Ukraine 人民公僕 and Winter on Fire
今日介紹同烏克蘭相關嘅兩部作品，分別係電視劇《人民公僕》同紀錄14年烏克蘭示威嘅《Winter On Fire（凛冬烈火）》
其中《人民公僕》mark咗好耐，因為之前有睇過嗰本小説，當時就覺得比較有趣同好理想樂觀
跟住又知道烏克蘭有將佢拍成電視（唔知可唔可以講係改編？但故事情節有好大嘅唔同，只係設定比較類似），後尾19年知道當時嘅主演Володимир Олександрович Зеленський真係當選為烏克蘭總統，其實睇嘅理由都幾充足噶喇，只係我自己一直冇睇。點知今年俄羅斯總統普京發咗癲挑起戰爭。。一開始真係感到好無奈同難過，日日睇住live，之後慢慢就冷靜返，見到濫用武器對百姓造成傷害都會好嬲同難受，但都知道自己確實做唔到乜嘢，最多就捐雞碎咁多而於當地人而言遠遠唔夠。所以就開始睇呢齣電視劇，搞笑之餘都有唔少值得思考嘅地方
電視劇講述嘅係「基輔一間中學嘅歷史教師瓦夏（華莎）·彼得羅維奇·戈洛博羅德科（Vasyl Petrovych Holoborodko）喺上課期間，學校要求佢班上嘅學生去布置總統大選投票站，激氣嘅戈洛博羅德科開始用粗口挖苦、埋怨烏克蘭歷任總統。這一片段意外地被學生拍到並上傳到影片網站，受到網民熱捧。通過眾籌，戈洛博羅德科參加咗總統選舉，意外當選總統所引發嘅一系列趣事」（摘錄自Wikipedia）搞笑嘅地方真係會笑死人，諷刺到極致
毫無從政經驗嘅華莎成功組建咗自己嘅內閣班子（昔日嘅同班同學加班主任，後尾班主任被整之後換咗），最成功嘅行動係扮收賄從寡頭嗰度攞錢，同埋將政府同議會等部門放喺一齊促進行政效率。但好景不長，國家嘅問題好快就暴露無遺：缺錢，賺錢嘅行業被寡頭及其議員把持住；要想議會通過自己提出嘅議案就要先等寡頭同意；腐敗嚴重等等。一環扣一環，要想徹底解決呢個問題就要先㨃冧寡頭，有錢之後先可以辦事
而華莎嘅第一步係先通過反腐行動搞掂咗同寡頭取得平衡嘅總理尤里，引起寡頭嘅怒火，因此唔再通過華莎提出嘅議案。無奈之下，華莎選擇同尤里合作，離間寡頭，成功通過議案使得烏克蘭可以同國際貨幣基金組織借款，且威脅解散議會為由成功任命以為係自己人嘅蘇里科夫做總理但因為國際貨幣基金提出咗過分嘅附加條件，華莎大罵痛罵而放棄借款，令到不解嘅人民反對嘅聲音變得好大，人民開始懷念以前嘅日子，雖然都係貪污都係日子唔好過，但總比而家物價高漲民不聊生好
再加上蘇里科夫同寡頭傾好數之後，呃華莎話尤里會現身，內憂外患之下，華莎決定離職，對於一個毫無從政經驗嘅人嚟講，已經做得夠多了，既想公正又想work，好難，所以話，想做政治家其實好唔簡單
心灰意冷一排之後，重新振作起身，決定再次參選。喺一輪比拼之後，寡頭手下嘅候選人都唔夠打，就剩低華莎同蘇里科夫，儘管有寡頭嘅黑資料幫手，華莎都係敗選（因為眾所周知嘅原因，隨便數錯票好正常
敗選唔單止，仲因為同尤里串通嘅事情坐監。呢個時候，人民先知道邊個好邊個壞，當上到嗰個位置，先睇得出佢會食幾多，蘇里科夫就係純商人本色，所有嘢都可以交易，將國家運作成企業一樣（劇中都有講到整公路時嘅情況，簡直笑死，一層層貪上去，而當因為反腐將下一層嘅人提上去時，發現反而貪得更多hhh，最後只能感嘆「路係整唔成了」
