バトル・ロワイアル（大逃殺）

故事一開始介紹咗背景，21世紀初，日本經濟衰退，失業率超15%，青年學生亦不滿校園制度，犯罪率攀升。成年人與少年嘅矛盾日益激化，而成年人出於不信任同害怕，通過咗教育改革法（簡稱BR法），即係每年從全國四萬幾個班中揀一個班去到一個荒島上邊，三日時間最多只能活一個人出嚟【至於點解要噉做，後邊會講到。我當時真係感覺好奇怪，真莫名奇妙，好似就為咗設而設，『國將亡，必多制』，一年只抽一個班，就算要恐嚇效果都一般，所以我覺得只係一種報復——無能嘅成年人對於唔聽話嘅學生嘅報復，唔去解決問題嘅根源而去搞能力較弱嘅人】

男主七原秋也嘅媽媽喺佢小四嘅時候離家出走，爸爸喺佢國中開學嘅時候上吊自殺，留低「秋也加油！秋也加油！」嘅長幅字條【經濟唔景氣嘅時候，生活確實好難過，但只顧自己，而希望孩子努力加油生存落去，就真係好不負責任】

有一日翻學嘅時候，全班罷課：「今日唔上課，因為我哋不想上」，北野老師無奈地擦黑板，秋也遲到，唔清楚狀況。老師擦完黑板出門口，被國信慶時嘅小刀劃破咗大髀，北野冇講嘢，自己係水龍頭旁邊清洗，冇一個同學行上前。從呢件事之後，北野老師就辭職

時間過得好快，佢哋嘅義務教育結束了。一齊去畢業旅行。女主中川典子整咗一袋餅乾，畀七原同國信食。佢哋三個人影咗張相，而國信因為企得比較高，所以頭睇唔到，佢自己唔係幾介意。

路邊有軍人同軍車，有啲奇怪，但大家都係繼續玩。汽車入咗黑暗嘅隧道，全部人都陷入咗昏迷，只有七原秋也仲清醒，結果被戴住防毒面具嘅乘務員打暈。

大家醒咗之後，發現集體嚟到一間好昏暗嘅房，房入邊多咗兩個唔識嘅少年，而且每個人嘅頸上戴住唔知乜嘢。

跟住，北野老師竟然喺一班軍人嘅護送下行入房間，大家先發現呢個係一間教室。北野話自己係佢哋一年級嘅班導，大家唔識嘅嗰兩個係轉學生，川田章吾&桐山和雄。

北野解釋到，國家而家玩完了，就係因為有好多成日玩玩下、成績差又搞搞陣嘅學生（點名話國信），蔑視成年人，但佢哋無權力喺手，而當權人決定制定呢條法律，教大家學識自相殘殺嘅課

大家一開始仲唔係幾信，但當佢哋原來嘅班導嘅屍體擺喺佢哋面前嗰陣，所有人先知道呢個唔係玩笑【諷刺嘅係，死嘅原因係話佢無能所以係呢個下場。反對呢個BR法，就等於無能？滑天下之大稽】

跟住播放一段介紹「遊戲」規則，入邊一個好可愛嘅女仔用好kawaii嘅聲音講緊好殘忍嘅規則，每人會隨機分配初始武器，成個荒島劃分成十幾塊，每隔一段時間就會有幾個地區係唔可以留人嘅（相當於毒區），三日之後，只能剩低一個人，否則，全部人都會死（頸上戴住嘅頸環唔單止會監聽佢哋嘅心跳、脈搏同定位，仲可以爆炸！

播放嘅時候，有個女仔喺度傾偈，北野直接飛咗把刀過去，正中眉心，成為第一個死嘅人。國信十分激動，被眾人拉住。

國信唔係幾信，跟住被激怒嘅北野啓動咗爆炸嘅倒計時，第二個死，死之前捉住之前影嘅嗰張相，上邊有一句「秋也，你現在有沒有喜歡的人？」

「遊戲」開始！有人唔攞武器就出去，有同伴嘅都會同同伴講一句再走，like「我哋係好朋友」，「我要走了」，「喺邊度等你」……

一出去，男主就見到一個女仔被一個肥仔射中，【damn，咁快就開始了】

秋也同典子都順利會合，秋也一開始打算同三村和杉村集合一齊諗辦法逃出去，但典子話唔好，因為佢覺得其他人好可怕，除咗秋也。因為有一次一班女仔疜佢，話佢矮、臭、丑，關佢喺廁所出唔到去。

