BULLET/BULLET

睇完上半1-8嘅感受：

遠冇諗到原創動漫會有噉嘅水準，雖然只係睇得上半季8集，都已經超驚豔！故事嘅發展都幾流暢同埋唔點拖泥帶水。

隔絕唔同階級嘅人，以謊言去蒙蔽世界嘅真相，因為平時都睇唔到對方，所以一般嚟講都唔覺有現實感。貧民區嘅人以回收垃圾為生，誤以為有毒氣而戴面罩，結果係採集延長他人生命嘅自身細胞 DNA端粒……噉樣嘅眾多平民賺得嘅大部分錢都係用來圈養「王城人」，壽命亦都得三十幾歲，仲以為係病咗，但實質上係端粒快玩完，因為早衰而快死……

用低級娛樂卡通人物洗腦，都好易理解，日頭辛辛苦苦先得少少錢，放工就開心飲酒打牌算數。少有人想儲錢買藥都係天價，而且只係安慰劑。如此無望嘅世界，正正係容易沉迷於簡單快樂嘅機會，前邊嘅飲食、博彩都一樣。if no，人生都真係幾無趣，就冇咁多人可以剝削。而當吉爾通過眾多同伴嘅主動犧牲，劫持呢個娛樂節目嘅訊號，並揭露呢個黑暗面，好多人都只係：唔信；「噉又點啊？」；咪阻住睇人氣卡通角色；而家噉樣都OK啦，何必要改變？

賭上所有得來嘅結果係噉樣，同打手大boss巴洛嘅講法一致，只係徒勞無功。事實上，羣眾都真係只會盲從，所有變革、革命都要靠少數人嘅不斷努力，都未必可以成功。高投入高風險，收益都唔確定，得個信字。

所以我幾中意呢個劇情安排，根本上冇可能一帆風順同埋一定成事。比較期待下半季要點樣發展，最核心嘅真相究竟會係乜嘢？又要點樣犧牲去得到幾多？王城同允許地下組織嘅目的又係點解？come soon！

P.S. 任何你想講嘅嘢，就即刻講！永遠唔會知道仲有冇機會講，都幾慶幸仲有時間，無論係劇情定係現實，continuing…

P.S.2 地下反抗可以得知一部分嘅真相，好可能就係一種壓力測試，反正點都唔會成功，同埋可以集中監控同必要時間摧毀，極其好使好用。無憂無慮都一樣會有反抗因子，就好好似Matrix嘅救世主程式，係極好嘅upgrade方案。

睇埋下半之後嘅感想：

老實講，呢個停頓真係有啲料到。if not，就唔會有咁大期望，所以睇完最後4集，就覺得有啲失落，不過再諗其實得4集，都好難再有更多故事發展，就變到勉強收貨笑死

改革之路需要前赴後繼嘅努力，接近核心真相，同時當然都需要不計手段同犧牲。why?任務極其艱難，唔係咁容易可以突破，唔同路徑都應該唔割席，各自努力。冇前輩嘅榜樣同指引，都冇咁易可以一下子衝咁快直達真相。

背後原因係機器人扭曲？well,就感覺格局變低咗……情節嚟講都算合理，只係比起前8集嘅發展，就硬係覺得差咗啲嘢，類似"just this?"嘅諗法。偉大之人只限於其做到嘅嘢同遺產，但上升到個人崇拜之後就好易出事，今次都係噉，本身係特殊極端情況下先集群體之力保住呢四個人（代表人類希望），但之後發展得越來越好，實際powerful。嗰四個「偉人」又低齡腦退化，冇得實時更新發展計劃，日久就肯定有問題。無論情況有冇好轉，最終都係會跟唔上實際情況，因爲喺呢個時候，優先保住嘅就肯定會係第啲人先啱。而託付畀機器人都要慎重再慎重，因爲強調嘅嘢唔同，就會有唔同嘅策略同方案。爲咗延續生命，去將人派去剝削，已經同「偉人」最初嘅理想同目標相差甚遠。腐敗而黑暗，積極向上嘅娛樂節目都變爲洗腦，超誇張，陰差陽錯之下令人忘記憤怒嘅感覺？

同一件事，用唔同嘅角度同演講方式，出嚟嘅效果就係會好唔同。最絕望嘅唔係完全冇希望、生命同資源，而係失去憤怒嘅能力同力量，某程度就係摧毀未來可以改變嘅可能性，再加之方向性嘅洗腦引導，大概大家都會成爲既容易開心又唔在乎其他事嘅「細路」。同樣嘅一件事，揭露真相並唔能夠/足夠號召人們反抗，因爲仲有好多其他事情去消化同思考，畢竟每個人嘅思考方式有所不同，有人懷疑真僞性，有人思考揭密真正目的，有人根本唔在乎、想睇返原來嘅節目。最重要嘅係唔好就噉放棄，上一代就係因爲冇堅持落去所以徒勞無功，同埋過於強調大台就會導致冇人可用，失去前進嘅動力。冇大台，各人按照自己嘅意願、諗法行動，反而發揮出更大嘅威力。我諗呢個都係點解示威同革命可以繼續落去嘅原因。人多咗，可以做/做得好嘅事亦都會多咗，負責上前線打鬥嘅，去感染號召嘅，技術突破嘅，集所有資源同能力一同發力，有機會真係可以撼動到？

我個人係比較悲觀一啲，今次嘅成功好大部分都係因爲機器人嘅輕敵（可能佢本身都期望有人可以改變現狀？否則根本冇必要講咁多，同埋佢去貧民區開吧都肯定唔完全只係爲咗收集故事素材啩。）所以我感覺後半段比較傾向於自我感動，連傀儡都用埋，又點可能咁順攤就將始作俑者四大「偉人」擺上檯？無論係爲死去嘅戰友同愛人而戰，定係抱住憤怒同信念爲自己而戰；無論係臥薪嚐膽做好詳盡計劃，定係鎖定一個目標就向前衝，實力唔夠就係再多嘅犧牲同努力都冇用……BTW，我唔覺得扮苟且偷生無動於衷就有問題，呢種唔叫「放棄今天」，而係等待明日，就好似明知死嘅，唔通真係去送死？唔係批判嗰啲爲理想而勇敢爭鬥嘅人，而係要爭取一個希望先去搏