著PRADA嘅惡魔 The Devil Wears Prada

睇住直播，心噏之餘，因爲終究揭開真相，燭光有罪

所以都係做啲嘢調解下，就分享下呢部電影

呢部絕對都經典，細少少嘅時候睇一種感受，而家再睇又係另一種感想

人嘅目標同埋路徑，有時可能會忘記咗。一開頭，Andy 諗住忍受做「女惡魔」Miranda一年助理嚟作爲跳板，成爲自己夢寐以求嘅記者或者作家。但既唔識時尚，又厭惡嘅情況下，又有乜可能做得好呢？所以一直畀Miranda同第一助理Emily嘲笑同責罵。之後Andy開始接觸同follow時尚，進而可以提前知道Miranda嘅需求並完成，就漸漸得心應手——畢竟係醒目女——只要肯去瞭解同動腦，呢啲嘢難佢唔到。之後更成爲咗第一助理。
但，已經偏離咗最初嘅目的。冇錯，需要承認，作爲跳板呢種諗法基本上冇可能work，太幼稚，有乜可能唔想做嗰份工，跟住唔去瞭解相應嘅知識同老闆嘅諗法就做得好嘅呢？唔好話一年，可能一兩個月就畀人炒魷——尤其好多人都想做呢個位。而加入咗之後，就肯定要改變自己先做得好份工，個關鍵係，要變幾多？Andy喺慢慢學識時尚同老闆心思之後，亦都漸漸變成自己唔中意嘅人——同知名作家關係曖昧、親口同Emily講自己要取代佢參加巴黎晚會——一開始其實唔明顯，如果唔係男朋友或者摯友只係普通人，可能仲會覺得會好咗靚咗前途無量之類。我最初睇嗰陣都覺得，係Andy嘅男朋友Nate唔理解佢，過於市儈阻住佢「發達」，但實際上，Nate喺分手嗰時有講清楚佢唔在乎Emily由討厭到中意份工、由唔點打扮到日日着得好靚，佢在乎嘅係，Emily已經失去咗自己嘅自主性同思考能力，全部嘢圍繞住Miranda嚟轉，好多時候唔係「冇得揀」而係佢根本冇諗過要認真拒絕——只係話噉樣唔係好好，自己有其他嘢做之類，但，冇講過一次No（除咗有一次知名作家晚會之後約佢傾下佢之前啲稿say no之外），亦都係我一開始覺得Nate做得好差嘅原因——但有時迷失咗自己之後，最清楚明白我哋嘅就係身邊嘅人，亦都只有佢哋睇得出光鮮亮麗之下嘅真實情況。
都好在Emily其實做唔到噉樣，當佢清楚地認識到要好攰、殘忍冷血之後，就知道自己嘅善良令佢唔想過噉嘅生活，於是浪子回頭，做返真實嘅自己，最後係happy ending

對事情先入爲主好多時都係錯誤。一開始，Emily對時尚冇任何認識，覺得其實無太大分別，都好靚，嘥好多錢等等。但事實上，即使係佢着住嘅好普通嘅藍色褸，都係時尚嘅產物，先至慢慢將呢隻色推廣到日常衫嘅色。所以，如果我哋唔識唔明，就唔好下判斷去評價。可能我哋覺得好普通好溼碎嘅嘢，喺識嘅人睇嚟係好有意義影響好深遠
又比如話，大家都覺得Miranda係衰人，喺佢手下做嘢只會又辛苦又無意義。但其實都學到好多嘢，比如話抗壓（雖然片入邊好多都係過界上升到傷自尊）、一時多用、察言觀色等等。而且最後Miranda都係叫報社一定要錄取Emily，儘管自己覺得佢唔係一個好員工，喺見到Emily做返自己之後都開心，因爲Emily好可能就係自己嘅另一個人生，Miranda認爲自己同Emily好似，如果當時Emily選擇跟住自己參加巴黎晚會嘅話，佢哋嘅路徑就會變得相似

兩性平等。真係講極都未到可以唔講嘅一日。同爲女性，Emily當然會爲Miranda打抱不平：「如果佢係男性，人哋就只會讚佢認真負責有事業心」。但如果係女性，就當成惡魔、脾氣差、照顧唔好家庭之類。而亦都因爲噉樣，要更加殘忍同有手段，先可以得到&保護到自己嘅位置，即使係比其他男性更有能力。是否有一日，成個社會可以將呢啲觀念都扭轉過嚟？希望如此，亦都需要我哋不斷努力，期待有一日，當我哋睇到類似片段嘅時候，我哋唔係感同深受，而係「以前會有噉嘅情況，但而家邊可能仲會發生」。

最佳嘅關係，都係一齊變得更好。唔一定係好遠大嘅目標，畢竟每個人嘅情況唔同，但如果係走向更美好嘅明天，就一定係好事。Nate循序漸進，鑽研烹飪，做到一個餐廳嘅主廚；而Emily都終於行返自己嘅理想職業做記者，儘管未來唔會一帆風順，但兩個人價值觀同人生理想追求都相一致，相信係會更好，如此人生，夫復何求