孖展風雲 Margin Call
Contributors to Wikimedia projects
唔知點解到而家先睇呢部電影，可能係一種緣分？唔係好記得今年年中因為乜嘢又見到呢部電影嘅名，跟住就 mark 低咗想今年睇。亦都有唔少嘅思考，confirm 到同埋加深我對呢件事嘅一啲理解
簡單嚟講呢部電影講嘅係 2008 年金融風暴前夕，某間投行將好多人一早就知嘅風險量化咗出嚟，結果就係泡沫破裂
循例講句，以下內容會有劇透，敬請留意
影片一開始就畀我哋睇到華爾街嘅競爭壓力之大，都好正常，高回報等於高風險，股票債券係噉，工作亦係噉，能夠留低落嚟嘅，「一係識得呃，一係聰明醒目過人，一係做事快人一步」
而且畀人炒嘅時候係毫無尊嚴可言，話係可以考慮一下，其實就已經默認接受，執好自己嘢，一出公司門口連電話號碼都 cut 埋……員工真就只係工具，用完即棄
另一方面呢，亦都有好好嘅下屬，所以都係嗰句，只有人先至係有温度嘅
唔理係一開始畀人炒嘅嗰位好叻嘅成功破解模型嘅下屬，喺上司畀人炒嘅時候表示自己嘅感激同難過，並因此得到上司未整完嘅交託畀佢嘅工作
定係風險部嘅頭因為沖撞 大boss 而可能有企邊問題，自己嘅下屬喺樓下畀 大boss 身邊嘅紅人挑撥，都一樣企喺自己嗰邊，「方向同諗法係一樣嘅」
包括話最後風險部嘅頭喺清盤之後應承為咗錢繼續做落去，雖然多多少少有被逼無奈嘅方面，但亦都表明自己忠心
呢個都係可以快速得到晉升同埋賞識嘅方式，因為大佬最缺嘅唔係聰明人，而係同自己諗法一致、就算自己唔喺度都可以照樣執行自己諗法嘅下屬，就正如 大boss 身邊嘅四十歲紅人，佢哋諗嘅嘢就係完全一致
片中最值得講嘅就係，點樣一樣大家都知道有風險有問題嘅嘢，可以一直流通咁耐，以極度超越合理程度嘅回報率不斷交易？
問題係因為搞金融嘅人就係咁衰，呃呃凼凼？唔否認係有噉嘅人，但主要問題唔喺呢度。講到尾，係人自私貪婪嘅問題：
佢哋（投資者）睇住一堆唔明嘅嘢，話係話上當，但如果唔係呢啲「生錢產品」，佢哋點過得起咁快活嘅消費主義生活？見你生到金蛋嘅時候就一堆人埋嚟，唔識都照嚟，唔理噉樣係咪唔公平，反正自己過好就得；一旦知道隻蛋係假嘅，就追住打，話自己傾家蕩產乜都冇晒
算搞笑，係人都知天下冇免費嘅午餐，如果唔係好多人都有極度膨脹嘅消費心態，又點可能發行到咁大量嘅評級好好但實際劣質垃圾嘅組合型證券？
就正如最後 大boss 話齋，佢哋都只係為咗賺錢啫，佢哋嘅客户想要乜嘢，佢哋就會提供乜嘢，而成個遊戲本身就係唔公平㗎，有贏家就會有輸家。你今日辛辛苦苦借房貸，聽日經過包裝之後就變咗人哋枱面上賭輸贏嘅嘢，永遠都係冇錢嘅底下人蝕底
好多人會話，點解政府要救呢啲投行，點解呢啲「無良人士」可以拎咁多錢拍拍籮柚走人？而且佢哋本身就已經好高人工啦喎。因為確實冇可能唔救，唔救嘅話，成個經濟機制都會崩壞；而入邊嘅員工好難講佢哋冇錯，但亦都係佢哋幫手穩住咗局勢，包括話危機之後繼續買入（因為市場恐慌嘅情況下會有賤賣嘅情況，所以需要醒目嘅人去「尋寶」，慢慢恢復返市場規模
而改變，亦係冇乜希望嘅事情，儘管近年嚟有佔領華爾街嘅運動，但本質上都係冇改變嘅，呢個遊戲唔係華爾街嘅錯，而係大家嘅錯，只要人一日追求高回報賺大錢，就一日會有呢個遊戲；即使冇咗華爾街，一樣會有其他嘢存在（甚至而家有啲銀行會極力叫你投資啲乜嘢……諗下都幾得人驚下，唔係反對，只係想叫大家問清楚風險究竟有幾多先再考慮
好多時候，要堅持良知同初心真係好難……
所以，如果真係想，就應該一開始就唔噉樣做；一旦做咗，一般冇乜可能返到轉頭，只係時間嘅問題——人始終都係好難分裂到，所以會慢慢被改變。再到嗰陣時矛盾同痛苦？都係一早唔制好過！
評論留言区