本日公休

好有味道嘅一部電影

理髮師，真係一種看似平凡但又充滿人情味嘅職業，一個好嘅髮型師，真係會畀人跟足一世。所以導演傅天余都將自己媽媽嘅故事放上螢幕

電影入邊最大嘅對比就係老一輩同仔孫一輩嘅代溝，老人家就普遍唔會接受新事物，好多都係跟返步驟跟傳統，好多時都唔理解細路嘅諗法，當然專指係自己嘅細路。如果係人哋？留瀏海，可以；太陽能，都知嘅，「得綠能得天下」，笑死
而老一輩就會惦掛住有無可能復合、希望仔女順順利利，雖然佢哋根本唔理解喺度求神拜佛噏緊乜

就好似阿川同阿玲，如果係老一輩，好少會去到離婚嘅情況，大部分都係忍一世；但而家就唔同喇，因爲都知要改變一個人基本冇乜可能（其實係要打個問號，只係大家都當咗係真理，我自己就企喺另一派到），有一次托唔到人哋手㬹做好人，就基本上好難識得拒絕人哋；都唔係話做好人唔得嘅，但好過頭就有問題，雖然講「中庸 」都幾老土，都係有一定道理嘅
係囉，就算阿川同阿玲搞到離婚，兩邊都唔覺得，有咩問題；一個繼續做好人，人哋環境唔好一樣照畀賒數；一個繼續博命賺錢。有人會問，都自由戀愛嘅時代，點解仲會有呢啲問題？影片就話係佢哋閃婚啦，都係一個理由嘅：未去到知根知底，諗過晒會有乜嘢衝突就一齊咗，仲要生埋小朋友……但都唔代表唔閃婚就唔會出現噉嘅情況嘅，未真正住喺一齊，係冇辦法預計到咁多嘢，因此同居超長一段時間係絕對有必要，當然亦都有專家話過，同居之後反而會冇咁容易結婚——我覺得未嘗唔係好事，因為，對每一個人嚟講，其目標應該都唔係領個證啩？而係自己過得開心舒服幸福，住過之後知道對方唔係一個適合一齊生活嘅人，噉就唔使行到去婚姻之後再話係愛情嘅墳墓好得多。真正相處過之後都願意繼續磨合嘅話，係唔會決定唔結婚嘅
但我都覺，阿川太好人……決定開展新生活，都係要阿玲同佢講「可能換個髮型師會更好」，佢先肯去邁出嗰一步，如果，阿玲冇咁好，唔同佢講呢？
and，有一句台詞都幾有意思：「人與人之間，唔需要有乜嘢關係先可以關心嘅」，其實係嘅，但又有啲唔同，因為呢度主要都係關係發生咗變化，難以再揾返點樣相處方式先比較好

至於點解男士飛發鋪嘅用户粘度咁高，就算搬咗好遠都要返嚟飛髮呢？我自己諗咗幾個理由，從自己嘅角度嚟諗係合理嘅，但唔一定係其他人嘅諗法：第一個就係惰性，以前嘅都ok，就唔使換第個啦；跟住就係，煩，已經磨合好，知道想要乜嘢髮型要求，會傾乜嘢話題，睇報紙食麪都可以好隨心，如果去第度就要重新嚟過一次；熟人，有人情味，頭點擺點整，温度如何之類都熟晒
有一幕係幾好玩，前邊都提到，有個男仔因為女朋友中意想留瀏海，就照辦啦，但返到屋企，佢媽媽唔收貨，扚返去剪過，留下傷心嘅眼淚，sad。唔知呢個算唔算係第四個理由？來自屋企人嘅偏好或推薦，有乜唔妥，直接回爐再整過

因為講人情，所以會記住每個客嘅特點同電話，提醒關心佢哋，其實就已經係朋友關係，亦因此唔會講錢，願意去好遠嘅地方為朋友理髮，而好巧合地，見證咗類似禮儀師嘅儀式，都幾感動，呢啲都係連續多年嘅交情先有可能做到

喺最後都幾有意思，一班女性朋友一齊玩，似乎歲月無痕，如此幾好