一個人之隨筆 & 休刊公告

本人決定將週報、月刊欄目無限期休刊（即復刊事宜未有時間表），所以有必要同各位讀者交代一下原因

要從幾時講起呢？其實最好係從頭開始，但而家又唔係寫自傳，又未到為自己嘅人生作結嘅時候，況且我都冇咁得閒啦，所以將範圍縮窄到大學嘅呢四年半

呢四年半回顧返，係好動盪而又可能註定要接受磨鍊嘅四年。簡單啲嚟講，如果一頁頁睇返呢四年寫嘅隨筆，其實又唔覺有太大嘅變化，但如果再將而家嘅自己（？或者準確啲嚟講係一兩個月之前嘅自己）同四年前比較，其實都變咗好多……甚至，好似差咗？當然可能有記憶會美化嘅原因，但我覺得，呢一年確實丟失咗好多自己好珍惜嘅嘢

首先係我點解會寫隨筆呢？其實都係受到啓發，一開始嘗試寫落嚟，跟住發現確實有好處，所以堅持咗落嚟，但有嘢發生咗，大四到前日，除咗喺 blog 分享過一啲之外就冇再寫過，所以睇返隨筆好似自己丟失咗一年半噉……但好在終於意識到呢個問題，所以究竟點解會變成噉呢？

第一個係時間原因。唔係話自己好忙嘅意思，而係畀自己回顧反思自己嘅時間，少得可憐，所以連寫畀自己睇嘅隨筆都斷埋。噖日做咗一個16型人格測試，估下我係乜嘢人格？呢個唔緊要，重要嘅係講到我呢個人格需要畀自己獨處嘅時間，係我呢一年幾冇點做到嘅嘢，噉係咪有其他更加重要嘅事佔據咗？又真唔係噉樣。我哋可能成日會講"not forgotten"，但如果係忘記咗自己？
其他人可能覺得冇乜嘢：「平時都唔理咁多嘅，過一日就多一日，仲同你反思自己？」
但我自己原先都冇意識到，直至23年初睇咗《午夜圖書館》（出版商係咪應該畀我廣告費呢，最近幾篇blog都有提及hhh），先知呢一年時間點解好似冇做乜嘢都好攰好難受噉：我唔記得咗要同自己叉電。電話冇電都會熄機，但人唔叉電又真係死唔到，所以唔一定察覺到

第二個就係少咗輸入。呢個對我嚟講真係好重要，因為冇輸入就唔會有輸出，一冇輸出，就等於乜都冇做。當然呢一年幾唔係冇輸入，畢竟平時我仲係有睇好多文章同埋有分享到月刊度，但我想要嘅輸入係更多元化、更完整嘅作品，比如電影、書畫展、講座、歌舞話音樂劇等等，而且最好喺現場享受，多咗投入就會寧舍多感觸。前面幾年其實都還好，即使係疫情啱爆發嗰陣，好多活動都好快轉到喺線上進行，所以冇點少到，除咗書睇少咗。但返到學校先係問題，covid-19之前會有好多演出，而家都基本冇晒……電影放映社都好少獲批放電影；跟住上咗大四，又考研又鬼咁多課仲要上，真係頭都大晒，跟住自己就剩低書同電影，波都打少咗，陰公
再加上寫月刊用咗更多時間去睇文章，雖然確實好多文章都好值得一睇，但人唔同機器，會覺得攰，而且有個 due 喺度，都真係整得多搞唔掂（諗緊可唔可以學斯諾登一樣，整個自動搜集程式，根據自己嘅口味去搜集文章，自己就睇跟住直接可以分享，唔使再揾同再揀。又日常發白日夢ing
所以輸入真係少咗，多元性同數質方面都係

跟住就係呢幾年不斷反思嘅失控問題。從一開始寫隨筆其實就不斷提……
喺少咗自我回顧同反思之後，失控得越嚟越頻繁同犀利。比如？成晚通宵睇書或者睇電影或者打機……又或者plan咗約寫一篇文，跟住，放咗人飛機（要同嗰位朋友講聲超級sorry）……同埋自己想參加個粵文小説比賽，結果一直拖，喺臨交稿前先寫好，結果呢？肯定冇獎啦，其實個故事我覺得幾好，所以後邊應該會放出嚟畀大家笑下，等我修改完先，不過都要等我開始先…… you see，失控得都幾犀利

最後就會迷失咗自己。曾經喺隨筆入邊記低咗呢句話，但自己嗰時只係似懂非懂

係人，就會俾一啲條條框框嘅嘢約束限制。明明好平庸，但又希望可以跳出嚟；但係又希望可以穩定而冇風險，邊有咁好嘅事呢？所以走出平庸嘅只係少數人。

而家有另一番體會。之所以平庸，係因為只停留喺「諗（想）」嘅階段，但冇去做；冇做可能係怕風險或者冇動力或其他，所以乜都冇變，得個諗。我都失去咗自己 嘅方向同目標，部分原因係呢幾年意外太多，計劃趕唔上變化；更多嘅係冇叉電，就冇力去行動去付出。No pay, no gain

「想」是個很有趣的字。它同時代表「缺乏」。有時我們用別的事物填滿缺口，原本的慾望就會完全消失。——《午夜圖書館》

其他原因嘅話，有啲嘢唔講得~

唯一好嘅係，而家先察覺都未算太遲，可能呢啲就係命定嘅磨鍊，而且其實只係好細，未話會砸死人嘅嗰種磨難。而家揾返自己同目標，就得喇，向前望且一步步行落去

而家睇返啲隨筆，都幾有意思，尤其係一啲已經唔記得嘅嘢，比如日本武士失業後變成精緻手工業者打造n多百年老字號、魯迅先生結婚之後就寫少咗小説（疑似因為太過幸福，等等。

19年喺鄉村過年之夜，喺寂靜而又夠黑嘅天台上獨處同思考，寫咗對自己當時嘅認知：

understanding self
会想很多，却说很少
可以了解自己，却很少那样做
*害怕受伤害
喜欢理性多一点，重视感觉少一点
喜欢独处，向往更进一步的自由
控制不住自己，矛盾体、多重结合
如果书的世界可以自恰，这是一个很向往的情境
犹豫是美好的，总有一份快乐，无关结果

所以我真係冇變，又有所變化。希望借住休月刊嘅休息時間揾返自己最好嘅狀態，復刊再見~（blog會繼續更新，月刊就隨緣重啓）