活在當下

活在當下，係因為我哋唔知道，時間仲有幾多。尤其當意外好易發生嗰陣，就更加要珍惜難得嘅每一日，"live as you'll die today."

愛同陪伴，係最有力量嘅事物。因為愛，所以為咗個仔開心，去到世界各地睇唔同嘅風景，留低自己嘅足跡，影低每一個瞬間，即使家財耗盡都唔後悔；亦都因為愛，所以好有耐性地陪媽媽走過抑鬱嘅深淵，一齊去發掘呢個世界嘅美好

而好多時，愛都唔只係好好相處好融洽，亦可能係有抱怨有發脾氣同駁咀駁舌。都好合理，因為經常相處，自然就會多咗好多產生矛盾嘅事，而又因為噉，所以冇咁容易時刻關注對方嘅感受，就好易唔自覺地傷害咗對方。而道歉就顯得好重要，明白地話畀對方知自己好在乎，發咗脾氣就好喇，唔好破壞咗兩個人嘅關係。不過我自己都係儘量避免囉，因為的而且確唔想事後再補鑊，好麻煩；而且好唔想 hurt 到人，對方難過嘅時候自己都會難過

so，活在當下，珍惜每一日嘅風景同難得嘅緣分相聚，漫漫人生路，感謝你哋一直都喺度。只要我哋每一日都好用心去經營同珍惜嘅話，我諗就算真係變成過去時，呢段時光都係值得度過同埋始終會發光，噉就已經足夠。雖然話俾人依賴信任怕失去嘅感覺幾唔錯，但希望都可以更加自信、同埋相信我多啲——就算如果……只係一個假設……如果註定會失去嘅話，噉可能真係唔配，wait wait，係話我唔配，因為我自認自己都唔好，但我唔會去諗呢啲，因為人哋要走要留，唔完全取決於我，我亦只能去過好每一日，儘量唔留遺憾

亦都好難去承諾啲乜嘢，今日唔知聽日事，講咗都只能代表而家嘅感受同諗法。而此時此刻可以確定嘅係，我願意同埋希望可以一直噉行落去，this is what i want