進擊的巨人 完結篇（上）

講結論先，Mappa 嘅劇場版正好多，面部刻畫、動作特寫等等之前被彈得多嘅地方都做好咗，大概都有聽到動漫迷嘅呼聲

冇諗到，真係快到結局了（雖然已經睇過漫畫。動漫嘅話都算補咗啲心理上邊嘅描寫

點解失去咗先至會珍惜？其實係關注嘅重點唔同——未到世界末日，地鳴將至，好少人會反思仇恨教育嘅問題；未分開，就唔會知道原來自己咁在乎中意嘅人——件事都未發生，梗係唔會睇得咁長遠。呢個就係最大嘅問題，但「時光冇辦法倒流，只有後悔會繼續」，冇㗎，人生常態，亦都只能吸取教訓之後期望會改過

but，究竟會唔會？其實好難。正如一直都有「死性不改」嘅説法，亦同上一段所講嘅有關：人喺唔同嘅時刻所關注嘅重點。呢一刻好後悔，好想改過自新，完全 make sense，因為呢種希望會令到嗰一刻嘅負罪感、後悔減輕，但事後呢？換咗個時間、地點 or 環境，人嘅諗法可能就唔同喇，因為做緊嘅嘢/想做嘅事唔同咗，就會暫時忘記要改變自己嘅諗法

所以 Eren 都係選擇徹底發動地鳴摧毀牆外嘅世界，企喺佢嘅立場嚟睇，其實都講得通，因為佢睇唔到希望，甚至係覺得失望，因為呢個世界唔係佢哋細個睇到嘅噉樣，而且牆外嘅世界都唔畀佢哋生存嘅空間，就更加絕望了。而且 Eren 雖然從未來投送過嚟嘅記憶片段得知呢個事實，但亦都係等聽到宣戰之後再心死，包括其他人嘅選擇（尤其 Mikasa 嘅決定），令佢自己選擇呢條路，係自由，亦係剝削咗世界嘅自由

講巨人，好難唔講「自由」。究竟 Eren 係咪自由？就好似完結篇（上）Armin所問嘅一樣。一開始，我同好多讀者一樣都覺得 Eren 只係劇情嘅奴隸，但再諗返下，睇下動漫嘅處理、展現方式，隱約明白點解講 Eren 都係自由。
冇錯，進擊的巨人可以傳輸未來記憶畀以前嘅進擊的巨人，但唔代表嗰個人會乖乖聽話；包括 Eren 藉助哥哥嘅皇室血脈將記憶傳畀爸爸，爸爸都係再三問係咪要噉做先得，因為佢信自己個仔唔會呃佢，未來嘅人先知未來究竟會點，而 Eren 當時冇將未來會發生乜嘢傳畀爸爸知，所以爸爸唔知巨人幾時會嚟破壞城牆、將來 Eren 要發動地鳴等等。從呢一個角度嘅話，可以講爸爸唔自由——因為愛同對個仔嘅虧欠、信任而決定要殺皇室，奪取始祖巨人嘅力量（免受不戰之約嘅約束）。但 Eren 自由嗎？喺佢睇到記憶之後唔確定自己要點做，掙扎猶豫咗好耐，再聽埋其他人嘅意見，最終先決定一去無回頭，其他都係自由，佢有足夠嘅資訊同時間去思考，而雖然個結果唔一定係佢最想要嘅，但起碼都係佢可以接受嘅一個結局，所以我自已都傾向於認為 Eren 係自由嘅，而且係比佢細個時要自由，細個嘅佢俾仇恨、過大嘅資訊所控制，做事衝動而冇乜同理心，慢慢長大同成長，發現事情唔如意，身邊曾經好信賴嘅人都諗唔到解決辦法，縱然自己要做壞人都只能噉執行，因為別無選擇，只有自己有能力改變，so sad

尤其更加 sad 嘅係，Eren 冇辦法再去諗其他人嘅感受，尤其 Mikasa。決定咗，就只能一條路走到黑
"Under the Tree"