逝去的人

清明節，諗起兩個仙逝嘅人，都係女性，一個我阿太，一個我太婆

咁大個，覺得自己都幾幸運，自記事以嚟最親近嘅人離開人世嘅應該只有呢兩位，其他比較親嘅人仲喺身邊，比較lucky，希望大家都健健康康、平平安安

（要講我係從邊個moment開始記得嘢，大概就係媽咪教我「我」，「你」，「他/她」開始，而家諗落都幾神奇，好似一早就有呢個概念，只係嗰陣學識究竟點叫先啱

阿太走嗰陣，我仲比較細，唔知道乜嘢係死亡，只發覺有一排冇喺經過舊屋嘅時候見到佢，後尾先知道再都冇得喺嗰度見返佢。唔知點解呢，自己自記事以後冇點同佢相處（因為我哋後邊搬咗過去新屋住），但平時會打招呼，佢畀我嘅感覺係好温柔同埋好尊敬（嗰種雖然比較老，但睇到會覺得佢係一個好獨立好有自尊嘅女性

至於我太婆，就係到中考前幾個月因為意外跌倒跟住後邊走咗，離開人世當中最親嘅，而家仲記得喺香港住、喺呢邊探佢嘅場景

嗰晚知道咗太婆走之後，心情好差，第二日落雷暴雨，落課嘅時候喺窗邊睇住閃電就好似要當面闢落嚟，我唔感覺驚，只係好難過，好難接受到呢個事實。明明幾個星期之前探佢嗰陣仲好地地，點解一下子就……雨水同心入邊嘅淚水，分唔清邊個打邊個
一直到夜晚坐車返去都落住雨，企喺車門邊，未到站之前，已經承受不了，於是撳鈴喺前邊嘅站就落地，一邊淋住雨行，一邊喊，一邊諗「我真係覺得淋雨無所謂」

即使到而家睇到有太婆嘅相，都會好掛住佢。其實真係好犀利，當年佢同我婆婆見香港環境好，就一齊過去打工揾錢養家，講真，真係勇敢過好多男性

今年清明，繼續冇得拜山；又冇雨；一路都比較中意落雨嘅天氣，唔落雨出太陽同樣都幾好

逝去嘅人再都見唔返，但我哋可以好好珍惜身邊嘅人，對佢哋好啲，nice啲，下邊呢個視頻本來係放喺呢個週末出嘅4月上刊入邊，而家提前放出嚟，因為啱好講到。再睇都係一樣地觸動。最親嘅人亦都最容易hurt到，希望大家都多注意啦，陪喺我哋身邊嘅，都係好愛我哋嘅人