新活日常 Perfect Days

先講下譯名。如果從本名"perfect days"直譯嘅話會係「完美嘅日子」，而香港係譯作「新活日常」，都幾有意思，故事講嘅係公廁清潔工平山嘅日常生活，雖然係日常，但每日都唔平常，會有新嘅事情發生，由此感受到美好，所以呢個譯名幾正

同埋導演兼編劇Ernst Wilhelm "Wim" Wenders嘅節奏安排得好好，例如喺後邊先自然地話畀觀眾知嗰個地標係晴空塔，交代平山以前嘅故事等等

平山過嘅係一種好懷舊普通嘅日常生活，工作日晨早淋花草，買咖啡返工，盡心盡力地清潔公廁，偶然地同他人接觸，有好有唔好：同另一個幫手傾偈、落雨天喺出邊等急住用公廁嘅人、隔日喺白紙上同陌生人玩tic-tac-toe、敎外國人點用透明公廁、氹揾唔到媽媽嘅細路但畀其母親厭棄指責……中午喺樹下食晏睇好靚嘅光葉影同時影低落嚟，放工之後去浴堂洗身浸浴，之後去地下通道/地鐵站嘅一間熟人店食飯，返屋企睇陣書之後瞓覺；休息日就去自助洗衫鋪，買菲林沖曬相，買書，去另一間女店長熟人鋪食一餐好嘅
完全冇智能電話，聽磁帶唱片，用菲林相機，喺2020s都幾難想象到有人仲係噉樣生活嘅，但，我自己一邊覺得神奇，一邊都幾羨慕，簡簡單單，而又好滿足快樂，唔係都好好咩

當然，平山噉樣都係自己嘅選擇，我哋可以從佢妹妹推測佢出身於一個比較上流嘅家族，因此都養成剃須睇書聽英文歌嘅習慣，只係作出噉嘅選擇之後得唔到屋企人同他人嘅理解（除咗侄女），甚至有刻板印象覺得唔乾淨好污糟折墮之類，所以就冇點再同人交流，除咗熟人或者有同樣感覺嘅同路人。但佢點解會咁迷戀光影、同埋以前究竟發生過乜嘢，就只能靠觀眾去諗

作為對比，平山一開始嘅搭檔タカシ嘅故事都幾有意思，真實地刻畫咗現代年輕人嘅困境：冇錢又點交女朋友呢？係要冇咁多物質欲求先可以喺呢個快節奏、物質社會度慢而快樂地生活

「下次係下次，今次係今次」，無論如何，珍惜好每一個時刻，可能就會覺得，我哋都係生活好富足嘅人~