吉拿域·戴拖路之皮諾丘

今日都幾特別，好多嘢撞埋一齊

anyway，講返正題，今晚睇咗呢部電影，感覺好正，所以嚟分享一下

故事講嘅係一位木雕大師 Geppetto，晚年得兒 Carlo，妻子過身，視仔為寶。但好景不長，一戰爆發，冇生眼嘅炸彈炸死咗 Carlo，自此鬱鬱寡歡，荒廢自己嘅木雕事業，用酒麻痹自己，每日去仔個墳頭以淚洗面
好sad，戰爭就係唔好，就係壞嘢，發動戰爭嘅正一仆街，尤其見到 Carlo 喺教堂畀炸死，更加記得返烏克蘭被炸嘅教堂，已經一年有突，卻遲遲睇唔到普京等中意戰爭、視同為人類嘅兄弟姊妹為敵人嘅粉腸落地獄，更加唔知道呢場災難幾時先完，sigh

Carlo 唯一嘅遺物——松果——喺佢嘅墳頭長成一棵又高又實淨嘅松樹。所以 Geppetto 喺長期得唔到主嘅回應嘅失落之下，借住酒興斬低棵樹嚟再造一個 Carlo 嘅木偶

luckily，精靈之神要管呢啲「閒事」，關心被遺忘嘅事同人，所以賦予木偶以靈魂同永恆嘅生命，帶畀 Geppetto 歡樂，不再孤單，並幫佢取個名叫 Pinocchio——因乜解究呢個名：「皮諾丘（Pinocchio）嘅名係由兩個義大利文名詞pino（松樹）同occhio（眼睛）所組成，呢個組合字喺義大利西部托斯卡納地區嘅佛羅倫斯方言中嘅意思為松果」（From Wikipedia）

當 Geppetto 第二日睇到嘅時候，成個人傻咗，矢口否認 Pinocchio 係自己個仔，但面對鎮民嘅恐慌同仇視嗰陣，都係第一時間維護 Pinocchio
sometimes，人嘅恐慌係對未知事物嘅唔安心，同樣係木製品，木製嘅聖子耶穌就人人崇拜，Pinocchio 就唔得人中意，其實完全唔理性，甚至可以講係神經質

但天真而且貪玩嘅 Pinocchio被馬戲團拐去做「大明星」，更死火嘅係仲懵盛盛噉簽咗賣身契，違約就要孭成身債……Geppetto 喺失望激氣之下講 Pinocchio係burden，儘管有蟋蟀嘅安慰，知道爸爸只係講咗當下嘅氣話，唔係佢嘅原意；但佢都係決定自己為自己做過嘅嘢負責，跑返去馬戲團打工賺錢，自此四處演出，日夜掛念父親而不見

另一邊廂，Geppetto 瞓醒之後唔覺意噉講咗"Pinocchio, my son"，只可惜太遲，Pinocchio 已經離開咗
其實時間真係唔多，如果收收埋埋，可能到自己有勇氣講出嚟嘅時候就已經太遲。就好似女死神所講嘅，每一日可能都係最後一日，所愛所關心嘅人可能會突然就走咗冇辦法再相見再相聚

Geppetto 知道自己唔可以再好似失去Carlo 嗰陣時一樣只識抱怨同悲傷，決定追隨馬戲團揾返 Pinocchio，但喺渡海嘅時候被鯊魚吞入肚，只能苟活於人世，並抱有少少可以父子團聚嘅希望
人未到盡頭都仲可以變好，我哋睇得出 Pinocchio 嘅誕生令到 Geppetto 有轉變；反觀現實世界，好多倚老賣老嘅老人、仲有未老就已經好為人師點人做嘢嘅人，佢哋不求進步，實在難以中意佢哋；而我，我哋呢？其實都一樣，人係好懶㗎，所以要時刻提醒自己，唔好做咗自己討厭嘅人，just keep going， being better than before

而 Pinocchio 慢慢發現馬戲團狐狸團長 Volpe 根本冇寄錢畀爸爸，而且㗇㗇霸霸，虐待自己嘅隊友 Spazzatura；於是挺身而出保護 Spazzatura；並喺表演畀元首時故意搞怪，侮辱軍隊同領袖，結果畀打靶，又死一次
呢段我幾中意，我哋原先都話 Pinocchio 好細，唔生性唔識睇人，但喺馬戲團嘅呢段時間，佢越嚟越體會到人類情感嘅珍貴，能夠共同相處陪伴嘅難得，而且喺Spazzatura 嘅引導下識破 Volpe 嘅真面目，最後選擇喺最重要最難得嘅機會反抗同報復，實在令人興奮。為後邊 Spazzatura 選擇棄暗投明、救 Pinocchio 亦埋下伏筆
Volpe 都將剝削嘅本質表現得淋漓盡致：「係，係講五五分；嗱，呢個係賺到嘅錢，我一半，你一半，不過，要扣除道具費、交通費、宣傳費等等，而且係喺你嗰份度扣，最後……係喇，你嗰份係0」所以剝削一定係明住嚟嘅？喺一啲死角位先發力，好少人會睇得出，因此做帳真係有好大嘅空間
而且電影戲劇地將元首畫成好矮，同其他地方有好強烈嘅對比：馬戲團團長好高，鎮長又好高；得呢個元首係豆丁，所以真係要反思，元首或者話國家領導人究竟要點樣嘅人做先合適，我哋如何分辨係煽動愛國民族情緒定係真係有自信而且足夠強大？又點解好多人都盲信權威，崇拜咁矮嘅元首？