好在佢嘅摯友同戰友不斷向歐盟求助，最後經過重新點票之後發現最初嘅結果就應該係華莎當選，重新聯合返成個烏克蘭，並且變得好富有同民主hhh超級好嘅結局
而澤連斯基真係當上總統之後，現實冇咁簡單，所承諾嘅事情有啲做到咗而有啲做唔到；寡頭政治依然存在（打壓一個寡頭嘅同時而唔理另一個嘅壯大）；用人方面亦都有所非議（用咗唔少自己拍戲時嘅人做官員）；外交上想同俄羅斯平起平坐，有啲難等等……不過，喺面對俄羅斯入侵時嘅無畏同感人嘅演講令佢嘅支持率重新攀升。政治確實冇咁容易，唔會一帆風順等人去安排去做嘢，政治上不得不妥協，好多嘢唔係話想做就可以推行到，所以競選承諾確實只能睇睇，對候選人嘅承諾期望係可以做到嘅就要完成，而如果做唔到嘅都由佢，可能受限於現實條件而冇辦法做到
至於另一部紀錄片《Winter On Fire（凛冬烈火）》，紀錄咗乌克兰亲欧盟示威运动嘅過程（始於13年反對當時嘅烏克蘭總統亞努科維奇中止同歐洲聯盟簽署政治和自由貿易協議，並強化同俄羅斯嘅關係。另外，佢喺2014年1月17日簽署新法，禁止幾乎所有形式嘅抗議活動而再度引發民怨。抗議群眾主要訴求是與歐盟簽署協議、亞努科維奇下台、提前舉行選舉，至2014年2月乌克兰最高拉达投票通過解除烏克蘭總統亞努科維奇職務結束）
真實嘅事情總係會令人難受同聯想起類似嘅事情。原本係和平嘅示威行動，最初大部分嘅示威人士係學生，要求政府簽署同歐盟嘅協議。但主政者唔聽，反而派軍隊清場（用鐵棍打人！有人打到頭破血流）。對於學生居多嘅情況，其實同民調都有關：後生一代更希望同歐盟友好，更多內容可以睇上邊嘅link。
第二日人民轉移到獨立廣場繼續示威，因為睇到學生被打而有更多嘅人參加遊行同集會，「百萬人大遊行」。喺又一次嘅夜晚清場時，聖米迦勒修道院敲鐘，讓更多嘅人出嚟支援，最後有一萬五千人在場，反包圍軍隊，成功阻止軍隊做嘢
到此時此刻諗起呢個都依然好感動
喺12月11日當晚，我哋明白咗團結嘅重要性。我要向嗰啲勇敢嘅人民致敬。
歐盟外交及安全政策高階代表凱瑟琳艾胥頓：你哋中有啲人知道，琴晚我喺獨立廣場，參與咗成晚嘅活動。首先我要譴責使用武力嘅行為，呢個係絕對唔允許嘅。尤其就我個人而言，我見識到人民係如何以和平嘅方式抗爭。我喺過去幾日，想要表達嘅最關鍵嘅事情係對話嘅重要性，同聆聽人民心聲嘅重要性。唔係關於要幾多錢同努力先達成目標，重要嘅係人性尊嚴。
集會繼續，而另一邊就推行咗前邊講到嘅新法，投票方式同埋入邊嘅內容都好荒謬同離譜
生活喺21世界嘅文明國家入邊，議會嘅立法官員，仲用舉手方式表決？真係絕！大佬！你哋究竟喺度做乜嘢？投票表決出一堆又蠢又獨裁嘅法律！讓人不能接受！
按照呢啲法律，你唔可以穿戴安全帽同頭盔；唔可以組成超過五輛車嘅車隊，即使係因為婚禮或喪禮；政府可以決定是否禁止人民上網；喺和平聚會中佩戴頭盔及穿着統一服裝，可導致最多十日嘅拘留。
人民就用「諷刺同挑戰嘅態度」去回應：戴滑雪、潛水面罩，着迷彩外套，廚房嘅鍋等等
佢哋唔記得將呢個加入法律入邊，應該立即添加入去。
