計劃經濟

關於一啲突然間諗到嘅idea

本身同朋友M傾緊上海嘅情況，突然諗到點解計劃搞唔到高科技，詳情睇下文（可能有啲地方唔係記得好清，儘可能地還原當時嘅對話

M: 你話政府應唔應該打擊哄抬物價嘅行為？

我：Of course not.市場會自我調節，如果冇出現壟斷嘅話，而此地高於出邊嘅利潤會令到更多嘅人帶物資過嚟，最後價格會回復返正常水平；但如果政府打擊，造成嘅後果就係物資會繼續短缺

M：確實，哄抬物價雖然會拉大富人、窮人嘅不公；但如果強行讓公權力去維持物價，就會唔夠用，最後都係會不公——權力強弱嘅不公，有權有勢嘅人會得到物資。噉應該點算？

我：政府應該當賑災噉運送物資

M：噉咪變成大政府嗰一套？

我：呢個係佢應該做嘅嘢，因為本身呢單嘢就係政府用公權力整出嚟嘅，人哋唔係發生咗乜嘢自然災害，而係用行政命令嚟使到成個城市運作唔到，噉相應嘅保障同後勤唔係你嚟嘅話仲有邊個可以負責？

M：好奇怪，好似而家又好多人想大政府，唔通公有制的確有佢嘅魅力所在？

我：睇時代，時勢好容易賺錢嘅時候冇人想被管，而時運差嘅時候就會想有個大政府嚟做保護傘，人畢竟仲係幾短視而又十分睇重自己嘅利益

……跟住講到公有制

M：當時做計劃都要做三個月，即係話一年嘅生產指南要喺三月份先出到

我：未必，可能上一年就開始做，攞嘅係之前幾年嘅數據

M：噉呢個滯後性就太大了，至少幾個月到幾年不等。而且好難想象當時係點統計每一個地區嘅需求嘅呢？

我：唔得，所以先咁容易脱離實際

M：而家嘅科學技術條件噉好，嗰一套係咪可行呢？數據統計完，輸入到計算機，好快就可以出一個計劃出嚟

我：理論上可行，但實際會有問題。唔係話積極性嗰啲問題，而係計得太盡嘅話，就冇機會試錯，冇辦法創新，因為要先證明可行、會成功、有利可圖，先會做

M：好有道理，所以食嘅用嘅好容易生產到出嚟，但高科技嘅民用產品就唔得了，比如walkman之類。而軍用嘅話就唔存在呢個問題，因為唔使統計需求，只求做得成，唔計代價

都算係一個突然諗到嘅point，值得記錄落嚟