陌生人：對話聖戰分子

其實標題有諗要唔要加個柴靜，因為呢套紀錄片比較重佢個人嘅位置同感受，不過最後都係決定唔加，始終未話去到咁有個人特色嘅一部片

拍片動機第一集已經詳細講咗，17年過到去西班牙，就經歷咁嚴重嘅恐襲，出於記者嘅職業同責任，開始追蹤跟進相關新聞，之後開始深入探索呢個話題，試圖搞清楚其發展嘅脈絡同當事人嘅心路歷程

須知，羅馬並唔係一日就可以建成，17年嘅西班牙，係模仿15年法國「查理週刊」恐襲，而21世紀，法國就係歐洲恐襲嘅大本營，恐襲不斷發生，而西班牙、英國、德國等都有發生，而再追溯落去，就同各國嘅反恐力度措施，情報共享同埋一開始對恐怖言論嘅容忍等有極大關聯
而歐洲已經失去咗最佳嘅防範機會，想要可以精準追蹤同掌握各地嘅恐怖分子情況，難度極高

至於人員組成方面，係都有：貧困階級，中產同埋知識分子都有，而我自己覺得（係個人觀點，not fact check），知識分子最先淪陷，跟住再到貧困成日搞搞陣惹事嘅，再之後以家庭親友輻射
點解我會覺得知識分子係先嘅呢，主要因為一開始，被容忍嘅聲音係始於校園同電視，同平常人嘅生活其實都好遠，就算有畀吸引，都冇人帶住教壞，無理由一次演講就可以成功轉變到一個人㗎，如果冇後續嘅話；而知識分子高學歷本身就會有少許同情心，而且可以去睇由中東出版嘅相應著作，會更快接觸到完整而嚴密嘅宗教世界。需要講嘅係，大家唔好以為一定係冇腦或者點先會信，因為呢，如果唔睇其他嘅嘢，佢自己個套係自洽同完整嘅……至於點解真係唔睇或者唔信其它嘢，係幾難解釋嘅，只能講，當一個人認定一樣嘢會堅正確，另一樣嘢超邪惡嘅時候，係冇得救，因為已經自我暗示自我催眠咗
跟住就開始咗利滾利，有啲知識分子去咗參與聖戰（基本死晒），而有啲就變成傳道者，專門揀一啲有違法犯罪嘅，或者內心好迷惘苦楚嘅嚟傳教，宣揚「自殺落地獄，為聖戰犧牲上天堂」等屈曲原意嘅教義同口頭承諾。呢一點我覺得非常妙，因為讀過書，所以宣傳起身同埋完善邏輯方面更進一步，亦因此更加吸引人，用自己內心嘅恐懼去觸發聽眾嘅恐懼嚟令佢哋更加深信 or 懺悔而覺得走頭無路，最後以為得返為聖戰而死嘅一條路，就……

無論幾十惡不赦，其實都係人，有情慾，有痛苦 ，有怕醜……嘅一面。令人變成惡魔嘅，正正係將其他人唔當人去睇。咩女人吖，非教徒異教徒吖，另一派吖等等，全部都係財富奴隸或敵人，自己係高一等嘅，所以乜嘢事都可以做，之後就出晒事喇

前邊有講到歐洲已經畀滲透得好嚴重，但係咪就等於無計可施，都唔係嘅，有幾個值得感到樂觀嘅理由：

第一個，唔係信或者唔信，都唔係信邊個教，亦唔係信邊一派嘅問題，個問題在於，應該點樣理解經文？喺當時係先進思想，到咗而家就唔係噉講，就好比一百年前單單係畀女性平等工作機會就係進步，到而家，選票、工會、當選代表等等都要跟上。因此，要結合當時嘅背景去理解同信仰，故事可能係當時真實發生嘅，但佢嘅用意係要你明白真正想講嘅主旨或道理

第二個，我哋都知道係點樣開始滲透嘅，所以下一步重要嘅係，我哋都需要深入去到每一個人，喺佢哋有疑惑嘅時候提供解答，或者提供類似嘅途徑 or 方法，畀佢哋知道，佢哋唔係得一種選擇，同埋，唔單止要自己去思考，更重要嘅係，學識獨立思考，提問並獲取多方資訊，觀點並不珍貴，從古至今，要觀點思想大把，各式各樣都有，但都係人哋嘅嘢，自己嘅一套，應該係要先瞭解百家之後再走出一條自己嘅路

第三個，因為科技嘅發展，要追蹤預測一班人嘅成本會不斷減少，直至可以全面推行，不過呢，到時候就係另一個問題（且已經發生過）：以反恐為名義嘅全面監控，係咪我哋想要嘅呢？

最後，當所有人都明白佢哋個套係點樣運行之後，自然就識得點樣去抵禦，因此，衞教都係非常有效嘅方法，畀家長、教會教堂、社區等等構建好一套完善嘅機制