我的八爪魚老師 My Octopus Teacher

好治癒嘅一部紀錄片

因為影片本身就係治癒主角Craig Foster嘅過程：佢喺長期嘅拍攝剪片工作攰到大病，無法再掂相機同工作室電腦，而兒時嘅淺海之旅令佢向往接觸返大海，期間偶遇一隻八爪魚，同佢產生連結，得以重拾相機記錄低呢段唔太長但難忘嘅陪伴

八爪魚，一種海洋軟體動物，觸手上佈滿可以獨立控制同感官嘅吸盤（聽過有人話係佢嘅脷，所以接觸嘅時候喺某種意義上係食緊嘢，睇嘅時候諗到呢個講法笑咗

要接受咁多嘅感官，所以都有比較高嘅智能，喺影片入邊我哋都睇到，佢學識點捕捉龍蝦（乜都食得真係正，海鮮大餐）、畀鯊魚咬到嘅時候甩觸手保全自己，利用石頭同貝殼保護自己唔畀鯊魚食，喺緊急時刻吸喺鯊魚背脊上……really amazing！

而有智能，就會有好奇心同學習能力，所以願意接觸Craig Foster，畀佢一齊同自己行動，探索呢個淺海世界。諗緊呢，非社會性動物雖然唔會同同類一齊生活，大多數時候都係獨來獨往，但唔代表佢哋唔需要其他生物，捕食被捕食爭食呢啲唔講住，八爪魚喺唔需要進食嘅時候同一班魚一齊玩，某種程度上都係一種滿足，同呢個世界接觸交往嘅需要

亦都呼應Craig Foster從呢隻八爪魚身上學到嘅：

我哋係環境嘅一部分，而唔係訪客

生物各有自己嘅模式，似八爪魚噉嘅生命短、過得快，而人類相對就比較長，要諗嘅嘢都多咗，但都要記得可以從其它嘢嘅角度去諗，例如從八爪魚嘅角度去思考

最重要嘅，係要揾到適合自己嘅位置，想做乜嘢，可以做乜嘢，就好似Craig Foster想做一個好爸爸，但病重冇晒心機嘅話就等於完全搞唔掂，有時做唔到唔等於真係冇晒辦法，而只係可能未揾到相對應嘅規則同力量，兒時嘅記憶已深藏治癒嘅藥方，呢種不期然嘅收穫，大概都會令人感到有希望啩