飯戲攻心（還是覺得你最好）

首先要講，個片名改得莫名其妙，人哋好地地叫《飯戲攻心》，做乜改成呢個，雖然同插曲名相同……

我一開始仲以為大陸冇上映，點知原來係改成呢個名……但真係改得莫名其妙且勁差：首先飯戲攻心呢個名本身就好貼切，一家人一齊食飯，傾偈傾家常，所有嘅衝突都喺呢個時候傾出嚟跟住嗌霎爆發，所以會「攻心」，一家人最知根知底，所以 mean （刻薄）起身嘅時候都好容易 hurt 人

而且《還是覺得你最好》呢個名，係學友以前唱嘅歌，唔知嘅仲以為係講學友嘅電影……今次係張繼聰翻唱，成為電影嘅插曲；仲有，呢個名極差嘅地方係，好容易畀人誤以為係愛情片……

總之，就係超級無謂同亂嚟

不過，有得喺大陸睇，都算係噉，好過雖然冇改名但又冇得睇

希望只係字幕同片名唔同，其他都係原版啦（而且字幕都要彈，有啲位根本冇表達原意

其他地方，就係有贊冇彈喇

從舊年年尾就一直期待到而家，本身係賀歲片，因為疫情而變成喺中秋檔上映，不過變咗喺大陸有得睇，都幾好（不過如果喺賀歲嗰陣出會更加貼切，因為電影背景就係年尾快過年

未睇嘅就剌剌淋快啲捧場啦（以下會劇透，敬請留意）

1. casting

首先係casting，超中意

子華神唔使講，自從棟篤笑收山之後，就只喺影視同舞台劇見到佢，所以見到佢出演就期待，佢唱歌嗰陣仲期盼會攞出佢嘅結他彈hhh（可惜喊戲都係尷尬，喊唔出只能掩面，真係笑死

張繼聰一路都中意，佢嘅演技冇得彈，不過呢部確實好少發圍空間畀佢，願當綠葉，極好

王菀之，實掂，呢部就相當於舞台劇，表演對佢嚟講易如反掌，NG 片都好似冇睇到佢出錯，同埋主題曲嗨到乜噉，正到爆

鄧麗欣，都唔使講，演技實力派

林明禎嘅話，都好高興佢呢幾年留喺香港發展，今次有更多戲份同埋演技真係好咗好多

陳湛文，的確係先知呢位後生仔，都演得幾好

2. 歌曲

掂過碌蔗，歌曲都好貼合電影個 feel，特別係菀之唱嘅主題曲，cool到乜咁，而且真係好聽到洗腦

3. 人物塑造 / 情節

要贊下編劇，全片冇悶場，睇上去平平淡淡嘅一家人食飯都可以拍到此起彼伏，笑點亦都多種多樣、一定會有笑死你嘅地方

1）大佬（黃子華飾）

係個好守舊嘅人，講求一家人齊齊整整，無論點樣夜晚都要一齊食飯；覺得做大佬嘅就要孭起、承擔一切，寧願自己受委屈、犧牲自己都要為大局——一家人嘅和解妥協；但係就會好攰好唔開心，而且會將心事收收埋埋唔同人講，大家就更加難以理解同明白，雖然大家都係就住佢（強制一家人一齊食飯，點都唔想賣樓），同時又依賴佢（如果頭家唔係大佬維護住，早就散咗）

最搞笑係大佬只識抄襲，無論係抄襲心靈雞湯、人生哲理，定係自己嘅攝影都係抄人哋嘅；自己嘅第一個創作就被人告係抄襲超搞笑——真係抄嗰陣冇人知，創作嗰陣反而同人撞到正……

而大佬本身又係色盲，分辨唔到顏色，所以唔點同人交流，大多時候都係用whatapp，但大家都知，喺網上傾同面對面確實有好大區別，好易產生誤會（同前女友分手都係因為誤會分手）

好在喺 Meow（林明禎飾） 嘅開解同引導下，知道自己想要嘅係乜嘢，亦都知道咗要關心自己，唔開心就應該講出嚟，有乜嘢唔得就傾到得為止，無謂令到自己咁難過。最後放低咗執念，嘗試行得更遠，開始新嘅生活同發展新嘅關係

2）Josephine（王菀之飾）

屋企人啊嫲、阿媽都係做煮飯婆、佣人，而佢都喺呢種環境下長大，習慣咗煮飯畀人食，而且係好畀心機噉整，煮得又好好味

不過佢好早就知道自己唔想噉（當大佬邀請佢一齊住嘅時候就話自己唔想做佣人、菲傭或者丫鬟），只不過習慣成自然最後都係應承咗做個有工錢嘅家庭主婦

同埋佢同三佬日夜相對好多年，糖痴豆噉，期盼可以早啲結婚——但當三佬喺電競比賽成功之後求婚就拒絕咗，因為佢亦都喺 Meow 嘅啓發下知道咗自己真正想要嘅係乜嘢——發現自己嘅世界可以冇咗三佬，因為三佬一直睇上去都唔 care 自己，要佢結婚就成日拖字訣

