陽光燦爛的果園

well，果農冇前途係一個大趨勢（賺錢太少甚至唔賺），轉型做太陽能發電都係無奈之舉。所以呢個譯名都幾正，明明係處於夕陽，但形容係「陽光燦爛」

而複雜嘅係，祖先救過地主祖先嘅命，所以一路都應承借畀佢哋屋企附近嘅一片地佢哋種水果營生。只不過喺呢個時代，做太陽能發電更加賺錢，所以地主後代就要求收返呢片地
究竟口頭承諾有乜用？其實係冇實質約束力，舊時可以相安無事只係因為地主一路都冇反悔嘅諗法，但經歷咗幾代之後，即使當初有幾大嘅恩情或罪過都唔會再覺得同自己有咁大關係，所以有白紙黑字嘅契約的確係人類進步，畢竟人性係一定會辜負相信，儘管契約都一樣但起碼保障得多啲
不過其實地主都冇趕盡殺絕，希望聘請佢哋幫手安裝維護太陽能板，撇除資產係前人繼承呢點之外，為人唔算差嘅。但係，富人繼承本身就係一種罪，係極大嘅不公，尤其成個制度鼓勵富者剝削貧者，無地嘅果農俾有錢嘅收購商壓價無法得到自己辛苦勞動嘅應得價錢，以至於寧願玉石俱焚揼晒算

噉窮人應該點算？都冇乜辦法，首先係要搞掂生計，因此要趕喺清地期限前搏命採摘生果去賣；同時老一輩仲抱有靠祖輩情懷嘅希望，但無功而返同埋其實係拋棄咗自尊；亦都有人願意被逼轉賽道幫地主手；不過絕多數人都係唔忿氣，上街遊行，仔女都參與搞惡作劇報復，呢個都係現實嘅寫照，乜人都會有，但始終多數人都係企喺公道弱勢嗰邊

但係呢，太過偏激同偽裝堅強都係錯誤做法，因為會令到身邊嘅人好辛苦，雖則本意係想當冇嘢發生唔影響佢哋。將真實嘅自己交出去，一齊面對比起自己一個收收埋埋要好得多

儘管如此，正值天真年紀嘅細路唔會理會咁多，一班人喺一齊，乜都可以玩，邊度都係樂園，天生嘅想像力就係激發呢一切嘅源泉。只可惜，我諗冇幾多人可以守護到呢種想像力得以發展嘅環境，遠離土地，俾封閉房間局限住，似乎係多數人可悲嘅童年……
都唔止係細路，家庭都如此，遠離集中生產嘅土地，大家庭就好難聚喺一齊，關係都會差好多。就算係嘈交嘅片段，我睇嘅時候都覺得幾溫暖，因為有愛有好深嘅連結，都好正

我哋嘅未來會係點？係陽光燦爛嗎？定係真正充滿希望呢？