心動嘅感覺

如果話不以戀愛為目的嘅愛戀，其實從細到大有好多次。我諗自己係一個過於愛自己嘅一個人。基本上好難會想真係同邊個願意一齊好耐。至少以我對自己嘅理解，雖然唔係未拍過拖，而且都唔算短。但如果時間長咗，就好難度過自我覺得無趣同埋乏味嘅感覺。但如果我從今以後唔再諗住同人喺一齊？其實我自己都諗咗好耐，因為我根本預測唔到未來會係點，至少而家嚟講仲幾幸運，未曾因為咩事俾人請去飲茶？somehow都幾危，目前只係ban咗一隻號，而冇玩過更加瘋狂嘅事情。但如果未來更多人知道我呢個blog嘅話，又會係點樣一種情況呢？

不過都係講返正題，無論我有冇諗住要揾個女朋友，我都好易可以揾到一個投射自身好感嘅女仔？唔知呢種叫唔叫花心大蘿蔔呢？笑死，至於點解會噉，可能都係因為我個人比較易覺得孤獨？同埋比較缺愛？都同屋企嘅教育情況有關？因為雖然都有安全感，但都係會有時覺得好不安，以一個「可用」之人產生嘅依賴感同安全感，從而可以更愛自己，呢個可能先係真相。

BTW，我亦都發現自己中意嘅人事實上都超級優秀！證明我好有眼光？Maybe。有男朋友嘅，或者勁優秀上到幾大嘅舞台，你話仲有未定嘅人選？who knows，但我自己係幾有信心，而亦都衷心祝福

再次返到正題，人生在世，一個人又好，多個人都好，自己過得開心就好。目前仲有幾多嘢要做下，所以就噉先，諗太多都係廢嘅。期待26年再回顧啦，到時會有更多可以確認嘅事情去討論。