死過返生嘅 Pinocchio，發現自己畀鎮長同一班包括佢個仔 Candlewick 嘅青年一齊帶去「愛國精英訓練」，訓練成為真正嘅士兵。入夜，Candlewick 講出咗自己嘅自卑同害怕，而 Pinocchio 都對當初蟋蟀嘅話有咗更深嘅體會，加入自己嘅理解嚟安慰起Candlewick，"You know, all fathers love their sons, but… sometimes fathers feel despair, like everyone else. And they say things they only think they mean in the moment. But with time, they learn they never really meant it at all. And they may even call you ugly things like a burden or a coward, but inside… they love you."。兩個人成為好朋友

喺分組對抗嘅時候，Pinocchio 同 Candlewick 同時登頂，於是選擇合作雙贏。但鎮長唔滿意，命令 Candlewick  攞真槍殺 Pinocchio，「搶返」屬於自己嘅榮耀，Candlewick  唔制
佢都有咗轉變，知道自己唔再係孤身一人，自己可以有勇氣同父親say no。好不幸嘅係喺法西斯嘅洗腦下鎮長已經成為戰爭嘅狂熱者，所有對戰爭冇幫助嘅都係佢眼中嘅蠢人同懦夫，可見人如果失去咗情感同理性之後，會變得幾可怕，完全變成機器下嘅螺絲釘，冇自己嘅意志，活着但都只係僅僅活着

最後，Pinocchio 終於同爸爸喺鯊魚肚入邊團聚，並靠 Pinocchio 講大話之後鼻哥會伸長嘅特點成功甩難。但佢哋再次畀鯊魚追趕，情急之下Pinocchio 引爆魚雷，自己又去死神度報到。但呢次好唔同，因為時間緊急，唔快啲嘅話 Geppetto 就好可能浸死。但規則係規則，打破咗就要付出代價——Pinocchio 得返一條命。猶疑咗一陣之後，Pinocchio 選擇打破，返返去及時救起爸爸，不斷托起佢畀佢呼吸，但自己都因為噉而缺氧死咗……
規則就係規則，打破就要有代價。以前嘅Pinocchio 從來未真正自己承擔代價：唔聽話跑去教堂，係爸爸維護自己；無啦啦簽咗賣身契，都係爸爸選擇要自己孭債而唔使佢，只係後尾佢自己又跑返去個陷阱度，仲要搞到父子冇得一齊生活。呢次就真係佢自己選擇打破並承擔後果，而且我好中意呢個要自己親手打破嘅設定——唔係話Pinocchio同死神講要打破就幫佢打破，而係要佢自己諗清諗楚，自己敲碎個沙漏先得。好多時，我哋都希望可以改變惡法，打破規則，但講真嗰句，我哋有幾想呢？同埋我哋是否願意承擔帶嚟嘅後果？It's quite hard to think about, but it's the only way to make it happen. 真係要諗清諗楚，唔係只係講下就算；我哋係咪真係想掌握自己嘅命運，而唔係繼續靠其他人嘅施捨可憐？此時此刻，又諗起「如果，命運能選擇……」

最後嘅最後，好在都算happy ending。確實得一條命，但因為精靈之神應承咗蟋蟀一個願望，所以得以死過返生。Pinocchio 可以做自己，而唔係第二個 Carlo；其實獨一無二先至係最好，而且，只要有愛，係咪 Carlo 有乜咁重要呢？最後所有人都離世，我哋嘅Pinocchio ，佢會去做乜嘢呢？呢個咁大嘅世界，我估，佢一定已經成長為一個真正嘅男仔，觀察呢個世界嘅同時做緊好多好事！

今日確實幾特別，自己知道就好，gonna to have an end！and ready to start！講過無數次，亦唔會係最後一次；希望自己真係可以生生性性，做少啲傻事錯事，尤其係已經做過嘅、講過要吸收教訓嘅事；一日一日地堅持，變好。呢個係我可以控制嘅事情，亦都係我想做嘅事
"maybe I didn't do so great. Maybe I messed up a little or… a lot, but, well, I tried my best, and that's the best anyone can do." 盡力而為做到最好，加油！