殺出個黃昏

故事嘅背景係，曾經嘅三人組殺手金盆洗手好多年之後，步入咗老年生活：田立秋（謝賢飾演）靠喺麪館削麪揾食，但手腳變慢，被機器代替而失業；蔡鳳（馮寶寶飾演）有自己嘅樓同歌廳，夜晚唱歌揾食，睇上去兒孫滿堂好幸福，但實際上只係恨住嗰筆財產；葉一業同樣孤身一人，平時開貨車，得閒就去性工作者菁菁度幫襯，而且想同人哋結婚，只不過對方並冇此意。突然有一日，蔡鳳召集昔日嘅兩個拍檔，因為有人請佢哋出山

第一單係一個瞓喺病牀度嘅老女人，「食唔起藥，不如死咗仲好」。田立秋（謝賢飾演）去到先知係求自殺，落唔到手，直接離開。後尾佢哋睇到新聞話嗰個女人畀佢老公殺死咗，因負擔唔起醫藥費，蔡鳳就同田立秋講「話唔定係幫緊人」。因此，佢哋自稱「耆英天使」，周街貼傳單，給孤苦無依或百病纏身嘅老人一個自願上黃泉路嘅機會

呢個係部電影獨特嘅地方所在，佢有關注而家嘅老年人嘅狀況，但又唔至於太過傷感，總體係以喜劇嘅基調出發。我覺得呢一點處理得好好，唔過分渲染有幾慘幾可憐，但足以引起觀影者嘅注意

而有一次，田立秋如平日一樣去執行「耆英天使」嘅任務。結果發現係一位年輕姑娘屈紫瑩想自殺，跟住連忙話係入錯房認錯人急急腳走（攞埋女仔部手機，因為影咗佢個樣，（自己唔識點刪，個女仔唔肯自己刪），就好真實，好多老人家唔識用智能手機），點知個女仔一路跟住佢返屋企，死纏爛打都唔走，噉就唯有收留佢了，慢慢相處以後有咗感情，關係就同真嘅爺爺同孫女差唔多。後尾發現個女仔想自殺係因為大咗肚，但係個賤男根本未知佢有咗就飛咗人哋跟住揾過第個（emm，「啪完玩失蹤」，真係賤到仆街

老年殺手三人組就諗咗個辦法，黑社會做法：武力施壓，逼個男仔飛咗個現女友，重新同紫瑩和好。紫瑩好唔捨得，但都係離開立秋屋企去同個衰人住

完成任務之後，立秋失去咗親人（孫女），重新變得孤單；一業日操夜勞入院之後再出嚟（公立醫院排隊好鬼耐），送錢畀自己中意嘅女仔菁菁做嫁妝跟住就離開，傷心地不易久留，於是去咗第度。。幾幽默；而蔡鳳最後都係妥協咗，答應賣咗層樓同歌廳，畀孫仔買學區房，自己就去養老院。。其實大家都唔好過，老咗之後，一係孤身一人；一係冇咁健康同愛情（所以要把握好機會，唔好臨老至後悔）；又或者就算有兒孫，都唔一定係孝順自己嘅。佢哋有做錯啲乜嘢？冇，唔係因為佢哋以前做過殺手所以畀天收，呢個就係普遍老人嘅命運，幸福嘅係少數，連富豪都會冇一個孝順仔女而求死就知道了：「佢哋寧願唔瞓都要夜晚坐飛機去玩 叫佢哋嚟探下我 仲嫌路程太遠」

但好景不長，人渣始終係人渣，勉強冇幸福。冇幾日就煩咗紫瑩，諗住帶佢去墮胎。為咗防止老人家干預，派咗兩個打手去立秋屋企。。。超搞笑，殺手老咗一樣可以一對二，派兩個靚仔打手果然夠幽默

於是乎立秋搞掂嗰兩個靚仔之後，馬上call自己嘅兩位拍檔，趕往現場（今次係佢學識用追蹤手機定位揾紫瑩），搶喺手術之前救出紫瑩。而一業為咗拖住兩個差人去襲警，跟住食皇家飯，「好食好住睇醫生唔使排隊」

結局都算温馨：紫瑩決定生BB出嚟，蔡鳳住埋入去，一家四口，兩老一母一細路嘅小日子

人老，係一個無可避免嘅事情；我哋雖然冇辦法逆轉呢個過程，但我哋可以更加關心佢哋，瞭解佢哋嘅物質、心理需要。人老唔等於就冇用，唔係「負資產」，需要人照顧。有人話，老人就好似細路噉，我嘅理解係，佢哋同細路一樣有需要有情緒，而且好容易就抒發出嚟，所以做家人嘅、做鄰居、做朋友嘅，其實更應該體諒佢哋，大家都會開心啲和諧啲

反面教材，蔡鳳個仔：「係你將我生出嚟嘅，唔使你嘅使邊個嘅，有本身塞返我返去，都唔知點做人老母嘅」。睇到嘅時候超嬲同悲哀

「人生匆匆就係等敲嗰下喪鐘。就算兒女成羣都仲有一個係瘟神。」，就好似主題曲噉：

要自信要熱情沒悲傷

擁抱 青春

一起飛奔去要發亮

不怕流淚 沒擔憂 沒發愁