元素大都會

有粵配版，Serrini + 張敬軒，正爆

故事都幾真摯感人，睇完之後再查，果然劇情藍本係導演自己嘅背景同經歷：

韓裔家庭出身的他，自年少時便被家人耳提面命結婚對象要「明媒正娶」，連祖母過世前也表明希望他迎娶韓國出身的對象，後來他和擁有一半意大利血統、白人出身的妻子結婚，雙方由背着父母交往、發展至獲得父母認可，同時父母也從彼得·孫的妻子與同為移民的姻親身上發現許多共同點。彼得·孫將自己與妻子的感情經歷，融入本作的主角「小焰」與「阿水」的關係設定，還邀請超過100位任職於彼思的第一代、第二代美國移民共同分享自己的經歷，作為電影製作的一部分。——From 維基百科

自己最近都深有感觸，當真真切切觸動到嘅時候，靈感同表達都會係超班效果，因此好多大家都幾強調觀察生活並認真感受，勁贊同

當年柏尼同辛德辛辛苦苦起嘅屋企因為風暴摧毀咗，因此離井別鄉嚟到元素城，點解要噉做？尤其屋企人（以柏尼嘅父親為代表）並唔支持，甚至喺柏尼離開時冇祝福同還禮。不過細諗都係啱嘅，正如影片所講，只有離開呢個傷心地，先可以生活到落去。因為人好容易喺災難發生之後緬懷失去嘅事物，而陷入無盡嘅悲傷之中難以振作，離開都係為咗放低所有嘢，重新開始過，當以前所傾注嘅汗水同心血冇發生過，喺心理上可以更易由零再拼搏過

只不過，移民好多時都會受到唔友好嘅對待，尤其係文化差異較大嘅時候。當時佢哋啱嚟到元素城，仲係好少有火族嘅人，「入境」嘅時候名都係求其畀個官員篤個名上去，而居民都唔點歡迎柏尼與辛德，撞咗好多次板想揾個地方暫住，先終於揾到列車下嘅一處代售吉樓。幾經搏殺，慢慢發展起身，並帶住之後嚟嘅火族同胞將鄰近嘅地方發展成火焰鎮

其實係好唔容易同埋幾令人佩服，雖則好多嘢都係違建or唔符合標準，但確實係自己一手一腳建設出嚟，以供自己及家人居住同謀生，因此，第一代移民真係付出咗好多，先帶畀佢哋嘅後代以更好嘅條件去發展自己嘅人生

噉第一代佢哋最大嘅命根（夢想）係乜嘢？好多人包括小焰都覺得，同埋柏尼同辛德都有講過，佢哋嘅命根係佢哋歷盡千辛萬苦，一手一腳搭建出嚟嘅揾食店鋪「雜火鋪」，同時係可以遮風擋雨嘅住所「火之家」。但事實上，佢哋咁努力賺錢，都係為咗下一代唔使再經歷佢哋呢一輩由零開始嘅搏殺人生，之所以講間鋪係命根，係覺得以後小焰起碼有鋪傍身，點都有保障，就算未來唔算有大好前途，起碼都唔會差；至於希望小焰同火族拍拖，都有類似嘅原因，同其他元素溝埋一齊，點睇都唔喇更，更甚者就係水族，經常有啲好衰嘅水族過嚟雜火鋪搞搞陣，淋熄佢哋嘅商品，潑佢哋冷水；同埋成座城市其實都冇照顧佢哋嘅需要，只係由得佢哋喺火焰鎮自生自滅；再加上辛德係做占卜，用點香嚟睇兩個人夾唔夾，噉好自然肯定要火族先得：有火族獨特嘅味道，同埋可以點着支香

不過呢，當一個人十分肯定地陷入愛情時，我哋要唔要確定埋另一個，如果已知另一個嘅態度唔可以用現有嘅所謂辦法去檢測，呢個問題似乎解答唔到，因為兩種情況都有可能。而喺影片入邊，好讚賞劉滴水嘅做法：水族當然冇辦法點着香，但愛情都唔係一個人嘅事情，火+水，火有光，水可以當透鏡。可能呢個都係愛嘅意義，令人不再孤立無援，萬大事都有另一個人好堅定地支持且一同經歷

但矛盾嘅係，第一代嘅付出同犧牲太大，而變相成為一種莫大嘅壓力同負擔，因為有時候仔女會想當然地要報答父母，事實上，無論做乜嘢，都永遠報答唔完，而如果只係為咗報答而格硬勉強自己，老一輩得到嘅係虛假嘅開心，而後生嘅就好難過，為何要噉呢？血濃於水，話晒一家人，未試過溝通交流下，又點會更加深入而真切地瞭解對方嘅諗法同感受？

我好中意入邊嘅一個詞Tìshôk'，意思係：

珍惜火燃燒嘅光芒，因為火唔會永遠燒落去

最開始嘅時候，小焰就諗住接手雜火鋪，但一直控制唔好自己嘅情緒，容易發火，其實係潛意識講自己唔中意噉樣過人生。直到遇上滴水，先真正明白自己想要嘅同想做嘅係乜嘢。人生就係噉，好多時我哋以為想過嘅日子，或者仲唔知道自己想點過嘅時候，就會有某啲機會現身，喺呢個時機出現之前，唔使操之過急，好好地發展自我，會有show time

對於滴水，自從父親離世之後，先知道有啲嘢如果失去咗，再珍惜已經嚟唔切，比如話想講嘅説話同埋想做嘅事想陪嘅人，所以感到人生唔再有意義，但呢個時候見到小焰呢個堅強而脆弱嘅女仔，散發嘅光芒喚起生活嘅激情同目標。話係話例行公式，不過確實，男性嘅情感需求其實普遍上俾忽視同缺乏滿足，所以都幾符合現實

希望大家都保持温柔同同理心，而又持續燃燒屬於自己燦爛嘅焰火，唔好當係理所當然，珍惜還可以珍惜嘅人事物；至於過去嘅，都唔好太沉湎於回憶中，要向前看，白白流逝嘅煙確實令人傷感同可惜，但至少我哋可以決定唔讓剩低嘅重蹈覆轍，盡努力去完成自己想達到嘅燃燒方式同結果，只有噉，先唔會辜負過程