再見屋企

好在都係趕得切，返去慶祝最愛女人之一嘅生日，另一位就冇辦法喇，早到傻，因此亦聚唔到幾多屋企人（又唔係情情愛愛就唔好分先後大細啦，一於全部都係之一唔使煩！

似乎係呢幾年最短嘅一次？對上上次係有比賽，但係呢，無論幾短都好，都係屋企最舒服，叉下電，又可以頂半年！！！即將迎來最長嘅寒假，加油呀呀呀

同摯友見面食個飯都好正，做嘢之後確實係唔同咗嘅，但喺變化嘅同時都会察覺到無變嘅地方，仲係同一個人哈哈，賺錢係工作嘅道理，前路如何做個點樣嘅打工仔呢，好快揭曉，讀多三年自由時間已滿足，再讀落去就唔係自己嘅諗法，亦都預見唔會太開心，所以科研到此為止啦bye

懶咗易病係永久真理，好在平時有鍛煉開好快好返，所以都係要繼續keep住鍛煉先得，寒假返去要用下個新波啦，立flag唔好冧呀

喺屋企期間拋開社交軟件，睇少咗時事新聞（大選同弊案），多返時間睇書，超正，決定咗，每晚要畀返啲時間畀書。呢段時間睇咗《渺小人生》，感動到傻，死後人生真係好難，改變一個人都好難，此時此刻好重要，唔好浪費咗再追悔

再一次感到，愛同被愛係一件好幸運嘅事情，無論結果係點都唔會影響到，因為我就係一個重視過程嘅人，同埋，我而家依然會覺得開心，儘管都係同一系列嘅事令我好長時間都冇再撳過like（聽講X(前Twitter)有諗住加入更多反應，舉雙手支持(信我真係睇少咗時事㗎)，得like實在太差，留言太勉強，但又想留低已閱嘅印記，格硬like咗之後再unlike返，結果就係選擇唔好再like算），有時都覺自己有病？我真係受傷咗呀嘛，而有時亦都安慰自己事情並唔係以最壞嘅情況進行，所以叫我要去憎恨或者嬲都做唔到，就噉到此為止啦？可惜其實我都唔知自己想點，都話時間會治愈一切，實際只係自己個腦變咗，唔代表係壞事，但似乎不抱希望會好啲，正如自己根本唔確定究竟想點一樣，無論係以前，定係而家嘅自己

先發覺自己有好多嘢好多人都唔係咁了解，唔知係咪我会偏向於向好嘅方向去諗，亦都可能係因為的確相處得未夠耐就無從得知，而既然如此，就預設自己係啱先啦，不自信，但覺得所有人都可以有自己嘅感受，只係表達咗嘅話就亦要接受其後續（俾贊同、反對或無感之類），都fair嘅

最後，升學開學快樂（雖然都唔係幾特別，年年都噉講），就係唔知以後有冇機會可以再接送喇哈哈，願一切都順利啲，下年再見！

寫於夜火車途中，期待下次，可以清醒地留意沿路風景，所以真係要鍛鍊吖

P.S. 宿管問我係出差定實習，我：返咗屋企。唔通我老咗？定係只係大數定律？眠一眠先