從前的我們 Past Lives

先問一個好老土嘅問題：人點解要睇電影？可以由第一幕嚟答一下：

呢三個人，就噉睇無聲片，知唔知佢哋嘅關係？yep，電影就係充滿無盡可能性~

可能喺埋一齊，結婚之後，就會有呢個疑問(?)：究竟係浪漫定係無趣？
相比起Nora廿四年前嘅初戀Hae Sung從首爾飛到紐約只為咗見一面，Nora同Arthur嘅故事似乎好平淡，就正如佢自己似開玩笑噉講：自己就係嗰個拆散佢哋嘅壞男人

噉Arthur係咪咁渣斗？of course not，佢哋兩個都係作家，有相同嘅興趣同價值觀——當Nora十二年前興奮地問Hae Sung有冇睇最近上映嘅一齣戲時，雖然Hae Sung事後有補睇，但都係遲咗，而且可想見佢哋都冇分享各自睇完嘅感受——儘管異地戀嘅話應該都係攞啲嘢嚟分享嚟講嘅日常，不過唔啱頻道嘅話，始終都係少咗啲意思；Arthur更瞭解Nora，而Hae Sung對Nora嘅印象仲留喺最初嘅細路女Na Young，比如話Nora更似一個美國人而唔係韓國人，更加地現實而唔係繼續追逐攞諾貝爾之類嘅獎；基本上Nora嘅嘢都會同Arthur講，彼此比較坦誠

但點解Arthur仲係會噉諗？係乜嘢令佢冇安全感？首先係，佢自己發覺Nora都有佢自己唔知道嘅地方，比如話夜晚發夢時都係講韓語，而佢好多時都唔明，所以就想學多啲韓語——不過呢，我自己覺得，每個人都係要有自己嘅私密同空間，唔需要咁糾結，而且好多時本人都未必知道自己咁多，就更冇可能分享到出嚟；不過正如Nora所講，只需要知道Nora愛佢同埋唔會放棄所有嘅呢一切同Hae Sung私奔，就足夠了。另外就係，兩人約會時都會有恩愛同嘈交嘅時候，同埋未試下一齊坐渡輪睇自由女神像，而Nora以為去過——都唔出奇，唔係咁特別，畢竟其實日日都有睇，唔使專登去，有其他浪漫嘅事有一齊經歷過，所以Nora先會噉以為。最後就係因為實在都比較平淡：只係因為兩人都喺紐約，去同一個地方駐場寫作，興趣價值觀等等又啱傾，Nora又想快啲攞綠卡，就好快地結咗婚……——都可以用另一種角度嚟睇，呢個係幾細嘅機率，先會全部符合到，所以真係幾有「因緣」，儘管Nora話自己唔信因緣，只覺係韓國人調情嘅説話啦

所以呢，其實係唔會有完美到超適配嘅關係，但呢啲都唔係破局嘅因素，要喺埋一齊嘅，一個理由就足夠——因為愛；而分開嘅話，就可以有一大堆理由，其實歸根到底都係冇咁愛了

我自己係比較中意Nora同Hae Sung見面之後，返去同Arthur好坦誠熱烈地探討，呢種係比較健康同可以好耐久嘅關係，好正——無論以前發生過乜嘢，想分享嘅都分享過，唔係收收埋埋；而家嘅關係同感情都瞭然於心

就同Hae Sung同佢嘅前女友有比較大嘅反差，認為男人唔夠成功就唔應該考慮組建家庭嘅自卑有害觀念……究竟點樣先叫成功同埋點解要噉嘅成功先可以呢？

過咗去嘅，都係一種經歷，不斷地影響同塑造而家嘅我哋。冇話一定好或者唔好，只係曾經嘅遺憾，都係會想可以彌補到或填充返；當嗰一刻發生咗，我哋就會覺得，自己變得更加地完整同滿意——致所有向前行緊嘅大家