Ma Rainey's Black Bottom

故事嘅背景係喺美國上世紀20年代，黑人嘅地位有少少嘅提升，南方嘅黑人更多地前往北方揾食。

被譽為"mother of blues"「藍調之母」嘅Ma Rainey，喺南方有好多黑人fans，深受大家喜愛。佢都順應潮流，來到北方發展，但呢度同南方好唔同，潮流、品味都唔同，所以佢嘅演出相對嚟講就冇咁火爆了。

Ma有專用嘅樂隊為佢服務，一樣係全部黑人，四個男人，三個都係中年；一個係好後生嘅Levee，追逐潮流，貪圖女色。

第一幕，有唱片公司揾Ma錄歌，佢叫樂隊先去，自己故意遲到，慢慢再等自己嘅外甥開車過去[yep，就算幾有錢幾有名都好，嗰陣冇人會畀黑人搭車]。band到咗之後，就被安排到地下破舊嘅練樂室，四個人就一邊練一邊傾偈。

Levee得到唱片公司老闆嘅賞識，叫佢創作歌，應承等佢夾到band之後幫佢錄製唱片，更加批准咗呢次Ma嘅曲採用佢嘅風格，所以得意洋洋；另外三個人就一直話，風格係由Ma決定，唱片公司講乜都冇用

跟住講到各自悲慘嘅人生：Levee細個嗰陣母親被十幾個白人趁屋企冇男人侵犯，父親帶佢哋搬走之後返嚟復仇，殺左幾個人先死；一個荒廢咗大半生，而家企圖喚醒所有嘅黑人一齊去反抗去爭取自己嘅權益；一個係結婚之後，老婆跟咗教堂嘅人走；最後一個講咗黑人神父喺火車站被一堆白人調戲侮辱，為咗求生迎合佢哋跳舞嘅故事。大家嘅處境都好艱難，甚至而家，喺練樂室，又破又舊，唯一一道通往唔知邊度嘅門仲係鎖死嘅，出唔到去。

Levee從佢父親嘅故事入邊，學識咗點樣以假面目去對自己仇恨嘅人（佢父親笑住將自己嘅土地賣畀嗰班白人，後邊再返嚟復仇），學識咗先討好利用佢哋等自己發達先，相信自己有才能，有光明嘅未來，以後出咗唱片之後會爆紅，唔再係小樂隊嘅小號手。其他人始終覺得唔可取，建議佢留低，咪話走就走。

姍姍來遲嘅Ma終於到了，結果喺路口出咗車禍，兩部車撞埋一齊，見到佢係黑人，警察就相信咗另一個白人車主嘅講法，話佢唔講道理，仲要喺傾數嘅時候整跌人，要帶佢哋三個人去警局調查。呢個時候，唱片公司嘅白人經紀人出面，室咗啲錢畀警察，搞掂件事。

Ma佢哋三個直接被請到環境非常好嘅一樓錄音室[講明Ma嘅地位比樂隊要高]，Ma更加係到處不滿，任性甚至可以話唔講理：例如話間房好熱要吹風扇，當自己屋企噉着住拖鞋行嚟行去，堅持要自己有漏口嘅外甥講開場白，冇可樂飲就唔唱歌……

呢啲行為令到唱片公司嘅老闆好嬲，喺二樓嘅錄音控制室激到扎扎跳，經紀人就樓上樓下不斷往返[界限感十分地明顯]，儘量滿足Ma嘅需求。[因為睇在錢嘅份上，忍，就狂忍]

Ma叫人去買可樂，自己一邊吹住風扇，一邊同樂隊嘅元老級領隊傾偈，從佢嘅説話入邊，我哋睇到咗一個偉大音樂家對於音樂嘅熱愛同堅持，始終認為Blues唱嘅係生活，生活唔可以缺失音樂，否則會非常空虛；而白人唔能夠明白，所以會中意時髦化嘅改版舞曲。自己嘅任性係刻意做出嚟嘅，為咗刁難呢班當自己係生錢工具嘅白人（就算經紀人好似幾關心佢，實際只請過一次去佢屋企，而且係為咗喺佢嘅一班白人fri面前唱歌），自己矜貴嘅只有嗰把聲，所以要趁未錄完歌未簽授權書之前好好地玩餐飽，當然，呢種整蠱都係有限度嘅，唔可以徹底反面，歌仲係要錄，字仲係要簽。相當於一種賭博，賭對方會繼續容忍

