手捲煙

一開始嘅背景係97年香港回歸前，一班華裔英兵巡邏邊境，捉偷渡者，大家嘅等級唔高，事頭婆（英女皇）冇畀佢哋去英國，面臨解散嘅命運，大家食住煙，借火機，都好惆悵迷惘。有人諗住繼續讀書，有人選擇考個警察牌，有人……

時間一下子過咗好多年，當年嘅隊長關超(林家棟飾演)負債，喺黑道靠做買賣收佣金揾食。冇乜朋友，好孤單，曾經嘅隊友疏離佢，因為佢以前同其中一個隊友買股票，好死唔死借高利貸【所以大家投資千奇要有分數，唔好玩咁大】，而股市大跌，個隊友孭唔起責任，自殺死咗【請勿模仿，人生只有一次】

南亞裔青年文尼同表哥喺香港做古惑仔，靠奇趣蛋做掩飾販賣毒品揾食；仲有一個親細佬讀緊書。佢哋喺香港呢個國際大都市入邊不受待見：當文尼同關超講自己有名and講咗個名出嚟時，關超雖然聽到，但都係照講「叉仔」；文尼細佬喺學校冇人侵佢玩（大哥細佬嘅性格好唔一樣，文尼比較內斂，雖然會講，但實際都係默默忍受；而細佬就會用更加偏激嘅方法——打人【打人當然唔啱，而且只會越加疏離。我諗，可能文尼再年輕嘅時候都曾經咁熱血咁不忿，但隨着一次次嘅被忽視之後變得冇咁着緊，相當於消極地接受咗】

所以佢哋都係同自己人羣居一齊，大哥住喺同一個社區。有一日，佢哋竟然沙胆到搶黑大佬大口泰嘅貨，文尼就被人追，巧合地匿喺關超屋企。關超見在錢嘅份上收留咗佢，嗰陣未知件事咁大鑊，對文尼亂摷自己屋企嘅嘢雖然嬲，但都忍得落，同埋回想起當年做英兵嘅日子，漸漸揾返當初嘅自己。而且幫佢接細佬並送到自己中意嘅人屋企照顧

後來關超接線嘅菜甫【冇錯，後邊仲有竹昇，致敬《大佛普拉斯》】——台灣賣走私金錢龜——因為運送嘅龜死晒而被黑大佬監生打死（呢度真係有少少唔按常理出牌，一般嚟講，喺人哋地頭唔會衝動，結果菜甫因為忍受唔到被羞辱而衝動【黑道嘅世界，真係分分鐘命仔凍過水】），而且見到文尼表哥被捉住and都死埋，自己驚了，返到去即刻趕文尼出去

不過最後都係心軟，放佢入嚟，先發現原來偷嘅毒品就喺自己屋企，思前想後，關超決定冒險賣咗佢。

喺嗰個濛濛雨交易嘅晚上，關超講：「唔講一，唔講三，講義」；「唔講風，唔講雨，唔係講錢，係講雷」。解釋咗點解自己要負責咁多年幫隊友還債，真係好有古派江湖義氣味道嘅台詞。生活係難過，但都可以挨落去。惺惺相惜，文尼肯同佢一齊食走晒煙味嘅手捲煙，關超更係將自己用咗好多年嘅煙絲盒送畀佢

唔好彩嘅係，文尼被發現，捉住咗，喺動用私刑嘅時候發現咗煙絲盒，黑大佬好嬲，威脅關超：如果唔出嚟，文尼就死硬

唔去，自己可以保全性命；去咗，九死一生。看似係一條選擇題，但其實唔係，講義氣嘅人，你話佢會點揀？咁啱菜甫嘅大哥竹昇都嚟咗香港揾菜甫，所以佢哋就一齊去到大口泰嘅基地。竹昇覺得佢哋喺度演戲，大口泰冇諗住理竹昇件事，所以竹昇就直接擝槍打人，射到大口泰手下最惡嘅小弟辣雞

大口泰驚咗，好聲好氣請竹昇唔好嬲，謊稱人係辣雞殺嘅，已經報仇，自己有意同佢一齊經營毒品生意。竹昇睇在錢嘅份上，答應咗

跟住係一段較長(七、八分鐘)嘅打鬥戲，關超同大口泰嘅手下打，一鏡到底，比較暴力同血腥【不適者睇到呢度嘅時候可以跳過】。打到差唔多，大口泰出手，準備搞掂冇晒力嘅關超，結果被未死嘅辣雞反水搞掂咗

竹昇由頭到尾都係旁觀者，睇戲，最後見到大口泰死咗，先行過去對關超講：「你哋香港人就只係會自己人打自己人」，令我十分感慨

部電影可以講係近年來少有而且拍出比較高水準嘅港產江湖片，好有味道，超正；當然，不足都係有嘅，例如樣冇點變（所以只能前邊嘅片段黑白，省化老化妝and特效錢）；有啲角色比較平面；故事交代得比較含糊不清

成個故事入邊，手捲煙係指關超keep住食手捲煙，而唔係商店可以買到嘅成煙，有一種浪漫嘅感覺；而且文尼一開始唔食，到後邊同關超一齊食煙嘅情景代表着佢哋友誼不斷升温【不過我自己超唔中意煙味】，而關超送文尼嘅煙絲盒，更係佢哋信任彼此同精神共鳴嘅具象物

女性角色少，戲份少。兩個人明明互相有好感，但都唔明説，一個一直拖，一個願意等；可能都係一種無奈，之前一身債，又點諗得咁多，但最後會點，留返觀者自己慢慢想象了

and我發現，而家嘅好多電影都傾向於少咗一類角色，that is警察，非常interesting，缺位，一直缺位，u know what i mean, right?

身份認同？「叉仔」永遠係「叉仔」，就算你識流利地講當地語言，當地人唔認你係當地人，返到家鄉都可能冇人認，邊緣人，真係好慘。幾時我哋可以建立一個沒有歧視嘅社會？

自己人打自己人，點解會噉？割席，劃清界線，互相攻擊，救命，究竟喺度做乜嘢。真係好諷刺，當初大家出生入死，後邊老死不相往來，程度講嚴重咗，其實都有往來，不過無咁老友

電影最後：

「獻給一眾為香港電影默默耕耘的人。」

「一脈相承，薪火相傳。」

真係超感動，唔使多講，期待更多有本土味道嘅電影！