巴比倫：星聲追夢荷里活 Babylon

好少可會有電影係講電影本身，同埋想講呢，三個鐘完全未夠喉，但又覺得，如果再耐啲，可能個節奏就冇咁好

我哋都知，電影一開始係默劇，無聲，最多得啲轉接字幕，亦因此主要係精英文化
而加入聲音，可以講係一個超級大嘅變革——睇Jack Conrad就知，喺默劇時代係No.1 男主角，去到有聲，老尷囉，直接畀觀影嘅人笑死，而選擇走向一個悲劇——但又因為易明咗，漸漸變成普羅大眾嘅娛樂方式嘅一種，成為好多現代人嘅重要消遣活動
但又唔代表，電影唔再追求藝術或者高尚嘅，有好多導演會一直堅持自己，而唔係太在乎票房之類——正如呢部片一樣，雖然唔知一開始拍嘅時候會點預期，但肯定唔會係大眾追住睇嘅題材同表達方式

年輕人，有夢想，自信地去追夢，當然都要有一啲運氣成分嘅機遇
最開始嘅時候，Manny Torres 只係運送大笨象，Nellie LaRoy 仲係一個新人未入到去拍電影。但兩人都希望可以參與到呢個龐大而光明嘅行業：Nellie深信自己會紅，變成大明星；Manny就覺得電影好奇妙，想瞭解更多
有才華，而又有機遇，令佢哋可以夢想成真，但，當看似實現咗嘅時候，我哋有冇諗過去承受光鮮背後嘅辛苦同黑暗呢？或者噉講，大部分時候，我哋只係諗到好嘅結果而忽略咗嗰啲必然會遇到嘅其他副產品，而一旦承受唔住，就會去依賴其他嘢——Nellie喺流言同壓力之下轉向吸毒同賭錢，Manny都變得不擇手段同埋忽略其他人嘅意見感受（呢個超大嘅反差對比，因為一開始，Manny就係聽咗Sidney Palmer嘅意見做黑人音樂片而慢慢步步高升做到製片人；而最後為咗南方票房而叫Sidney涂黑啲個皮膚……），可能講到底，都係商業行為，所以無可避免地會出現呢啲問題，當一個行業因為多人睇超賺錢嘅時候，荼毒嘅氛圍都會滋生，like啲錢都好賺，心地好唔好都無關，自然好易整成大醬缸
包括話Jack接受唔到自己時代嘅結束而選擇咗完結一生，其實都係必然要承受嘅嘢：人生有起就會有落，巔峰時候有幾輝煌，跌落嚟嘅時候就會有幾痛，正如片入邊嘅影評雜誌主理人Elinor話齋，雖然佢嘅時代已經過咗，但歷史唔會忘記，以後嘅人仲可以通過佢嘅作品同佢對話

Manny同Nellie嘅故事都幾感觸，好真實……一直深愛一直幫助，係好難得，但如果結局係佢哋成功着草去墨西哥，我會覺得，只係另一個悲劇——因為只會係一個單方面以愛為名嘅救贖行動，但Nellie未接受到自己嘅演藝生涯嘅結束，即使自己毒品上癮同埋爭咗大耳窿，同埋我唔覺得Nellie真係愛Manny，而且我好懷疑Manny只係愛嗰個識發光嘅以前嘅Nellie。噉樣嘅結局，我會講係最真實，雖然唔係好嘅

最後，致敬咗成個電影史，從最初嘅火車頭，到默劇，再到有聲，都幾感觸。其實係嘅，歷史，就係靠每一個人嘅參與同推動，先變成而家噉樣，不要問有什麼意義，只需要知道，其實係已經分唔開每一個人嘅貢獻