crazy dream

聽講有人諗緊點解我唔係而家高考。於是乎日有所思夜有所夢，發咗個超神奇嘅夢……我自己起身嗰陣都覺得好癲

係噉嘅，有日醒咗之後再瞓返，唔知係咪因爲驚遲起身嘅話會誤咗上堂時間，就發咗個噉嘅夢：

夢入邊我返返去高中時代，喺宿舍瞓緊，跟住醒嘅時候發現宿舍冇晒人，就喇喇聲起身，喺衛浴度刷牙（……至於點解唔喺陽臺刷，可能怕俾人睇到）。跟住邊刷邊喺度諗：死喇，今朝要考中文，8點開考，我實趕唔切，點算好吖，不如就噉暱埋喺度算？逃避可恥但有用……
話說喺衛浴諗東諗西嘅時候聽見宿舍門俾人打開，仲諗緊係宿管定係中文老師嘅時候，一眨眼返到去自己屋企（我自己都覺得不可思議，但發夢嗰陣又唔覺有乜問題），時間一樣係早晨，不過時間早啲，準備送細妹返學。呢度就真係完全錯亂晒，因爲我自己讀高中嗰陣，細妹都仲係就近讀書，唔使我送；而有得送都係之後嘅事。不過夢嘛，唔符合邏輯都正常。而我嗰陣突然意識到，咦，時間好似早咗，應該可以趕得切考試喇！

跟住就醒咗，都幾神奇下

如果搵人嚟解析一下呢個夢，可以點解呢？嘗試剖析一下自己：

想物理上返返去高中時代，好明顯做唔到；但心理上係想返去嘅，原因嘛，當然唔係當時好好，或者自己想再經歷嗰段時光，而係，想更加接近呢種狀態同心理，因爲目前都唯有喺夢中靠近

呢種一日日倒計時嘅壓迫感又真係好惡頂，醒嘅時候都驚有冇畀咗太大壓力，if so...真心sorry

我又確實唔算話太勇敢，尤其喺心理上，反而外界啲困難好少擊倒得我，所以都係要尋求避風港，就會喺夢入邊返到屋企

而家嘅我堅定咗唔少，有咗更明確嘅目標同希望，所以夢入邊唔係話搞唔掂收科。不過都希望自己更加有勇氣同埋畀多啲心機努力堅持，把握好機會唔好浪費。既然想做同埋有盼望，做咗先算，而且都實在唔想去諗會唔會有其他結果，因爲最終係點自己都係會接受，只不過有冇咁開心嘅分別