。不過其實今次去都係一時興起，臨時起意做好plan就走，所以都滿足。再多幾日嘅話，可以book到M+，去到太空館、歷史博物館、獨立書店、機場&各個離島同「山旮旯」，入去西九龍法院旁聽，支持下《窄路微塵》同冇刪改嘅《毒舌大狀》，繼續搵未買到嘅書，爬下山，maybe仲有迪士尼？

呢三日嘅見聞都將一啲未來嘅可能結果睇得更清（更大可能發生）。只不過議員攞十幾萬人工都要「反叛」，即使目前睇上去越來越冇望，都仍留有一絲火光

goodbye, my spiritual home