NASA關鍵少數

中意臺譯嘅《關鍵少數》多啲，而唔係港版嘅《無名英雄》

btw先講題外話，wikipedia上邊都幾好玩，竟然有人寫「约翰遜」搞到地區譯名規則唔生效，一開始都睇唔到，但「约翰遜」，簡繁混雜係想點，可能最開始係編輯出錯跟住一路copy落嚟？帶有少少強迫症嘅本人就接受唔到，一嘢改咗佢

新事業，必定需要好多人參與。NASA嘅太空事業，就包括咗計數、計算同埋工程設計等等。但當時係20世紀中期，平權運動仲未取得重大勝利，所以工作環境都係要區分白人同有色人種。NASA都唔例外，有一個專門嘅建築物去作爲有色人種嘅工作部門同相關場所，而故事嘅主角就係海報嘅三位女士

就算係喺有色嘅計數部門，主管都一定係白人優先，如果無嘅話寧願空缺咗先，就算Dorothy而家做緊嘅就係主管嘅工作都好，都只係代理主管，根本冇得爬上去。well，如果冇咩機遇嘅話，就真係唔會有任何改變。好在，生得逢時，有新技術嘅發明同引進，當然首先都要留意觀察到，先會得知有個大型計數機器有能力取代自己嘅位置。跟住就係要主動出擊，搵資料學習，然後又遇上種族歧視問題：得白人區嘅圖書館先有最新嘅教學書，但又唔畀有色人睇。OK，無謂忍，直接拎走！偷？本身係想去借嘅，既然不公平地唔畀借，噉咪「非正式地借」住先囉。官逼民反就係咁簡單。事實證明黑人都一樣學得識新技術同知識，去得NASA你以爲講笑？而且都同一個部門嘅自己友一齊學，齊齊失業即轉工去新部門繼續發光發熱！超級nice同團結。對於白人同事亦都唔報復，願意教埋佢哋，共同轉去新部門，亦都如願得到認可（對方被迫？）成爲新部門嘅主管！

Mary係一個極有才華嘅工程師助理，但因爲係有色人，所以達到工程師之路都好遙遠：一開始係話完全唔畀升，後邊投訴之後就定下標準，達到之後又繼續改，話要加多個學歷要求，實質都係一種禁止，因爲嗰間學校出咗名完全唔錄取有色人種。really bullshit，好多人會行到呢一步就噉放棄，而且講真放棄都唔會俾人嘲笑或者指責，多數人都係會同情可憐。當然，如果係自己好想要嘅，就應該不撞南牆不回頭，申請入讀唔允許，噉就直接告學校排期上庭，邊個驚邊個！想要成爲歷史，點樣說服法官？一方面要突出自己個案嘅特殊性，呢層毫無疑問，同時都要提及對法官嘅好處——可以名流千古，成功！人畢竟好難大公無私，所以先講自己可以得到嘅利益，拉近同對方嘅距離（當然都要分場合，只係同地方法官私下對話，就可以噉做），再拉埋對方落水就可以快速達成自己嘅目的。終於，一次再一次，終於追上嚴苛而刁難嘅目標，成功成為NASA首位女性黑人工程師！而喺NASA工程師部門升到頂之後，決定去做平等機會委員會嘅主管，幫助更多嘅少數族裔同女性。

最後就係Katherine，有知識，有極強嘅計數能力。但因爲係有色人，只能夠喺有色計數部門默默地爲NASA嘅計算任務而努力。好在天有眼，永遠有機會留畀有能力嘅人，當然都係因爲突然間有空缺嘅幸運事件發生咗，然而，可想而知嗰邊全部都係白人，要核算嘅計數資料多處塗黑，因爲唔畀有色人睇到「機密」內容，不過Katherine好醒目，對住光管通透就睇得返數字！但更加唔方便嘅係嗰邊冇畀黑人用嘅洗手間，又唔可以放低工作唔理，就唯有抱住一堆工作資料跑返原來個building上廁所，一日往返時間爲咗去厠所都用咗大半個鐘。更加離譜嘅係，想飲咖啡，只係掂過一次office共用嘅咖啡桶，就直接俾人擺咗個細細個貼住有色專用嘅咖啡壺出嚟，可以講係極度侮辱，但都忍咗落嚟，我諗呢個都係熱愛自己做緊嘅事業同埋珍惜有呢個機會，亦因爲能力出衆俾主管賞識，更加唔想放棄。但更加嬲嘅係，白人同事攞晒彩，唔俾署名，又唔俾參會。Anyway，正因爲無可取代，先可以繼續做，better than machine（暫）

John不分種族握手，只論能力，一視同仁，超級好

主管、工程師，見到就解決，但其實都冇咁多時間精力去關心，始終管理勁大個team，冇可能嗰個都好關注。呢個都係不幸嘅地方，亦無能爲力所以不再挽留——唔通真係次次都要自己親身前往廁所門口拆咗個名稱牌咩