2023 又一年

to be honest，今年大概係最唔想回顧嘅一年？

世界千變萬化不似預期，緬甸軍政再生反抗軍，俄烏、哈以戰爭持續，24年多國選舉、選戰打到不可開交……

咦，唔係睇上去好易咩？

但我自己嘅一年，又係點？我唔知自己講到幾多，可能最後成篇都係謎語，如果你睇到矇查查，唔好意思，係我自己問題。

呢一年，大概可以分爲四個階段

儘管都係會有期末考試，但一下子就過去，迎嚟新年假期。過年，點都係開心快樂嘅事，同屋企人、朋友一齊度過，更唔使講時隔好多年之後終於可以去一次香港，行足幾日，回憶呢個城市無法遺忘嘅記憶，嗰啲當時唔在場但其實都同時同身心地經歷嘅往事；仲要帶咗唔少書心滿意足結束假期

其實我唔知自己做緊乜，同埋以後要做乜

當然，而家梗係讀緊書、搞緊科研，以後都係諗住做個打工仔。但，似乎太平常到無趣嘅地步。噉樣過日子，究竟有乜嘢好？睇唔到自己想做嘅嘢——願意傾盡全力甚至所有時間精力去達成嘅嘢。可能大部分人覺得可以賺到錢顧到家就幾和味，我自己從唔覺得呢個係空缺部分嘅答案

內心有好大好大嘅奢望，好不切實際嘅幻想，而畀內心陰影下嘅另一個聲音擊沉：「冇可能做得到，根本唔現實，放棄啦」 。其實我都唔知點解要一直掙扎？超級難以明白同理解自己講真，如果有得揀，有時都會想自己做個幼稚樂天人士，但又覺得幾乎冇可能唔會受到社會嘅毒打，所以橫掂都要死，都係死得明白好啲……

總括而言，每年都會有呢一段，可能係因為勁得閒得滯……又或者係世事無常有感而發……不過都唔算壞事嘅，我寧願係一直維持噉嘅情感同觀念，都唔想就此麻木無感

事到如今，彷彿好似發咗一場夢，但又的而且確發生過

點講呢，有時驚喜或幸福都幾突然，當我仲喺比較鬱悶無趣嘅時候，就噉一嘢撞埋嚟，當然第一時間係難以置信同埋有啲唔知點畀反應，事實上都係幾日之後先有嗰種發夢都會笑醒嘅心情同感覺。一下子覺得所有嘢似乎都返晒黎，變得更完整，對於未來都有更明確嘅方向同信念，當時的確係噉，當時

儘管後邊唔似預期，但老實講，係過得勁開心同充實，可以好樂觀地認為係沉悶嘅結束而帶嚟嘅轉變機會(?)，至少自己冇覺得後悔同遺憾

所有嘅夢都有夢醒嘅時候，都冇辦法。正如唔知為何會發夢，我都唔知為何會幻滅。都冇嘢嘅，對我嚟講，結果就係結果，當時有好好地享受過程就滿足咗，至少再後邊會點樣，冇咁重要。當然，而家梗係講得好輕鬆，當其時都幾困惑同埋難過，甚至都唔知自己係點樣度過嗰段時間

一直以嚟，我都好少會同人講，呢件都一樣；點解會噉？我諗可能有幾個原因，一個係覺得冇乜好講，講咗都無用，就算朋友會安慰或者陪伴，事後我冇覺得自己好過咗，所以真係冇乜必要，最後都係要靠自己度過；其次係，越脆弱嘅時候越容易俾傷害到，有一句係講，「越在乎嘅人都越有機會重傷到自己」，都唔係冇信得過嘅朋友嘅，只係唔希望有噉嘅風險，畢竟呢種朋友真係少之又少，相當於自己嘅心情嚟講，就算持續時間再長，都係一下就過，但fri嘅話係可以一路行落去

無論如何，生活都係要繼續向前

鬱悶無奈又好，傷心難過都好，冇可能一直都係噉，除非我自己想有乜嘢情緒病

路就係自己行落去嘅，繼續做自己中意嘅嘢，我仲係嗰個我，似乎冇乜改變，但都自己知道變咗乜嘢，好可能係得自己一個知

但我想講，我過得好好，唔使擔心，地球會繼續轉，我會繼續行落去，望大家都一樣，無論如何，要記得開心