呢個都代表現代女性走向獨立同自尊

3）三佬（陳湛文飾）

打電競，相信自己實得，要大佬賣樓贊助自己隊伍發展，事實都證明佢係有料，只係大佬唔理解，覺得佢玩玩下冇前途唔踏實

畢竟係新鮮事物，守舊嘅屋企人唔理解唔支持都正常，而且唔識、唔知情況下的而且確好難投資得落手

至於佢拖住唔結婚係諗住等自己成功咗之後先求婚，就好唔妥——點解要等自己成功咗先求婚呢？萬一自己冇咁嘅實力一世都唔成功呢（唔係詛咒，而係現實，好多人都冇辦法做到好 top 嗰班人）；而且好奇怪，如果自己嘅女朋友係因為自己成功先同自己結婚，噉……等得耐，茶都凍晒，蚊都瞓

4） 愛情係一個好難明白嘅事情

（先講明部電影最主要其實唔係愛情線，而係親情線）

如果當初分得唔清唔楚，仲掛住掛住，就會時時假設有如果，但呢個世界係冇如果，兩個人分開嘅原因有好多好多，即使當初係因為一啲誤會就分開，最根本嘅其實就係兩個人唔合適

Monica（鄧麗欣飾）同樣都係一個守舊嘅人，會保存好多舊事物，花好多心思同時間，但同事、上司都唔理解佢，所以好大壓力、容易情緒化；而大佬呢，亦都唔理解佢，好少面對面傾就代表好難安慰對方，久而久之，就會有好多拗撬同矛盾，最後兩個人分開

但分開之後呢，因為冇嗰啲追返氹返嘅情節，就會令人覺得仲有機會喺返一齊，甚至喺時間流逝嘅過程中忘記嗰啲唔開心嘅回憶，完美化對方，覺得對方好好，自己仲好愛對方

but，當真係出現機會，先知道火一早就撻唔着，對對方嘅感情早已經變咗、只係自己唔知道

呢個時候，就終於應該要放低，繼續過自己嘅生活，仍然可以祝福對方，相互嘅關係亦都可以唔知用乜嘢詞嚟形容但就係接受，一齊行落去

Meow 就比較開放前衞，拍拖嘅數量同認真其實真係一啲關係都冇，雖然次數多，但每次都係好認真好投入，而且最重要嘅係，可以喺對方身上學到嘢，廚師、攝影等等，不斷 upgrade 自己，所以都有觀眾話 Meow 係「下嫁」大佬，從兩個人嘅能力嚟講確實冇問題，不過愛情本來就同地位、能力冇乜關係，大佬吸引 Meow 嘅大概係嗰種專業認真、長情浪漫 & 犧牲自己，都係亂講，因為呢個 point 確實好難明（Monica 同二佬就比較容易理解，因為二佬心思細密，而且好關心同 support 到Monica），而 Meow 同大佬點撻着，唔知吖，睇上去就係天使下凡無條件愛男主，花心機時間瞭解佢、關心佢、幫佢、等佢，不可否認大佬都有佢嘅魅力，只係睇上去兩個人唔係好合（gaap3）。不過現實都有噉嘅，本來愛情就係一件好難解釋嘅事，而最緊要嘅係，兩個人揾到適合一齊相處嘅方式，愛對方、尊重關心對方，一齊進步同成長

4.5）齊人開飯呢啲就唔多講，開頭都有講到

一家人一齊食飯，有聲有氣就最正（同朋友、同事其實都一樣）；如果個個都玩手機，就冇癮（但而家真係好多時候會噉樣……食飯都唔傾，噉真係冇乜機會會傾）

5）屋企人喺邊，屋企就喺邊

呢個好易明，但大佬一開始其實係覺得「屋企喺邊，屋企人就要喺邊」，所以會有咁多限制同死板規定

只不過大家大個之後其實有各自嘅生活，就算大佬幾希望屋企人陪住自己，都要為細佬着想，唔應該咁自私為咗自己綁住佢哋，屋企的確可以係避風港，但亦可能變成係繩索。同埋就算呢個家到此為止，大家嘅心都仲係一齊，大家仲係會關心彼此，牽掛彼此

有屋企人嘅地方就係家，就係噉嘅意思

完（未睇嘅自動自覺啦

同埋，記得多啲陪下屋企人！