愛‧慕 Amour

因為未有得睇《白日之下》，所以就先睇呢部

要讚下演員先！老戲骨就算上咗年紀都仲係咁好戲，演得勁入骨，將種種壓力、愧疚、絕望嘅心境帶大家一一體驗

電影嘅兩公婆Anne同Georges以前係音樂教師，桃李滿天下，得意門生Alexandre更係著名嘅鋼琴家，滿世界巡演同錄製CD。兩人亦育有一女Eva，平時住喺國外，不時會打電話嚟同屋企人聯繫

雖然而家我哋仲正值青春年華，但人總係會變老，老咗之後，各種病痛就會不請就登門拜訪，好多時上一秒仲幾精神幾健康噉，可能下一秒就一擊摞低，情況一瀉千里。Anne就係噉，突然間就中風，對外界完全零反應，事後更完全零印象，跟住就去睇醫生診斷，聽從建議做一個低風險嘅手術，但黑仔中咗嗰5%嘅幾率，手術失敗，Anne嘅右半邊癱瘓，只能輪椅代步，生活不能自理，只能倚賴照顧者Georges

從天堂一下子跌落地獄，Anne逼Georges應承自己唔再送醫院或療養院，並認為自己成為Georges嘅負累，Georges立即否認，真誠地講自己樂意照顧同埋內心唔會有怨言——只係大家都可以想象到，一開始係最温情嘅時刻，因為一切都仲喺度摸索同有比較多嘅互動，比如話開咗門再推輪椅入去，同埋抱起身坐喺凳上相對交流……而隨着時間嘅推移，Anne再一次中風，狀況變得勁差，意識同言語都不清，仲會時不時叫痛，但又講唔出究竟邊度痛，所以對雙方都好痛苦……

而悲劇發生之後，更悲傷嘅係當你緬懷以前嘅時光，就會更加覺得而家好不幸。比如話Anne聽到Alexandre嘅CD，聽聽下就要求關咗佢，點解，因為而家嘅佢根本唔可以彈琴，而自己嘅學生就可以彈得咁好；包括Georges都係，聽嘅時候就會諗返起Anne彈琴嘅時候。好多人都話要向前睇，但其實好難做得到……

最hurt嘅係，有啲嘢的的確確會發生，但初初大家可能都會覺得唔會，因為，當時根本冇先見之明，無法估計到最差嘅情況，或者就算知道，都唔覺得會發生——人始終都有僥倖之心，認為唔會咁黑仔，or唔認為會咁快就會發生
開始時Anne就失去繼續活落去嘅希望，所以趁自己仲有啲活動能力嘅時候，想喺一個雨天同世界告別，但都係失敗咗。而喺畀人照顧嘅時候，自己嘅尊嚴越嚟越低，因為生活不能自理，基本所有嘢都有靠人照顧——一開始都仲會可以自己食飯、上廁所——最不堪嘅可以講係新請嘅護工極粗魯地替Anne梳頭髮，仲同佢照鏡話幾好睇……所以你都明點解Anne一開始就堅持自己唔要再入院或住療養院，and安樂死嘅依據
而Georges喺照顧過程中都越嚟越冇耐性，有一次格硬灌Anne飲水，當Anne噴返出嚟時，忍唔住掌佢一巴，跟住瞬間意識到自己失去咗理智，非常自責同後悔，而佢都開始明白Anne嘅諗法，因此，喺安撫好Anne嘅情緒之後，選擇自己殺死Anne，為佢換好衫同用花裝扮好，然後喺幻覺中跟住Anne一齊離開呢個世界，可能都係最好嘅結局，否則繼續互耗折磨對方，都好慘