Prehistoric Planet史前地球

有時睇下呢啲電腦合成紀錄片都幾舒服解壓

講起恐龍呢，之前去博物館當場預約入去睇，體驗好正，有解説，有幾多細路仔（錯重點）但又唔會覺得好多人，最緊要嘅係展覽效果（燈光吖、温濕度、空間比例之類）都勁好

返番嚟正題，點解人類普遍咁着迷於恐龍？

我諗可能有幾個原因。首先係先要存在，因為恐龍比較龐大，所以化石保存到而家相對容易，攞嚟研究嘅可行性就自然大好多，有咗成果之後就會有展覽之類；而令到恐龍脱穎而出嘅當然係因為佢勁龐大，人係有慕強心理，同埋因為未完全解密，帶有神秘色彩，就更加容易吸引到人

對於生物，基本上都係呢啲感興趣：出世、進食、被捕食/爭食、繁殖生育。雖然噉樣一講好似幾普通同單調，但紀錄片整體安排得幾好，有舖墊有引導，同埋啲劇情都幾有意思，and每一種生物嘅呢幾項都會多多少少有唔同，成為其獨特嘅部分

植物相對好生長，即使喺極地或沙漠，終會出太陽同落雨，就會有佢哋嘅發展空間；而素食動物風險細，除非植物太少，否則都幾易揾到嘢食，只不過其營養同熱量較少，所以要花極多時間去進食；肉色系則相反，風險高，經常會捕獵失敗，但只要成功一次就有巨大嘅收益，一餐食到飽可以頂好多日；雜食就更加勁，受傷疲弱時可以靠植物發育，有氣有力/旱荒就去打獵存活，但同樣有代價，要多一套嘢（消化系統嘅激素、消化酶、牙齒之類），同埋對唔同選擇嘅判斷力要求都高咗（究竟係繼續食水果之類定係去捕獵）

恐龍可以生得咁大，係因為佢哋冇抑制生長嘅基因（現代嘅鯨都係噉），所以種羣嘅首領往往都係老(唔代表弱而係有經驗）而大隻嘅，越生越大隻，地位越高優先權越高，後代都越多，基本上係正向循環，直至老到衰弱畀後生一代挑戰成功

但係生唔到咁大隻都唔一定係壞事，因為越細嘅話，生存空間就會越大，雖然個體嘅生存機會細好多，但成個物種嘅延續機會大好多，就好似恐龍噉，雖然稱霸到史前地球，但應付唔到大災難，所以滅絕晒

題外話，人類稱霸地球係一個異常現象。人類係點樣發展成而家噉樣？因為腦容量大咗聰明咗識得用工具？唔係決定性因素，因為好多動物都識用工具，唔係人類專有，同埋好多動物嘅智能其實一啲都唔差。因為識得用火？其實都只係工具嘅一種，雖然帶來咗好大嘅益處，可以更有效利用食物同減少病菌入侵，增加咗壽命；成為保護自己、捕獵嘅武器等等。至於傳承技能呢啲好多動物都同樣會。我會覺得係……知識技能嘅系統性傳承，結繩、畫畫、文字，一個人喺短短嘅廿三十年係冇辦法繼承同傳承到好多技能，但如果系統性記錄咗落嚟，學習嘅範圍同效果就會大好多，而一代代噉累積落嚟，就可以同其他動物拉開勁大嘅差距，即使有啲技能係其他動物都有機會偶然發現並學識，但因為冇辦法相對無誤同穩定地流傳落嚟而丟失咗，所以呢個gap就同樣係另一種正向循環。呢個諗法應該係有受到《自私的基因》嘅影響？大自然對基因嘅優勝劣汰係一方面啦，而文化呢個模因(meme)都有佢嘅優勝劣汰規則，我哋從語言、宗教等變遷發展都可以睇到佢嘅效果

講到有啲遠，再返番嚟先，喺第二季每集嘅最後有個uncover解密我都幾中意，科學就係不斷探索以求接近真相規則：從好奇心產生嘅問題出發，不斷發展科學同科技，從而利用呢啲進步去嘗試回答原來嘅問題/驗證提出嘅解説，會有好好嘅成就感

總之，睇完感覺真係好舒服吖~