F1: The Movie

omg，超正，2025年之最（暫定），而且係去睇4DX，觀影享受又再昇華咗幾個檔次，超開心！

作爲F1入門級嘅話肯定就未夠，不過如果可以吸引到大家嘅興趣，願意去睇F1嘅比賽，聽多咗解說都會慢慢熟悉，而且真係有興趣嘅話後邊都會自己搵資料去瞭解多啲

Pearce係車隊新手，入到F1嘅賽場，就已經代表係世界前20，所以都好易感到高傲。更有啲係從卡丁車開始就以進擊嘅方式上到F1，所謂唔怕死，險中求富貴

如果可以保持謙虛，專注於比賽本身而唔係外界媒體等等嘅噪音，表現不佳時可以灰心懊惱但唔放棄，更加應該團結車隊，上下一心鼓舞士氣……well，最簡單就係聽信前輩嘅建議，就可以行少好多彎路。不過年輕人就係年少輕狂，會叛逆啲，錯過咁好嘅機會之後就只能夠自己親身試一次，真正吃過苦先理解到前輩嘅經驗同道理，代價大定細就難講啲，啱結束嘅英國銀石站都係一個好好嘅佐證，因爲落雨，5/6新手直接出局無法完賽

值得慶幸嘅係，犯錯並唔係結局，人生總係會有好多其他機會，只要自己未放棄嘅話。出現重大事故身體條件唔支持再次參與賽車之後，Hayes從F1退役，明日之星未曾閃耀就隕落咗，入咗賭博嘅世界，當然就冇可能搵大錢，畢竟十賭九輸，同埋都經歷多段失敗嘅婚姻，但佢自己冇放棄過賽車嘅世界，繼續參加好多各式各樣嘅比賽；而博彩嘅經歷都令佢知道好多喺比賽中突破漏洞嘅方法，有點旁門左道嘅意思
當然，日常嘅話就非常唔建議攞命去搏，但如果真係超級熱愛，自己又抱住可能係最後一次嘅決心，又會有邊個敢去勸阻？老友Ruben會，不過都唔會堅持到太耐，正因爲大家關心同瞭解彼此，就知道有啲嘢就係要做嘅嘢

不過喺F1嘅世界，賽車性能永遠係第一名，就算搞好多花臣嘢，車爛就係冇可能返級，因爲正賽嘅發車位置就係根據排位賽嘅成績，排位賽簡單啲嚟講就係每部車鬥快跑一圈嘅成績，而車快嘅話，喺正賽每圈都可以快成幾秒。所以Piastri罰咗10秒之後都係排第二……講真超有病，反應慢啲我諗Verstappen就直接撞爆，安全車啱結束又要繼續帶返。呢個就係今季麥拿倫嘅統治地位。第二先係車手嘅能力同發揮、車隊決策同換軚速度等等

最後想講嘅就係，雖然因爲能力受限，我哋有好多嘢都做唔到，但係呢，我哋可以選擇做義氣仔女，反抗人哋當自己係棋子嚟利用嘅安排，why?or what's about?好難直接講明，不過我諗每個人都會想噉做

都幾期待暑休之後剩低嘅比賽會點，同埋出年新制各個車隊嘅賽車性能又會係點，好似今年嘅噉沙巴隊噉，唔聲唔聲嚇人一驚，拎個第三，都值得㗎，開咗咁多場比賽