睇到抗議咗兩個幾月冇進展，甚至推行咗咁離譜嘅法律之後，開始採取更進一步嘅措施：去國會抗議！
民眾同警察交戰，民眾掟燃燒瓶同石頭、燒輪胎，警察用橡皮子彈同閃光彈
當天第一次有眼睛受傷嘅受害者。當第三名失去雙眼嘅人被送過嚟時……我行到出面去，恐慌症發作……
muck alike，警暴都一個樣。到後邊，警察摧毀醫療站，甚至橡皮子彈換成真槍實彈，totally murder!濫殺無辜，就算係幫助傷者嘅人或者教士都瞄準射殺。
老實同你講，呢個真係好得人驚。因為佢哋開始用真槍實彈射殺民眾。你可以聽到子彈從耳邊呼嘯而過，睇到身旁有人倒地而死。我想問佢哋仲係唔係人？或者係母狼生嘅？點可以噉對付自己嘅人民？
至此，革命已經行上不歸路，勢必要推翻噉嘅政權，否則所有人都會傷亡或淪為階下囚。
榮耀歸於烏克蘭！
榮耀歸於英雄！
榮耀歸於國家！
消滅敵人！
烏克蘭！
高於一切！
當我要去執行夜晚守衞嘅一般勤務（守夜巡邏）時，我嘅細女求我唔好去（怕有危險）。「爸爸」，佢話：「等我大個之後，我會自己去打敗佢哋」。我就同佢講：「如果我哋而家唔打敗佢哋，以後就冇人可以做到了」。
有一晚軍隊再次圍攻，向民眾掟燃燒彈，而民眾就繼續燒輪胎。如有神助一樣，當日嘅風將濃煙吹向處於上方嘅軍隊，由軍隊生嘅火變成民眾嘅屏障，連天都企喺民眾嗰邊
嗰個係充滿戲劇性嘅難熬夜晚，大家都唔講嘢，只係互相對看，睇到彼此嘅靈魂。我從未見過噉嘅勇氣，我睇住佢哋，心入邊諗「佢哋幾時會逃跑？」如果佢哋逃走咗，我可以體諒。但佢哋冇，佢哋奮戰……奮戰到死。聽落去有啲誇大，但嗰一刻真係噉樣，人民奮戰到死，為咗烏克蘭而戰。
我哋唔怕為自由而死。自由係我哋嘅，我哋代表自由。我哋會贏，烏克蘭會成為歐洲嘅一員，成為自由世界嘅一員！我哋唔會變成奴隸，我哋能夠獲得自由。
佢哋用木製盾牌擋住槍林彈雨，繼續前進（想將傷患帶返嚟），完全冇意識到自己嘅英雄行為。我試圖説服佢哋唔好噉樣做，因為佢哋可能因此喪命。佢哋回答：「我哋抱住必死嘅決心」。佢哋立志改善國家現況，所以佢哋願意行喺子彈下，明白佢哋可能會返唔嚟。
知道最難嘅係乜嘢嗎？就係承認某個人已經死咗。我好討厭自己嘅地方係，當你救活一個人後，人們仲係不斷地帶住更多受害者過嚟。你明白或許能救活呢個人，但其他人可能就會走了。子彈造成嘅傷口危及生命。你要闔上某人嘅雙眼，因為已經決定唔繼續施救。跟住你仲要趕住救下一位受害者。必須宣告生命嘅逝去，真係非常難受。
最終，亞努科維奇逃跑，國會辭去總統，提前大選。人民終於獲得勝利！
23年以嚟，我哋嘅獨立，好似只係存在於紙上。但如今，好多人犧牲生命，讓獨立成為事實。獨立廣場係個方寸之地，卻容納咗無限大嘅勇氣。為咗細路嘅未來，人民已有必死嘅決心，就算有人自己並細路。
人民企起身，展現出羣眾嘅力量。穆斯林、猶太教，唔同教派嘅基督徒、佛教徒，以及冇特定信仰嘅民眾，都用包容嘅心對待彼此。新嘅社會誕生了！
but，普京庇護亞努科維奇，吞併南部嘅克里米亞，協助親俄嘅東部分裂主義者，並變成持續八年嘅暴力戰爭衝突，到而家嘅入侵烏克蘭。
未來會點？我唔知，但希望戰爭會儘快結束，打仗無論邊邊贏都係傷害咗百姓嘅正常生活。and希望所有人都可以活喺自由嘅世界入邊
評論留言区