秋也諗起國信最後嘅話，係典子寫信叫佢翻學，「有個人等自己嘅感覺，好好」。秋也自從父親自殺之後就同國信一齊住，國信教佢彈琴，傾偈，可以話係共患難嘅好兄弟，自己卻救唔到佢，秋也決定要為國信報仇，而且代佢照顧典子。【呢一段都幾得意，明明秋也自己都中意典子，但聽到自己嘅好兄弟講咗中意之後就唔講了，典子就好明顯係中意秋也，從整餅乾第一個畀秋也食就睇得出】

有一對朋友一齊上吊，一堆情侶跳崖，唔想自相殘殺，亦唔想面對如果最後剩低佢哋兩個、要揀邊個嘅境地，所以主動求死，死喺一齊，都算係最好嘅結局。有人不斷揾人殺，有人團結一齊……

以下揀一啲印象比較深刻嘅情節嚟講：

相馬光子：細個嘅時候，佢媽咪成身無力，懷疑係飲醉咗，一邊摸著枱面嘅錢，一邊講「你要堅強啲，唔好學媽媽噉」。有個怪叔叔喺屋企，唔知係咪嫖客，送佢公仔，但除晒公仔嘅衫，頭都扯甩咗，仲叫佢都除衫，光子一手推開，將個人推落樓梯。所以佢嚟到呢個世界，呢個遊戲入邊，為咗生存，不斷殺人，或欺騙、或趁人不備、或色誘、或背後襲擊，死之前佢諗返自己嘅童年，留低一句「我只係唔想坐而待斃」。

對我嚟講，呢個角色好難去討厭，雖然佢殺起人嚟不擇手段，但呢個都係世界教佢嘅，影響佢嘅，係佢自己學得嘅「生存道理」，主動出擊，唔理做乜嘢都得，只有自己可以改變命運，活落去係佢最後嘅希望。

桐山和雄：戰鬥力超級勁，殺人如麻，以殺人為樂；不過電影冇交代佢嘅身世同經歷，聽講唯一嘅對白都被演員自己刪走咗，估計可能都係好悲慘嘅童年。睇嘅時候，真係幾恐怖同殘忍，冇相馬光子咁多計謀，但殺人嘅速度非常快同堅決。而且，一句話都唔講，就係「只做不説」嘅極端代表，係幾難接近同可怕

北野老師：佢係一個失敗者，事業同家庭都失敗。學生唔中意佢嘅課，可能比較古板唔感興趣；家庭都失敗，個女只會叫佢大叔而唔係老豆。失意之人，非常地孤單，唔被人理解，好少人睇得出，只有典子隱約感覺到。佢可能覺得，自己咁失敗係同噉嘅教育有關，所以加入BR執行機關，教佢哋世界冇咁簡單，係好殘忍嘅，要學識不信任，學識攻擊人。

佢係典子面對光子嘅危險時刻及時出現，之後都揭露自己畫嘅畫就係只有光子倖存，對典子嘅偏愛，可能係因為佢哋之間超越師生、父女嘅關係同感情，佢絕對唔係冇感情冷血嘅動物。

有一個好得意嘅鏡頭係，佢食住典子整嘅餅乾，有個軍人想攞嚟食，北野直接唔畀佢攞；想攞個地圖睇下，北野都係唔畀，其實都幾風趣嘅一個人

最後，得返典子、秋也、章吾三個人，章吾裝作殺死另外兩個人。軍人提出要去收屍確認【呢度有啲邏輯唔對應，前邊話會監測心跳等等。。】，北野知道佢哋搞鬼，不過樂意扮唔知，而且勸阻軍人，叫佢哋可以返去了。自己一個人面對三個人，接受自己嘅命運

