無邪

好少可會睇伊朗嘅電影，只係某一日睇到新聞話導演畀當局拉咗，所以得咗70屆柏林影展金熊獎都去唔到現場攞獎

成部電影分為四個片段，圍繞執行死刑嘅故事展開（不過放心，唔會好恐怖or血腥，一撳某個掣，就抽開晒死刑犯嘅凳，一個個吊死咗……其實都幾得人驚，好在冇上半身嘅畫面

第一個故事 毫無邪惡

一個善良温柔嘅男人，錫妻女、孝順、幫助隔籬鄰舍。前邊舖墊咗好耐，故事嘅最後：佢日日開夜工，不過份工都好輕鬆——只需要撳一個掣——但其實對好多人嚟講都好難，因為撳完之後就會睇到幾個人吊死、然後死人會失禁嘅畫面

衝擊力極大，即刻帶我哋去到伊朗嘅世界——有死刑且會執行死刑，而執行死刑嘅人好可能本身係一個好善良，平時連嬲都好少發嘅人

另外，都揭露伊朗女人地位好低——妻子去銀行取丈夫嘅錢，職員每次都要求丈夫親自取（即使妻子攞住嘅係丈夫嘅袋同埋已經去過好多次），僵持住之後就打電話畀丈夫確認先得

同埋，雖然男主服從咗呢個制度，但喺開車路上遇到紅綠燈嘅時候，佢都係會猶豫不決，顯示佢人性嘅一面，同片段前邊舖墊嘅一致

第二個故事 佢（她）話：你一定得

呢個故事講嘅就係行刑人行刑前嘅心理變化

最開始嘅時候，個個都唔肯，但冇計，當兵就係要執行命令——唔服完兵役就乜都做唔到（工作、出國等等）——而且執行完死刑可以放三日假，所以好多人都會選擇服從

我哋嘅主人公，屬於好堅決嘅嗰種，覺得自己唔得，落唔到手執行死刑，所以不斷打電話畀女朋友睇下可唔可以幫手；甚至希望花錢消災

一齊服兵役嘅人就話大家都係咁過嚟嘅，法律噉制定，執行就係啦；而且好多都係當死之人；實在覺得有問題大不了留低，等以後自己成為一個有權勢嘅人再改變佢——但留低亦意味着自己要先執行咗，而且好可能要不斷執行先爬到上去……噉咪太黐線？——不過呢個邏輯係啱嘅，想要改變嘅話就一定要留低先有機會，可能都代表咗導演嘅態度：明知呢部電影係觸犯當局都要拍，而且堅定留喺伊朗唔走

而花錢消災呢？只不過使錢要人哋幫自己殺人，自己就可以心安理得嗎？Of course not，並唔會真係高人一等

噉點算？電影話畀我哋知，仲有一條出路——喺好心人嘅貼士幫助下，主人公用槍反抗，成功逃咗出嚟，同女朋友成功重聚

其實真係幾感動——女朋友相信自己嘅男友一定會堅決反抗、唔執行死刑，而男友亦不負望，真係做到咗

yep，如果法律、規則唔合理，而自己暫時又冇能力改變時，就可以堅守自己嘅良知拒不執行

第三個故事 生日

呢個故事講嘅就係行刑人行刑後嘅情況

如果自己處死咗愛人嘅恩師，噉點算？先知道被自己處死嘅人唔係所謂嘅十惡不赦嘅人，而只係思想與當局不和嘅人——簡單嚟講，只係當局不容嘅人

的而且確，行刑之後可以放三日假，可以揾心上人度假，但可能係踩住好多無辜者嘅屍體

呢個就係行刑者嘅痛苦，一味服從當然就冇事，但當發現真相嘅時候，就會好大問題，因為成個制度本身就係有問題噶

第四個故事 吻我

呢個故事可以認為係第二個故事嘅一種結果

拒不執行死刑，所以要逃難到其他地方，但因為意外懷孕，只能隱瞞真相，要骨肉分離

臨老要死先同個女相認，但自己嘅女兒又理唔理解呢？即使話個女唔肯殺生（偷雞嘅狐狸），又是否明白父親死都唔肯執行死刑嘅初心？更加殘酷嘅係，自己媽媽嘅兄弟都係死刑嘅犧牲者，知道咗呢個之後，會唔會理解多啲呢？

當然，呢條片唔一定係反死刑，世界上仲有唔少國家有死刑（約1/3）；當然我哋都可以反思一下死刑應唔應該存在

導演更想展示嘅係當局濫捕濫用死刑嘅伊朗。喺民主國家入邊，死刑存在與否係一個可以討論嘅議題；而喺威權國家，死刑就只係政權用嚟消滅異議者嘅工具

我哋亦都睇到，電影展示嘅行刑者都係平凡人，都係無邪，但又要被逼做邪惡之事，所以喺暴力機器面前，根本就冇所謂嘅無邪

再諗到導演現時失去自由，可知所有嘢都唔係從天跌落嚟