隱入塵煙

本來冇諗過咁早睇，因為仲有好多電影排住隊，但聽講喺流媒體全部下晒架，就吊起我嘅胃口了（「唔係我特別想睇㗎，係佢哋逼我㗎」

實在諗唔明白囉，以2010年代作為背景，呢個劇情喺一啲相對落後嘅農村完全合理（不過只要將佢睇成係政治而唔係藝術就見怪不怪了，因為大把多記者、編輯話你知佢哋一早已經慣咗

都係講返部電影，故事講嘅係兩個同為被各自家庭壓榨/欺負嘅人組成家庭，由一開始嘅陌生、怕醜但有好感，經過一段時間嘅相處漸漸關心、尊重對方，生活有咗新嘅希望——辛勤勞動、建屋，有個屬於兩個人嘅屋企幸福生活。不過火焰好快熄滅：女主跌落水死咗，男主都步入失落同絕望嘅深淵……

有一種一家人，係當你唔係人：幫手打長工，力就自己出，錢就哥哥攞；因為侄仔要成家而要通過幫佢結婚嚟趕佢出屋企，身上得返五十蚊積蓄……連買種子都唔夠，冇事就唔嚟，即使起屋要幫手都唔嚟，自己有事喇（個仔搬傢俬、買廉價房），先醒起有呢個細佬。又或者係從細就住喺漏風漏雨嘅草屋冇得住房，喐啲就被打，整到手腳無力唔靈活，仲要患病失禁，喺重男輕女嘅時候呢種現象更加普遍

喺噉嘅家庭長大，佢哋好自然就會自卑懦弱，相處嘅時候都格外小心，怕畀人麻煩，而又關心住對方：如第一晚女主唔敢上牀瞓怕自己失禁搞污糟張牀，深夜不斷出去等只為咗畀佢返嚟第一下飲到熱水。男主就大膽啲，要佢食飯，買衫佢着，仲斥責佢點解咁凍都要出嚟等……

人情總有温暖，經歷過太多冷漠同鄙視之後佢哋揾到咗一個真正愛自己、關心自己、尊重自己嘅人。所以佢哋都燃起咗新生活嘅希望——耕種、養雞、起屋，日子越過越好

但係呢，其實出邊嘅人始終都係咁冷漠，只有同自己嘅利益相關嗰陣先會關心下。比如話租咗大家地嘅人有病，就都走過嚟勸男主去捐血（咪大家嘅錢都凍過水）。而平時？睬你都傻，自己好少麻煩人哋，人哋都好少會幫你——男主次次揾人幫手都係話借住先，而且無論件事幾細都一定會還返；大家見到女主無力幫男主抬嘢都唔會講乜嘢，只係掛住繼續做自己嘢，甚至乎最後女主跌落水之後都冇人去救……其實都好市儈同冷冰冰，亦都更凸顯屋企温暖嘅重要——如果屋企都唔暖，家人之間唔互相體諒理解扶持，噉仲可以去邊度有？呢一點都係好多村民羨慕佢哋嘅原因

不過其實又唔係完全冷漠嘅，至少會畀男主賒數，願意借佢雞蛋、睇電視、乾草等等。甚至大家唔救女人其實都有諗住解脱男主嘅意思——對佢哋嚟講，呢種女人對男主就係一個負累一個包袱，所以死咗仲好——但佢哋唔知嘅係，成件事根本就唔關有冇用幫唔幫到手嘅問題，最重要嘅係感情好唔好相處開唔開心，女主嘅死帶走咗佢唯一嘅依靠同喺呢個世界嘅希望，儘管仲有一間唔細嘅屋、有好多家畜、靠自己勞作實可以養活自己，但屋企得返自己一個……所有嘅美好願望只剩低「不可能」，所以，佢交代好啲嘢之後都去揾女主，佢知道，女人行得慢，而且肯等佢，一定可以追得上再續夫妻情

最後男主有冇死到？因為最後嘅最後文字講佢喺2011年同埋屋企人喺政府嘅幫助下去到新地方住。有可能冇死到嘅，比如話畀人發現咗搶救返（村民就冇乜可能噶喇，因為冇人得閒嚟到佢屋企關心佢；最大可能性都係富家仔又揾佢去捐血），如果係佢嘅話都幾慘，心死成為行屍走肉之後仲要繼續畀壓榨成為血庫；又或者其實真係死咗，只係哥哥同侄仔繼續借佢嘅名義揾着數。所以我寧願相信佢真係死咗，同生者嘅世界斷絕所有關聯

至於點解會下架？可能都有呢幾個原因

1. 反映農村嘅落後同人情冷漠（「而家歌舞昇平一片向好，你拍埋啲噉嘅嘢嚟唱衰我哋？向外國遞刀子？」）
2. 農村輸血畀城市，富家人住喺城市，靠代表農民嘅男主嘅血維生
3. 扶貧政策十分亂，原意係好嘅，但係，叫一個好窮嘅人攞一萬蚊出嚟住城市嘅樓？呢一萬蚊點變出嚟呢？就會變成哥哥出錢跟住獨佔層樓；而且，好地地喺農村謀生，要佢搬到城市？乜都唔識點生活吖？佢淨係知道靠耕作、養家禽嚟生活。所以從呢兩方面嚟講都根本唔現實
4. 注重面子工程。空嘅房就要拆，打造所謂新農村——完全唔理究竟係咪有其他人租緊嚟住。拆咗就好，而且係越快越好，理鬼佢係咪有啱出世冇耐嘅燕子未飛走
5. 無聲嘅絕望，最後男主喺一片寂靜下服毒自殺
6. 喺外國得咗獎，有網民水軍鬧、抹黑……

分析咁多都係廢嘅，藝術嘅嘢理鬼佢乜嘢政治咩！

不妨去睇下呢部電影，誠心推介