三個人攞住武器，佢絲毫唔驚，仲畀佢哋睇咗嗰幅畫。之後攞住一把水槍，另外三個人唔知，對住典子，不斷靠近，刺激典子想典子開槍。一邊靠近，一邊講「加油」，可能係想典子學識傷害他人。秋也聯想起自己父親上吊嘅情形，都係加油加油，所以一下子開槍擊中北野，北野都開槍，槍噴水柱出嚟，秋也又控制唔到自己，連續射擊，另外兩個人木住咗，秋也講「我應承咗要保護典子」，【呢句話就好唔真實了，不過典子冇學識嘅，由秋也學識，都算可以？】。

北野嘅電話響起，佢喺地上企返起身【呢度又真係幾意外，唔通着咗防彈衣？嗰陣我真係噉諗】，同打電話過嚟嘅女講，「對人語氣咁惡劣，係要付出代價㗎！」，跟住將電話揼落地，從褲袋攞出真槍射爆部機，食埋最後一塊餅乾，跟住死咗。【佢真係坦然面對自己嘅命運，有真槍都唔用，就算當自己被射中嘅時候，都唔攞出真槍，呢度幾感動。佢都知道自己做咗乜嘢，將幾十個人間接殺害，呢個責任，係要負㗎。遲到嘅正義都同樣需要。我個人覺得佢係聽咗秋也嘅話之後決定噉做嘅】

內海幸枝：心地善良，大姐大，喺燈塔建立同盟，諗住大家一齊挨到第三日再決定點死。中意七原秋也【好似好多人都中意佢嘅】，得知佢同一個人打鬥嘅時候對方死亡係一場意外之後，就信咗了，唔再懷疑，而且同佢暗地表白：「你明白我嘅心意啩」。【呢度唔係話秋也有呃佢，只係咁單純咁易就相信秋也真係好難得，尤其係作為大姐大，幾個姐妹嘅命運可以講都喺佢手上】

可惜，嗰個見到打鬥意外嘅女仔唔信，所以暗下殺心，將毒藥下落準備端畀秋也嘅拌麪入邊，但唔好彩，一個為食嘅女仔啱返嚟，見到佢手上嘅麪就直接攞過來食咗，跟住暴斃。

聯盟嘅信任分崩離析，大家互相懷疑，就係唔懷疑下毒嘅女仔。。跟住發生槍鬥，只剩低落毒嘅女仔冇死，但佢都後悔同崩潰，所以跑到最高層跳塔自殺。

令人唏噓，信任真係好易就打破，如果我喺現場，應該點做先可以避免悲劇嘅發生？首先就係要確認所有人嘅想法係一致嘅，你話係意外，但親眼睇到嘅人唔一定就咁易相信了；如果真係唔好彩，有人毒死咗？well，理論上可以繼續講，but我覺得其實真係好難，只要有一刻諗歪咗，跟住做咗，就重新陷入呢個境地；只要有人做咗，而且唔第一時間坦白，人係冇辦法唔去到互相㨃冧

秋也非常信任嘅三村，真係得食，揾咗兩個同學做幫手，得知頸圈有監聽，並破解拆除頸圈，之後更hack入系統，癱瘓佢，更加製造出炸彈準備炸爛基地，只可惜桐山和雄殺到嚟，佢哋無法抵抗，最後未死嘅一個人原地引爆，炸盲咗桐山和雄嘅眼，為後邊秋也、典子、川田章吾三人小隊打敗桐山和雄打好基礎

千草貴子：雖然被逼加入「遊戲」，但保持自己嘅習慣——傍晚跑步。着住黃色嘅休閒服，非常顯眼（其他人都係換咗軍服）。被一個暗戀自己嘅鹹濕佬騷擾，且劃破咗自己塊面，大爆發，攞住自己把刀殺死咗嗰個人。然後被光子用槍偷襲，臨死之前遇到自己中意嘅人杉村，並表達咗自己嘅心意，挨喺對方嘅肩膀下幸福地死去【人不犯我，我不犯人；人若玷污我，我便要佢付出代價】

