意外再臨

人再勁，都好難有卓越嘅先見之明；而當事情發生之後，又好易會有後見之明，尤其係意外之事發生咗之後，就會諗返起一啲先兆，進而會去諗如果當時早啲發現早啲干預就好喇

人未大時，好多嘢都仲唔明，懵懵懂懂噉，聽到都冇乜情緒起伏
大個少少，明嘅嘢多咗，就感覺勁驚同難過，甚至無辦法處理呢啲情緒，但亦係人成長嘅其中一個課程，無論幾成熟都好，經歷過先會變得更加完整
到咗而家，經歷過咁多事之後，一部分嘅我果然淡定咗冇咁慌，反而大人仲驚啲（只要喺屋企，都仲可以做個任性嘅細路

但始終都係意外，始料不及而打破晒所有計畫，同時我諗細個嘅喊包始終都喺度，雖然果然冇爆喊，但一個人靜落嚟時都係好難過眼濕濕，望住窗外卻唔知會唔會好轉。我係信善有善報嘅因果論，但唔信好人有好報嘅回饋懲罰論。但我都希望細機率事件可以發生變為事實，一生勤力顧家正應享受天倫之樂嘅家中老人可以畀兒女子孫呢個機會

果然，雖然好老土，真係要好好珍惜同身邊人嘅所有時光，冇機會時再後悔就嚟唔切喇！