跛豪

經典真係睇幾次都咁有味道，睇返啲江湖義氣仔女電影

跛豪本來唔跛，本來叫吳國豪，因大躍進饑荒走難到香港，同埋一班同鄉嘅住一齊，係汕頭幫嘅雛形

一開始空有一身力氣，所以以命相博博返個毒販小頭目嚟做，後尾有氣魄有計謀越做越大，衝昏頭腦唔收手，最後畀廉政公署同正直嘅總探長捉拿入獄。你話佢自己知唔知道有風險，都好難講。一方面，屋企人同埋一啲小弟都勸佢，之前包庇佢嘅雷總探長都話今次嚟真，所以按道理嚟講，佢都應該會有此擔憂；但另一方面，所有細探長都畀佢收買晒，而以前嘅成功經驗都令佢覺得今次同樣實食無黐牙，僥倖搞掂嘅話自己就可以隻手遮天，呢個誘惑都幾大

其實更想講嘅係義氣嘅片段：

吳國豪開頭掃蕩金牙炳，見金牙炳嘅小弟啞七喺大佬死咗之後仲繼續博命，就留佢命並送去醫治療養。啞七之後效命吳國豪，並喺大火併中拼死救返跛豪。對於佢哋嚟講，義氣大過自己條命，能夠為賞識自己嘅人死都可以講係好結局？至少我會覺得係彌補到當年冇救到金牙炳嘅遺憾。而大細蝦其實都一樣，雖然好顧家，同埋都覺得揾夠想金盆洗手，但跛豪叫到，都係會義無反顧去執行

國豪對自己人一直都好好，而且唔係只係畀錢，都要為佢哋好。吳明搞咗肥波條女而且又吸毒，都幫佢哋安排走佬，而且勸佢唔好再吸毒，儘管惹咗好多麻煩，跛豪都冇諗過要郁呢個小弟
但另一方面，因為大聲雄出賣跛豪，雖然後悔認錯同埋幫手復仇，但跛豪都係殺死大聲雄（之前謊稱會幫佢走佬），而令吳明驚咗走去告發跛豪……所以其實係咪真係要做到咁絕呢？當年仲係小頭目嘅時候，有差佬嚟收高咗嘅保護費，都係好公道地處理，最後兩人都和好相處，但似乎做咗大佬之後，氣量差咗？都有可能因為肥波屈佢一餐搞到跛咗導致噉

陳大文讀書人，所以真係好識分析全局，安排同屋企人走佬去加拿大（對比雷老大去台灣嘅結局），但都係最講義氣，明明已經決定要走，最後都係返去，因為知道吳國豪身邊冇人；而係跛豪趕佢走而咁啱總探長嚟捉人時，都係留低落嚟陪跛豪坐上警車，人生有此好兄弟，真令人羨慕

女角色嘅對比都好明顯：

謝婉英作為一個寡婦，唔使靠男人，自己就可以開卡車揾食。後來嫁畀跛豪之後都幫手管理倉庫，能力十分強，且好獨立自主
而楣楣一路都係賣弄自己嘅美色同身體去倚靠男人，雖然中間因為有咗感情而跟吳明，但始終都係好清醒，跟強大嘅可以保護自己嘅人。但命運最後都係要話畀佢知噉做持久唔到，就算雷老大仲可以繼續做總探長，總有一日都係會拋棄佢，所以從結果嚟講，只係提前咗，始終都係悲劇嘅人生