杉村：本來都打算同三村一齊團結起身，但係自己暗戀嘅女仔同自己失散，嗰晚越叫越走，所以帶住自己攞到嘅初始武器——雷達，去揾佢。因為有呢個利器，所以好容易能夠避開人羣，基本上好安全。不過佢都好仗義，見到秋也被殺人狂魔追殺，不顧自身安危去幫秋也，得以脱險。

所以佢都受咗槍傷，但繼續去揾佢中意嘅女仔，終於被佢揾到嘅時候。嗰個女仔見到有個人越嚟越接近，睇到唔睇就不斷開槍，杉村死喺自己中意嘅女仔手上，表達咗自己嘅心意，可惜，已經遲咗。個女仔話「點解我唔知你中意我」。死之前，杉村話我唔怪你，你好可愛，快啲走，啲人聽到槍聲就會過嚟了。只不過個女仔已經被各種情緒困住咗，所以被聞聲而來嘅光子打死

開槍嗰下，我又諗返起《智齒》，真係好似，當事人太驚了，被恐懼壓倒咗，所以手指不斷開槍，直到子彈冇咗都唔知。sigh，有武器喺手真係好可怕，邊有幾多人真係可以控制到自己，睇清楚對面係邊個先呢？

and要珍惜時間，想講嘅説話早啲講，臨死之前再講，就太遲了；甚至可能連講出嚟嘅機會都冇，更加可悲

川田章吾：所謂嘅「插班生」，其實係兩年前參加呢個遊戲嘅獲勝者，當時佢同佢嘅女朋友大貫慶子一齊衝破重重難關（殺人），最後時刻，兩人嘅頸圈響起，一齊死，定係其中一個人殺死對方而存活？突然，慶子攻擊佢，章吾反擊射死咗慶子，成為嗰年嘅獲勝者。佢再次參加，係想揾出答案：慶子當時被佢射到之後，笑住同佢講：「多謝你……」，佢想知道當時慶子點解要噉做，講嘅嗰番話係為咗乜嘢

所以佢睇到男主女主相互扶持嘅時候，決定幫佢哋，感覺其實嗰陣已經有答案，最後佢明白了，當時慶子係想佢活下去，多謝識到佢呢個朋友。【如果要揀一個人，我希望係你活着，呢個係我能夠為你做到嘅事情】

七原秋也：面對唔負責任嘅家庭，佢對成年人冇乜嘢好感，但又唔會似國信慶時噉搗亂，甚至傷害他人。但佢都係會成日諗起爸爸同佢相處嘅場景，的確，佢爸爸都係一個事業失敗嘅人，而且冇自信，去餐廳同個仔慶祝入學，都會被服務員激嬲，覺得人哋催住佢。雖然係噉，但佢始終鼓勵秋也，要加油！

但當有要保護嘅人典子之後，就變得好勇敢好有能量：主動引開桐山和雄，等典子可以安全離開。負傷都要帶住武器行去典子嗰邊，「因為要保護妳所以帶咗武器嚟」。呢句真係好鬼冧

不過本來想去同杉村、三村佢哋會合，因為典子唔中意就唔去了，從結局嚟睇，係好嘅，只不過，如果三村佢哋有幫手，可能，可能一早就搞掂咗基地了。what i mean is，自己嘅判斷都係要堅持嘅，尤其係當對方以個人情緒嚟反對嘅時候，既然係用情緒，噉就可以用佢對你嘅好感嚟改變佢自己嘅偏見，做出更加合理嘅選擇

中川典子：非常善良，而且可以敏鋭地察覺到其他人嘅情緒變化；對於自己信任嘅人好放心，對於自己唔係好中意嘅人就會好戒備

佢喺電影入邊冇幾多印象深刻嘅地方，好多前邊已經講咗了。不過，無論如何都唔傷害他人，呢一點就係好難得，難怪北野會將佢畫成天使

最後嘅最後，男女主被通緝，相互扶持，身旁帶住武器（刀），一齊過生活，跑嘅時候就跑，就衝，都算係一個温馨嘅結局了