Mercy 關鍵公敵

整體緊湊而又make sense，所以感覺幾好

故事背景AI法庭係爲咗及時行使正義有效阻嚇犯罪而降低犯罪率，所以有罪推定，喺規定時間內要被告利用強大嘅數據庫同網絡嚟自證清白，否則立即判刑執行

老實講呢個設定確實幾進擊，但考慮到實施前七國咁亂嘅情況，都可以理解爲特殊手段。不過有罪推定、要求自證呢個就真係幾有問題，詳細就唔多講，大家有興趣可以研究下點解現代法庭要係無罪推定

其他設定就幾合理，包括AI只係一個工具，只係根據人嘅要求而去蒐集資料同推理，點解？因爲處理能力同能量有限，如果漫無目的去查找真相，當然可以做到，但係所需步驟就會太多冗餘同會失去聚焦，要縮細範圍/設定目標，有人嘅參與就會加快好多進度，當然都可以話等AI再進化之後可能就可以自動完成晒所有嘢，都唔排除有呢個可能嘅，不過如果到嗰陣時，可能未犯案就已經阻止咗，或者第一時間就捉到

而最大嘅問題都係執行問題，外部證人都可能會講大話，如果冇實質證據輔以佐證就唔應該納入考慮講真；同埋相較於事後懲罰，都係事前確立晒規定同紀錄追蹤規範先最好，但係就會有一個私域嘅邊界，可以爲咗安全美好捨棄幾多私隱、幾多清白，因爲呢種方式其實就係當所有人係預設會犯案嘅人一樣。當然，如果係相關權力/輔助者嘅話就應該要實行，就好似片入邊嘅第一宗冤案，本身如果跟足SOP去做去規範嘅話，就唔會發生；而無可避免系統都會犯錯，噉點樣去翻案就係另一個需要優化嘅程序，延伸落去就係行刑是否要推遲？所以其實係好複雜嘅，同歷史一樣，從錯誤中學習，世界就係噉樣從血淚中進步