百萬圓與苦蟲女ひゃくまんえんとにがむしおんな
同樣好治癒嘅一部戲,節奏慢得嚟而又有韻味
![](https://blog.independentlyreview.com/content/images/2024/06/image-6.png)
首先要解釋下苦蟲係乜嘢意思:喺呢個辭典查到係苦面嘅意思(塊面好似食咗苦嘅蟲噉咁難睇、令人難以接近)
![](https://blog.independentlyreview.com/content/images/2024/06/image-4.png)
100萬日圓(yen),話多唔算多,不過都唔算少,按返08年匯率大概就係1萬美元,夠畀去第個地方嘅交通同住宿費
女主佐藤鈴子,性格比較矛盾:內斂而又火爆,脆弱而又堅強,勇敢而又害怕受傷。呢種性格好大部分係受到家庭嘅影響,影片一開始就展現咗:姐姐性格跟媽媽,儘量避免提及唔好嘅事情,但如果情緒上嚟都係會爆發;而弟弟跟爸爸,表面強勢正氣,但實際就係一個懦弱嘅老好人。加上屋企一旦提及所謂嘅真話,就會嘈到冇辦法住落去,進一步加深咗鈴子覺得唔可以對心邊嘅人講心裏話……
跟住就出事喇,唔識拒絕say no,只會強裝微笑帶過,前期被逼同意三人同租,對細佬嘅毒舌忍讓,後面被逼接下桃女嘅職責,唔想去同事酒聚但都冇拒絕,and不斷借錢畀男友,連約會時都使自己錢,順從地委屈自己……
一路死忍爛忍,總會有發火嘅一日。見到收留嘅貓畀同租嘅男人噼出街,一怒之下抌晒佢啲嘢結果俾刑事起訴留下案底;鄰居舊同學講自己閒話,都由佢喇,自己又冇真正阻到其他人,但直接行過嚟圍住寸就太過火,所以直球反擊;細佬次次都話自己會連累佢考唔到好學校,ok,噉一走了之唔使麻煩到任何人;聽到會上電視宣傳呢啲冇可能嘅事情,同時受到村人嘅指責同情勒,無奈之下只能爆自己有案底嘅內情,結果未儲到100萬就離開,仲擔心會唔會連累到老婆婆;男友曾經畀佢希望同温暖,但漸漸覺得冷漠同缺少安全感,睇咗細佬嘅信之後驚覺自己一直都喺度偽裝,內心嘅太陽一旦崩壞,就會大破,然後大立,毅然攤開所有嘢去講,離開傷心地去往下一個地方,以新姿態面對生活
由此都睇得出,女主嘅一百萬計劃只係不斷逃避,到一個冇人識自己嘅地方重新開始,唔使同人有咁多交集,因此唔使買電話。相信同人交往耐咗,等大家知道咗所有事情之後就會討厭同埋攻擊自己,所以到時間就離開,避免受傷害
儘管係噉樣嘅旅程,都一樣有成長,佢意識到自己都有令人讚美嘅天分同勤力,即使係冇天分嘅工作都有同事幫手維護,慢慢喺所有人嘅好心之下放下戒備同面具,願意主動展示自己嘅往事同脆弱,and luckily or unlukily(後邊再解釋返),中島都中意佢,兩人自然喺埋一齊,喺呢段相戀但唔健康嘅關係入邊學識咗要勇敢將心裏話講出口——唔好唔記得,兩人喺一齊都係源於此——了斷之後踏上下一趟相信會係真正尋找自我同真實面對自己和他人嘅旅程,會開始寄信畀細佬鼓勵佢而唔係靠中介打電話先知家姐去咗邊度租屋(之前嘅信雖然寫咗但冇寄出去,大概係因為之前佢堅信對身邊人唔應該講最重要嘅話以避免突然變成陌生人),同埋會一直帶住自己車嘅窗簾,有儀式感嘅人相信去到邊都唔會失去對生活嘅希望
細佬拓也,同前邊講嘅一樣,喺出邊嘅時候就好軟弱吞聲忍氣,喺屋企嘅時候就好強勢對家姐亂發脾氣同怪責,實際上只係將所有嘅痛同嬲發泄喺屋企人身上。但喺街上邊睇到家姐畀舊同學疜嘅時候,當然唔敢衝出嚟幫手,喺暗處見識到家姐嘅勇氣同堅強,約定要家姐定期寄信返屋企。講到底,係重視同埋關心屋企人,只係唔識珍惜,以為會一直喺一齊住所以任性將所有壞情緒釋放出嚟
等到家姐真係離開屋企出去流浪,情緒無地方發泄,就更加掛住家姐。而終有一日從家姐嘅堅強同勇氣中得到能量,可以真實地面對自己唔想同嗰班欺凌者升同一間學校,夠膽反抗同爆發;同時好在喺中介度得知家姐嘅地址所以寫信畀佢表達自己嘅感謝同屋企人對佢嘅擔心同思念,情感同樣都係雙向,家姐鈴子喺信入邊都得到咗勇氣同力量,勇敢地不怕傷害地講出內心嘅感受,決定如果對方唔挽留自己就會堅定地離開。呢度係我比較感動嘅地方,相互救贖同鼓勵對方,係勁難得同真摯嘅關係
at last,終於要講到(前)男友中島。兩人年齡相近,有特別嘅吸引力同理解。中島自律而温柔,雖然屋企都係七國咁亂同污糟(平時要注意打掃同整理嘅重要性hhh),但又會喺陽台種植物同葱嘅低調反差,係幾得意。呢啲優點足夠吸引同畀鈴子安全同温暖,但unlukily嘅係,佢哋嘅相遇太早,未學識喺一段關係入邊要分享自己嘅真實諗法同感受,同埋兩個人都係嗰種害怕受傷所以愛而又有啲抽離怕傷得太深嘅狀態,所以就會令到個狀況更加惡化,冇人講冇人問又不斷抽離就會變得冷漠同擔驚受怕。最後,鈴子先覺悟走去問去講自己嘅唔舒服同委屈,而中島明得太遲,就好似嗰個講唔破嘅誤會——怕鈴子儲夠100萬就會離開所以不斷借錢同叫佢畀錢,但自己噉做之後都係唔安心同埋唔舒服——兩人再次偶然地錯過咗最後挽回嘅機會,令人可惜而又遺憾,不過相信佢哋兩個都從中學識咗好多嘢,下一段會更好嘅,噉諗就會冇咁難過,係咪?
有人會覺得中島係渣男,唔同新嚟嘅同事兼學妹保持距離,喺鈴子俾主管指責嘅時候唔再似以前噉出嚟幫口(更衰嘅係喺另一邊同學妹玩水……)。但距離感呢啲都真係幾難判斷,如中島噉樣温柔而受歡迎嘅男人,考慮埋佢抽離嘅話噉做都好平常,如果鈴子唔表達自己嘅呷醋同委屈嘅話,中島當然唔會知道噉樣係傷害緊佢哋之間嘅感情而唔覺得有問題。歸根到底,一段關係要好好地相處同維繫到落去,需要雙方都表達自己真實嘅感受同諗法,如果都係戴住面具或者乜都唔講,只會係辛苦同折磨
評論留言区