Levee睇上咗Ma嘅女朋友[yep，女朋友]，個個都睇得出嚟；而呢個女仔亦都對Levee有意思，所以會跑到樓下揾佢偷情

漏口ng好幾次，千辛萬苦錄好一張碟之後，老闆發覺錄音設備出咗問題，Ma非常火滾，即刻走人，經紀人一路追出門口，好言相勸，先噅到佢繼續錄。最後錄完了，Ma輪流贊咗樂隊嘅成員，除咗Levee，講佢冇按自己嘅風格嚟表演，多咗啲唔應該有嘅旋律；Toledo就話，我中意點就點，覺得噉樣吹會更多人中意聽，硬頸到點都唔肯低頭，Ma都一意孤行，炒佢魷魚[都有一種公報私仇嘅意味：『想溝我嘅女人？唔可以！』]

Levee話走就走，一個人落返去樓下，開始迷惘同擔憂，仲有憤怒，係噉撞個門，蠻力之下必有所得——見到自己喺洞底下[唔難理解，因為喺地下，樓上一層先係馬路，之前都有個鏡頭提示：經紀人喺路邊等Ma嚟嘅時候，從井下邊傳來演奏音樂嘅聲音]

事已至此，仲有什麼辦法？唯有將希望寄託於唱片老闆嘅承諾。但老闆為樂隊結算工資之後（呢度都有一個需要注意嘅點，老闆樂意為黑人提供現金而唔係支票，呢個係我唔點理解嘅，猜測可能係Ma叫佢噉做？雖然經紀人有聽到佢哋嘅聲音而且應承幫佢哋再講下叫老闆發現金。呢個都好現實，喺當時，黑人攞住支票，好容易被人認為係偷嚟嘅），Levee追住揾佢，（而且係關上地下室個門）。老闆就話，「我認為你首歌唔會有人中意，不過我可以畀你5dollar一首歌嘅費用」，跟住數咗錢放落佢嘅衣袋中。Levee徹底失望了，望住老闆行上路嘅背影，手上攞住自己時刻備身嘅小刀……

另外三個人其實都聽到佢哋嘅對話，所以當Levee行返落嚟，大家都唔點出聲。但當理性地想呼籲黑人一齊行動嘅嗰個人踩咗Levee對新鞋時，壓倒Levee嘅最後一根稻草——冇人真正關心佢，掏出小刀，激情殺人。佢嘅人生前途到此為止就真係冇咗了。

畫面嘅最後，係一班白人組成嘅樂隊演奏緊Levee譜嘅歌曲，但佢哋表演得好搞笑，唔係發自內心嘅，可以話諷刺意味十足

呢部電影，場景比較少，但其中嘅張力非常大，尤其係有大量嘅對白

Ma呢個角色，好多地方都有雙重嘅意味。一方面，佢被唱片公司剝削，錄一次得兩百美元，大頭當然就係唱片公司了；另一方面，佢又因為自己有噉嘅才能同名氣，而有勇氣去用故意刁難嘅方式去對抗。一方面，佢睇上去好唔講理，但實質上當黑白人種之間根本上好唔平等嘅情況下又點講理呢；另一方面，佢又會對自己人好好，同樂隊嘅人講心事講自己嘅想法，雖然人冇完人，佢炒Levee魷魚嗰下又好絕情。

至於Levee，不得不稱讚Chadwick Boseman嘅表演，下下到肉，啲眼神啲表情，一絕。Viola Davis演得都好好，不過冇咁亮眼，電影入邊嘅戲份相對嚟講少咗啲，聽講都係刪咗啲嚟凸顯Boseman嘅戲份。

佢細個嘅遭遇真係好慘，但8歲嘅時候，一個細路仔，喺噉嘅情況下，佢係冇辦法成長起身。daddy揾人復仇自己死咗，mommy信教但細路睇唔到上帝嘅作用所在，所以佢係唔信任何嘢，除咗自己，呢個都係佢點解隨身帶住小刀嘅原因，怕畀人傷害，但又唔會明顯表演出嚟話好驚，而且係聲稱自己一啲都唔驚。同時，佢根本就仲係一個天真嘅細路，老闆話佢有天分，請佢錄唱片就信到十足十，呢度唔係話老闆呃佢，而係，佢而家根本就係無名小卒，敢同Ma唱反調，老闆又點會幫佢呢？Ma先係可以幫佢揾大錢嘅人，誰重誰輕，一睇就明；但Levee係從未諗過呢個結果，將自己所有嘅希望寄託於其上，冇錯，佢的而且確係有創作流行舞曲嘅天分，但，太過天真而令到自己嘅結局走向悲慘。好多嘢，都係一種因果，如果佢細個有受到比較好嘅家庭教育，或者佢將來真係有可能會變得同Ma一樣咁紅，但，都係冇辦法

佢最後將刀揮向自己人，都反映咗好現實嘅一個事情，佢本質上都係驚白人。呢種同類相殘嘅例子，好多都係源於對其他欺壓嘅不滿，所以就向更弱者欺壓，無窮無盡，被毀同自毀嘅不斷發生，when to end

希望我哋有一日真係可以打破所有嘅不平等，a true love world